A Thei A Tlaimi Khrihfabu + Video Rev. Dr. Lal Pek Lian (IBC 2022 Judson Sunday Phungchim)
A Thei A Tlaimi
Khrihfabu
Baibal caang thim: Jeremiah 17:7-8; Johan 15:5, 16; Gal. 5:22-23
Biahmaitthi
Nihin hi Judson Sunday ti in Pathian
sinah Kawlram um Baptist khrihfabu hna nih lawmhnak kan chim ni, ni sunglawi
taktak a si. Kawlram ah Khrih ceunak le khamhnak a phaaknak hi kum 209 a
si cang (July 12, 1813) i kannih Laitlang zong ahhin thawngttha a phaknak hi kum
123 (March 15, 1899) a si ve cang; Pathian nih a miphun ah a kan sersiam
vemi kan si caah kan i lawm tuk i Pathian min kan thangtthat. Pathian biak awk
a ngeimi, Pathian he bia a khiak ttimi miphun kan si ve caah lawmhnak taktak a
ngeimi miphun le ram kan si ve. Cucaah mithluachuak, dawtmi, thleimi, vancung
pennak a sami kan si vemi hi kan
thluachuahnak nganpi a si. Kawlram chungum MBC he aa pehtlaimi Baptist
khrihfabu hna nih nihin ah tlang kan i tar ciomi, Pathian sinah a thar in
pumpeknak kan ngeihmi cu “A Thei A Tlaimi Khrihfabu” ti hi a si. Kannih
khrihfacu zong a nung i a thei a tlaimi khrihfabu a si khawh ve naklai Thiang
Thlarau lamhruainak kan i bochan hna lai i pahnihnak dirhmun i lak in
vancung pennak lohma chungah dinnak he rian kan ttuan ve hna lai.
Khrih khamhnak thawngttha a zamhtu,
a chimtu, nunnak in a phuangtu hna hi uar an um tuk. Annih cu an thlan-ti in siseh
an thisen in siseh thlaici a tuhmi an si hna i khrihfabu le miphun nih philh
awk an ttha lo. Annih kan philh lonak hna hi an rianhmi an Bawi, Jesuh Khrih
dawtnak chungah tuanbia dawh an ttial caah a si. Nihin ni ahcun thlaici an tuhmi
kha kan lungpi a simi Khrih cungah an vorhmi a si caah a tthang i theipar tampi
a ngei cang. Judson siangbawite nupa an temtuar ning, a lamkip in theipar
ngeihpiak an rak kan timhtuah piak ning hi upat lo awk a ttha lo.
Judson te nih hin Kawl ca le Kawl
nunphung chungah Khrih thisen an rak luanter khawh. Harnak le fahnak tamtuk an
rak tuar ko nain an rak lonh khawh. Baibal ca an rak lehnak hi thong-inn chung
hoi hna ah a rak si ko. Rev. Dr. Samuel Ngun Ling nih a rak chimmi ka hnathlam
ah a leng peng rihmi bia roling pakhat hun nolh ka duh ve. “Kawl siangpahrang
pa kha bia an hal ti a si; aziah mirang hi maw na kan huat i Kawlram chung luh
le rianttuan hi na kan sianh lo? Thong hoi hna ah na kan thlak, an ti tikah, siangpahrang
pa nih bia a lehmi hna cu mirang dang nan duh zat in ka ram ah rak lut u law
rian rak ttuan ko u, asinain hi pa (Judson) hi cu rianttuan ka sianh hrimhrim
lo, zeicahtiah a hmape hi ka miphun nih an celh lai lo,”[1]
a ti an ti. Mithiang Paul nih Khrih ta a sinak kong tehte a khaan tikah ka
hmape hi zoh ko u a timi kha lungthin ah a hung lang tuk ve (cf. Gal. 6:17).
Judson siangbawipa hmape hna nih theipar phun tamtuk Kawlram le a miphun caah a
tlaiter i hrangtlai le hmual ngei taktak an si.
Ca-holh lei in siseh, Baibal lei in
siseh, fimthiamnak lei in siseh, ngandamnak lei in siseh, a bik in Thinghmui
zawtnak thlopnak in nihin ni tiang theipar zun cawk lo in thluachuah kan hmu.
Kawl cozah nih 1964 lio i siangbawite dirh piakmi sianginn tthattha hna le
sizung hna cu cozah ta ah lakpiak dih an si lio ah Thinghmui thlopnak sizung hi
cu an la lo, cozah pi nih ttuanvo a lak huam lomi a si i Kawlram chungum Baptist
khrihfabu hna nih kum fatin Leprosy Sunday kan ti i thawhlawm kan thawh
ciomi te khan hi sizungpi cu a nun kan pehtermi a si.
