Salm 39
Nganfahnak A Ingmipa Sual Phuannak
David Hla
1"Ka tuahmi ah khan kaa ralring lai
ka lei kha sualnak ka tuahter
lai lo;
miṭhalo kha lam nai i an um lioah
zeihmanh ka chim lai lo,” ka ti.
2Holh loin ka um i bia pakhat hmanh
ka chim lo,
a ṭhami thil kong hmanh
ka chim lo.
Sihmanhsehlaw ka nganfah cu
a karh chih i
3ka lungthin cu khuaruahharnak in
a khat.
Ka ruah deuh paoh ah
ka lungretheihnak kha a zual chin,
4 “BAWIPA, zei can dah ka nun rih lai?
Zei tikah dah ka thih lai?
Zeitluk tuan ah dah ka thih lai?
Zei tluk tuan ah dah ka nunnak hi
a dongh lai ka chim tuah,”
ti hi hal loin ka um kho lo.
5Ka nunnak hi zabok can men ah
na ser!
Nang na mit ah cun ka nun chung hi
zei kar lo te bantuk a si ko.
minung hi voi khat thaw chem
tluk men an si dih taktak ko;
6thlahawm menmen an si ko.
An tuahmi vialte hi pakpalawng
an si dih;
chaw le va kha heh tiah an khon,
sihmanhsehlaw a cotu ding cu aho
an si kha an hngal lo.
7Cu ti a si caah cun, BAWIPA, zeidah
kaa ruahchan khawhmi a um?
nangmah lawnglawng hi
kaa ruahchanmi na si.
8Ka sualnak vialte chung hin
ka khamh law
mihrut nih capo ah ka sai ti
hna hlah seh.
9Hi tlukin nganfahnak na ka inter caah
dai tein ka um lai i bia pakhat
hmanh ka chim lai lo.
10Dan cu ka tat ti sawh hlah,
na dantatnak in ka thi
dengmang cang.
11Minung cu a sualnak kha
dantat awkah na sik tikah,
a iang vialte kha a lo dih,
minung hi thaw menmen
a si taktak ko. Selah
12BAWIPA, ka thlacamnak cu
ka theihpiak tuah,
kan nawlnak cu ka ngaihpiak ko;
nangmah kan auh tikah dai tein
ka umtak hlah.
Ka pupa vialte hna bantukin,
kei cu caan tawite chung lawng
na khualpa cu ka si ko.
13Thlan mual ka liam i ka um ti lo
hlanah hin
lunglawmhnak tlawmpal te tal
ka hmuh nakhnga
hnahnawk lo tein run ka umter ko.
Hi salm cu pumpak zunngeihnak asiloah ṭahnak hla a si i fimchimtu salm pakhat a si ve. A biatlangpi ah David hla tiah ṭial a si i David nih hin Jeduthun caah a phuahmi hla si dawh a si. Hi salm cu phundang te a sinak tete an um: salm dangdang hna cu an ral hna kha hlangfang tein le ralṭha te in an lehnak hna kha a langh lio ah anih nih cun a ral hna hmai ah holh lo in dai te in um ko kha aa timhnak a lang. Cu pin ah a tlangkawmnak ah hin hnahnawhnak um lo te in um a duhnak kha Pathian kha a nawl i cucu Job cauk he khan an hun i lawhnak tete a um.[1]
Caang khatnak: Salm caṭialtu nih aa ralrin ngaimi pakhat cu phunzai tlokciarnak a tuahmi ruangah Pathian sin ah a zai a si sual lai ti kha a si (cf. Job 1:22, 2:10); cucaah cun miṭhalo hna nih zeitluk in an ṭhancho len ko zong ah an cung i chiatserhnak bia a chim sual nakhnga lo aa sum, a lei kha a ven; zeihmanh chim lo te in a um.[2]
Caang hnihnak: Pathian a ṭihzah ruangah holh lo in dai tein a umnak hi a si i chunglei nganfahnak kha a innak cu a si. Bia a chim ve ahcun a cungah hmuh thiamlonak le a ral hna nih caantha an hmuhnak ah a cang sual lai ti kha a phang i a thami thil kong hmanh chim lo tein aa sum.[3]
Caang thumnak: Dai tein a umnak nih zeitluk in dah i suum a har ti kha fiang tuk in a hun hngalhmi cu a si. Ka lungretheihnak kha a zual chin tiah a hun chimmi ahhin a bia kalning taktak ahcun ‘ka lung hi a linh tuk ah a kang’ tinak bantukin a um i cu nih a langhtermi cu a thin a hung tuk ko ti kha a si. A sining a ruah deuhdeuh a ing a puang deuhdeuh ko, a sining dihlak hi a kangh in a kang ti khawh a si.[4]
Caang linak: A tonmi harnak (piahtana) cu amah te in aa hlihphuah (phisin) khawh lo caah Pathian lei ah a hun i mer: Bawipa lungthin cheuhnak kha a hun i ruahchan. Nunnak i harnak le ngaihchiatnak a tonmi ruangah zeitindah ka nunnak hi a dongh te lai ti kha hngalh a duh tuk ruangah Pathian kha bia a hal si lo in Pathian nih a nunnak lam kha a hruai i a sining a hngalh piak tu kha a duh deuhmi cu a si. Harnak chungin Pathian nih a sining a cohlan piak ding kha aa ruahchanmi cu a si.[5]
