Jeremiah Mitthli: 7
Mitthli
nakin a chah deuhmi thisen hi minung kan chungah a um i Biakam Hlun
cawnpiakning ahcun nunnak a umnak a si i saram thisen hmanh nan ei lai lo tiah
thlauh a si. Thisen hi a man a sung tukmi a si. Fak tukin Baibal bia aa tlaihmi
hna nih atu chanthar ngandamnak lei fimthiamnak nih thisen hluut khawh a simi
hi an cohlang kho lo. Asinain a ruahzia le a pomzia thiam ahcun nunnak i
hrawmnak, khamhnak a chuahpitu, a sunglawi tukmi a si. Kain nih a chuahpi a nau
Abel a rak thah lio ah khan, Adam le Evi nih zeitluk in dek an rak tuar ve hnga?
Ruak an rak i hum kho lo. Kain kha an hei ti ngam fawn lai lo va si kaw,
lunghrinhnak mit hmanh in an va zoh ngam hnga dek maw? Adam le Evi mitthli a
rak luan ning cu a hmetuai hrimhrim lai lo tiah ka ruahdamh. A caan a hun cut
tikah cun vawlei in thisen nih bia a hun chim, Pathian nih cun a rak theih, a
rak hmuh ko.
Nangmah
lawng asiloah na chungkhar in asiloah na nubu rual he maw na pastorte ṭuan hawi
hna he maw, a thli tein mitthli he thla nan cammi kha a lak cu a si bal lai lo.
Rian na ṭuan cuahmah bu in ik thliahmah tein miphun luatnak caah thla na cammi
zong kha a lak a si bal lai lo. Moses nih Izipt mipa a rak thah i setpho lakah
a thuh-nawk ve ko nain, sau a rau lo, a miphun lila nih an phozar ko. Zeihmanh
hi aa thup kho thaimi an um lo. Pathian hmaika chinchin ahcun thuhnawh khawh a
si lo. Zaam khawh zong a si fawn lo. Ni khat khat cu theih bal lomi thlan, a
nunnak a rak pe ṭung i a ruak vuinak zong hngalh piak khawh ti lomi, nunthaap
miralṭha hna, upat peknak thlanmual kan ngei kho ve te ko lai. Paul nih Athen
khua mifim hna sinah a rak chim bang “Hngalh lomi…” kan ti ve te lai i an
thlanlung hmai ah anmah upatnak he kan dir ve te hna lai. CCOC palai, Khrih
caah a nunnak a rak pemi Ngai Za Siam thlanlung hmaiah a rak dirmi Rev. David
Van Bik nih a chimmi cu “Ngai Za Siam, nangmah hmai ahcun kei cu ka hme tuk
hringhran ee,” a rak ti, an ti.
EmoticonEmoticon