Judson siangbawipa bia roling pakhat
te hun tenh ta rih ka duhmi cu “Lawmhnak le harnak ah, damnak le faknak lak ah,
hmailei ah kan kal cuahmah ko lai; a rocarmi Kawlram vawlei ah thawngttha
thlaici cu kan tuh ko lai i Zion tlang ah kan zuun te lai: In joy or sorrow,
health or pain, our course be onward still; we sow on Burma’s barren hill, we
reap on Zion hill” a rak ti. Amah kum 62 a ti, April 12, 1850 ni ah
tilawng in ngandamnak i thlop ding in a kal lio ah rili cungah a nunnak a dih i
cuticun rilipi nih a ruak a vui. Nihin ni ahcun Zion tlang ah khrihfabu a
dirhmi nih theipar tampi kan zuun i MBC chungah hin convention 20 tiang dir in
pehzulh in thawngttha thlaici cu kan tuh cuahmah ve hna.[2]
Kum hnih le a cheu chung US i ca ka
cawnnak ah kan ceihmai ngaimi pakhat cu zeitindah a thimi khrihfabu hi a ruak
kan fimtawl lai ti hi a si. Kei ka caah cun hi kong hi khuaruahhar ngaimi
pakhat a si, zeicahtiah Laitlang ah khrihfau a thi i a ruak kan hum lai ti cu
kan ton balmi a si lo pin ah ton ding phun zong in kan ruah bal lomi a si caah
a si. Asinain ram tthangcho hna nih an tonmi harnak hi a phun a tam, a thap a
chah tuk hi khrihfabu hmanh a nung kho ve lo i a ruak fimtawl a haumi zeimawzat
an um taktak ko. Mino nih biakinn an fuhpanh ti lo, pawcawmnak le nun diriamh
deuhnak an kawl cio tikah hmunkip ah an i tthial hna, program ttha an i tinh
kho ti lo, an suai kho ti hna lo i a donghnak ahcun biakinn caah mei man
le ti man liam awk hmanh an ngei kho ti lo i leiba kha nikhat hnu nikhat a karh
fawn tik ah a ruak vui a herhnak cu a si.
Pathian
dirhpiakmi khrihfabu hi minung nih ttuanvo kan lak ve caah kan thihpi khawh ko
ti hi tuanbia nih tehte a khaanmi a si. Cucaah khrihfabu cu a dam i a tthawnnak
caah mission rian a ttuan a herh i cucu Khrih nih a hmanung bik nawl a
kan pekmi zong kha a si. Khrihfabu hi thi ttung lo in zawt khawh ngai a si caah
a lamkip in ven a herh. Thiang Thlarau nih a hruai i bia a khiahpimi a si
zungzal awk a si i tukforhnak vialte kha Khrih nih a uknak le tthawnnak a
peknak thawngin a tei hrimhrim awk a si. Khrihfabu nih harnak a ton tikah
siseh, hremnak a ton tikah siseh a thazaang a tthawng duh ngaingai. Asinain
khrihfabu nih nun diriamhnak phun a ton tik ah aa porhlaw sual tawn i a tlaknak
a sang duh ngaingai. Cucaah a thei a tlaimi, cu a thei a tlaimi hmanh ah a
tthami thei an si a herh. Ram tthangcho hna nih an celh lomi tukforhnak cu nun
diriamhnak le rumnak hna hi an si i minung nih amah pumpak le chungkhar caah
herhmi dang a ngeih lo tikah Pathian bochan kha a philh tawn.
Rev.
Dr. Neil Sowards hi Baibal siangakchia nih bia kan rak hal bal: “Aziah US ram,
missionary zong vawlei cungah tam bik a thlahmi hna lakah khrihfabu a thimi nan
um khawh, tiah kan ti lio ah bia a kan lehmi cu, bia pakhat in kan hal chin ve
hna lai a ti; Kawlram um khrihfami hi US rammi khrihfa hna bantukin kum 200
renglo rum ngai ve u law biakinn a panhmi nan um ve ti hnga maw? a kan ti,” i
bia a haltu kan dihlak in ka ar-tthup ko hna. Cucaah thei ttha tampi kan tlai
khawh naklai khrihfabu nih fimkhur tein khua a khaan i fakpi in rian a ttuan, a
pum aa pek a herh. Pathian dinnak i tlaih in thukpi in pumpek a herh ko.
Khrihfabu nih thil ttha kan tuah mi tete hna hi kan hngalh tuk sual hna ahcun
kan thei tlai kha pangchia[3]
ah aa thleng lai i Bawi Jesuh nih a kan cawnpiakmi Vancung Pennak thei tlai
ttha sinak kha kan nganh sual ko lai. Kan i ralrin tuk a herhmi a si.
Thantlang khua nih siseh, khua dangdang le vawlei cung hmun tampi ah an tonmi biakinn rawhralnak, kangh-uhnak, hremnak le harnak hna nih a kan den ve sual hmanh ah Khrih chungah hram thukpi a thlami kan si hna lai; mei nih a kangh khawh lomi zumhnak he Thlaru theitlai vialte kha kan nun ah kan tlaiter ve hna lai; a bik in kan zapi fonh in khrihfabu nih theitlai ttha kan tlaiter ve hna lai, cu hna cu: dawtnak, lawmhnak, daihnak, lungsaunak, nunsiannak, tthatnak, zumhawktlak sinak, nunnemnak, le mah le mah i uk khawhnak hna hi an si. Khrih nih kan nunnak ah a cinmi thingkung cu Jeremiah nih a chim bang a zungzal in hring dildel in a um i a thei a tlai pengmi, vaupi ni le khuakhen kum zong nih hna a hnawh khawh lomi a si a herh. Salm hla phuahtu nih a chim bang tiva kam ah a kheumi thingkung, a caan hmaan tein a thei a tlaimi (cf Slm 1) kan si khawh ve naklai Pathian bia in kan nun cawm peng ko hna usih.