Caang nganak: Nunnak hi zabok can men a si ko tiah a hun timi hi lehmah 2.9” tluk a simi a si i a chim duhmi cu Pathian mithmuh ahcun pakpalawng men khi a si ko; a tawi taktakmi a si ti kha a langhter duhmi cu a si (Jer. 52:21. Thaw menmen a si ko tiah a hun nolh rihmi zong nih minung nunnak hi pakpalawng a si ko ti kha a langhter (cf. Job 7:7; Slm. 60:9; 94:11; 144:4; Ṭah. 1:2).[6]
Caang ruknak: Nunnak cu thlahawm (shadow) bantuk men a si ko timi nih a langhtermi cu nunnak hi zeitluk in dah a thazaang a der ti hi a si (cf. Slm. 73:20; 102:11; 144:4; 1 Chan. 29:15). A cunglei i a chim cang bang kha a sullam cu pakpalawng a si ko ti kha a si i; minung nih a rumnak chaw le va zong kha amah nih aa nuamhpi khawh ding le aho set nih dah an run co te lai ti zong kha a hngalh khawhmi a um lo (cf. Phutc. 2:26; Lk. 12:20).[7]
Caang sarih le caang riatnak: Salm caṭialtu nih a hun i fianmi cu Pathian cung i ruahchannak lawnglawng nih nunnak ah himnak a pek khawh timi hi a si; thil dang nih nunnak a biapitnak kha an pemh kho hrimhrim lo. Nunnak a kawlnak ah a hun i hngalhmi cu zeitlukin dah amah a sining kha a tlamtlin lo kha aa hmu; Pathian sin ah ngaihthiamnak a hun hal i khamhnak a hmuh ding kha aa ruahchan. Mithalo hna le mihrut hna nih a cungah caantha an hmuh nakhnga lo Pathian nih bia ka ceih ko seh a ti.[8]
Caang kuanak: Pathian hmai i dai te in um kha nganfahnak chung in a hun i thim (caang 2). Dai te in a um tik ah a lung a hun pemmi cu a sining kha a si i cucu Pathian duhnak chungah a ummi a si. Lungtho tein a cohlanmi cu amah cu Pathian kut chungah a um kha a si.[9]
Caang hra le hleikhatnak: Nganfahnak a tuarmi hi Pathian sin in a rami a si kha a hngalh. Dat tatnak a tuarmi zong hi amah a sualnak ruangah a si ti kha a lung a tling. Minung cu pakpalawng menmen a si ko ti zong kha a pom i hika thaw a timi hi tikhu tinak he zong khan a sullam aa khatmi a si; minung cu Pathian kut chungah zeihmanh thawnnak a ngeimi a si lo kha a langhter.[10]
Caang hleihnih le hleithumnak: Pathian sin ah pumpeknak in toidornak he a hun fuh than tikah minung menmen a si kha aa hmu i Pathian cu Bawipa tiah a hun bochan. Misual a si caah Pathian hmaiah khualpa bantukin a hun i hmu ko nain thla a cammi cu Pathian nih amah kha a hlaat lonak ding kha a si. Pathian nih a cung i bia a ceih lai dingmi kha thawn piak rih i cuticun Pathian biakamnak chungin a hung luangmi lawmhnak ah a teh in a teh khawh nakhnga a hun nawlnak thlacamnak a si.[11]
[1] CBC, 371. Jeduthun timi hi David nih a hmanmi a hlahruai hna i haotu bik a si (1 Chan. 16:41). Sual ngaihthiam halnak ca i thlacamnak ah hipa min in hmuhmi salm hi sak a si tawn (Slm. 66, 77); Anderson, 46 ah zoh.
[2] Anderson, 309.
[3] Barker, 841.
[4] Ibid.
[5] Barker, 841. Nunnak hi a tawi ngaingaimi a si i Pathian cu a dingmi a si caah Pathian sin i a thlacamnak hi cu sining nih a pekmi he an sining aa khatmi a si ti kha a lung a pem (cf. Job 6:11).
[6] Anderson, 310.
[7] Ibid., 311. Oesterley hoi hna nih cun minung hi Pathian muisam keng kan si caah pakpalawng tiah hika i a chimmi hi a uar lo ngaingai (cf. Gen. 1:27). Asinain a chim duhmi taktak cu minung hi a dong te lai, ri a ngeimi a si kha a langhter duhmi cu a si; Oesterley, 232 ah zoh.
[8] Barker, 841.
[9] Ibid.
[10] Oesterley, 232.
[11] Barker, 842.
Credit: Rev. Dr. Lal Pek Lian Facebook
(Amah (Rev. Dr. Lal Pek Lian @ Church Pastor, IBC) nih Salm Hrilhfiah a kan ṭialpiak cuahmah lio ah zapi rel khawh ding in a post mi chung in tår chinmi a si.)
EmoticonEmoticon