Na Caah Inn Khaan Tampi A Um Ko: 3 (Rev. Dr. Lal Pek Lian thazaang peknak)

Na Caah Inn Khaan Tampi A Um Ko: 3

======================

Kan Bawipa Jesuh Khrih hi vawlei cung i caan tawite a um chungah khan, khual a si ve tawn i ṭha te in an sawmnak ahcun zan zong a riak ve. Abiana ah Samaria mi nih an sin i caam ve ding in an sawm ah khan zan hnih a tlung hna. Samaria minu lawng si loin khuami hna zong nih Pathian thluachuah an tinco (Jn. 4:40). Johan Thawngṭha nih a kan chimhnak ah cun kum thum chungah kum fatin voi khat lengmang cu kan Bawipa Jesuh Khrih hi Jerusalem ah a kal, a ti. Asinain Jerusalem ah a caam bal lo, a pawng khua a simi Bethani khua tu ah zan a riak tawn ti a si. Zeiruang ah dah Bethani khua hi a tlun inn ah a hman hnga? A rak dawtu Lazaruh le a farle a simi Martha le Mary hna dawtnak le tlaihchannak ruangah si dawh bik a si (Jn. 12:1-8). Sawmtu sinah cun kan Bawipa kha a rak tlung tawn, zanriah a dumpi hna (cf. Zakia tuanbia: Luka 19:1ff). Asinain an khua i luh a sianh lomi hna kha cu khuachia khuavang a ṭhawl piak hna bu hmanh ah tlun-inn an rak donh i a rak tlung kho ve hna lo (cf. Marka 5:16-17).

Kannih cu kan nunphung nih khual cu kan bong le mal an si tiah kan ruah i khual ngeih cu kan uar i kan i lunghmuih ngai. Khrihfaphung nih kan kokek nunphung cu a hun thuamh chinchin tikah cun aa dawh tukmi pehtlaihnak a sersiam. Ka palh lo ahcun Laitlang (Chinland) ah kutdok in a vakvaimi Chinmi an um rua lo tiah ka ruah. Mitlamtling lo mihrut hmanh khua i an um ve tik ah bong le mal an si tiah kan ruah hna. Bawi Jesuh nih Lazaruh te unau ṭafar rual a tlun tawn hna i an i lawmh tuk bantukin atu lio ah kan miphun hawi hna Hakha hi nan Bethani a si kha philh hlah u. Nan caah inn khaan tampi a um. Kan inn cu nan inn a si, kan dum cu nan dum a si, kan rawl cu nan rawl a si i kan mawṭaw saikal le mawṭaw cu nanmah ta an si ve. Chin miphun caah Hakha cu Jerusalem zong a si i Bethani zong a si chih.

Rev. Dr. Lal Pek Lian nih thazaang peknak ah a ttialmi a si.