Andru
Nun Cawnnak
Kannih kan khrihfabu Immanuel
Baptist Church hi Johan Thawngttha nih a kan chimhmi, Khrih ah i peh in a hmun
zungzalmi thei kan tlai khawh venak lai i zohchihmi fel tein kan ngeih a herh
ve tiah ka ruah. Mi nih zei tin dah an kan ti, an ka ruah timi ah fak tukin a
buaimi kan si lo ding hi a biapi ngaingai. Mi nih cun innka aa kharmi khrihfabu
ti zong in an kan soisel men ko lai. Cun kanmah nih kan khrihfabu cu hmuhco
ding zeihmanh an kan pe bal lo ti zong in midang cungah uhttanhnak kan ngei
sual ve men ko lai. Hi bantuk i hmuhnak hi biapi bik an si taktak bal lo.
Asinain Pathian nih zeitindah a kan ti, timi tu kha fakpi in kan ruah le kan i
ralrin a herhmi a si. Andru cu nan hngalh dih bantukin Peter nau pa kha a si.
Baibal chung ah a min an ttialnak hi hmun 11 te lawngah a si ko nain a dirhmun
te hi uar a um tuk. Mirang holh cun second-best position[4]
an timi pahnihnak dirhmun i lak in lungtho tein rian ttuannak timi kha Andru a
nunzia cu a si. Andru hi Khrih a zultu hna lakah a hmasabik missionary a si ti
tiang hmanh in kan ti khawh ve ko hnga.
Tipil petu Johan nih phung a chim
lio ah Andru le Filip nih an zulh ve i a cawnpiaknak an ngai. Tipil petu Johan
nih Bawi Jesuh a hmuh tikah fak pi in a au i a chimmi bia cu “Zoh hmanh u,
vawlei sualnak a kalpi tu tuufa khi” a rak ti. Cu caangka, Andru le Filip nih
Jesuh Khrih cu an zulh tikah an hngahmi Messiah, Khamhtu Bawi a si kha an
hngalh. Andru nih a tuah hmasabik mi cu a u Simon (Peter) kha Jesuh sin i ratpi
kha a si ko. A u pa cu Jesuh sin ah a phaakpi tik ah cun Jesuh nih Simon cu
Peter ah a thlen i nga tlaitu pa kha mi tlaitu pa ah a sersiam. Peter cu Khrih
zultu hna lak ah hruaitu bik dirhmun ah rian khinh deuhmi a si i a nau pa Andru
cu cal lang a si lo. Asinain hruaitu ttha a dirhtthohtu pa, second-best
position aa tlaihmi pa a si.
US ram California peng ah a kheumi
thingkung pakhat a min ah Red Wood an timi hi pe 300 renglo a sang kho i
kum 2500 tiang a nung kho ti a si; hi thingkung kong fel deuh in an kherhlai
tik ah a hram kha pakhat le pakhat an i ngerh hna i thazaang an i pe kho peng i
kokek harnak vialte kha a lonh khawhnak hi a si an ti. Kannih Immanuel khrihfabu
zong hi miphun le ram caah, Pathian pennak ram kaunak caah a lamkip in thei
tlai ding kan i timhtuahnak ahhin Andru lungput le tuahsernak hi uar khun ve ko
hna usih. Kan chung tharul kha pakhat le pakhat ngerhternak in thazaang kan i
pe hna lai. Kanmah he aa pehtlaimi HBA, CACC, CCU, CBC, in MBC tiang thukpi in
kan ngerh ve hna lai. Pakhatnak sinak (first-grade position) kha kan i
hmaithlak lai lo, asinain pahnihnak dirhmun in lungthin dihlak in Pathian rian
tu kan ttuan hna lai. Hmape kan ngeih sual a si zong ah mithiang Paul le Judson
siangbawipa bang in aa lawmmi si ve ko hna usih. Pakhatnak a si kho dingmi mino
tampi le missionary tam deuh a cawmchuah khotu dingah Pathian nih kan khrihfabu
hi hmang hram ko sawh seh tiah thla cam hna usih, nun thaap ve hna usih.
[1] LBC pumhnak i Judson Sunday ah phung a rak kan
chimhmi a si. Siangpahrang pa a timi hi Bakyidaw kha si dawh a si.
[2] MBC chuahmi Judson Ni (July 10, 2022) timi cauk hmete
chungbia lakchinmi a si.
[3] Theipi ahhin pangttha le pangchia an um. Tlai ve ko
ttung i pangchia si sual lai hi ttih a nung ngaimi a si.
[4] MIT Annual Magazine, 1999-2000; pp. 143-145.
EmoticonEmoticon