Nunnak Lawng (Lifeboats)
Mrs. Albert Calwell cu Southampton ah a rak ra i, tilawng
hrennak atlaitu sinah “Hi lawng hi a pil kho tak lai lo maw?” a ti. “ Upatmi
nu, Pathian hmanh nih a tla kho lai lo,”a ti. Sihmanhsehlaw April 15, 1912 zan
lei sang in England in New York khuapi lei kal aa thawh. Meng 1600 Atlantic i a
lai fang a phak tikah tikhaltlang aa pah i Titanic tilawng pi cu a rawk i a pil
diam ko. Titanic tibaw hi minung lei thawnnak a langhtertu a si. Apil kho lai
lo tiah an ruahmi picu a pil ko. Minung 2200 leng chungah nu le ngakchia 700
fai nunnak lawngfate in(lifeboats) an khamh manh hna. A tlawmbik 1500 cu an
thi. Kan vawlei pi hi a rawk kho lai lo tiah kan ruah awk a si lo. Zoh hmanh
kan vawlei hi Titanic tilawng Rili pi ah a pil bantuk in a pil cuahmah ko, Rai,
Ral, Kokek harnak phunphun kar ah lungrethei in a kan thui a kan hninh saih.
Jesuh Khrih nunnak lawng chungah kan fale kan dawtmi hna he kan luh zokzok hna
aherh hringhran.Crd:
Jesuh
nih, “Keimah hi lam le biatak le nunnak ka si; keimah sinin ti dah lo cun
ahohmanh Pa sin an phan kho lo. (John 14:6) <Feb. 14, 2023>
Caan
Na caan hi rianṭuannak ah hmang ko-hlawhtlinnak i a man a si
Na caan hi khuaruahnak ah hmang ko-thilti khawh ṭhawnnak i a
hram pi a si
Na caan hi lente celhnak ah hmang ko-mino hna an thilthup a si
Na caan hi carelnak ah hmang-Hngalhtheihnak hrampi a si
Na caan hi pumhnak ah hmang-Pathian upatnak sang bik kan pek a
si
Na caan hi midang bawmhnak caah hmang-lunglawmhnak aa thawknak a
si
Na caan hi na hawi le he nuamte in hmang- nuamhnak hrampi a si
Na caan hi dawtnak ah hmang-nunnak i phunglam pakhat a si
Na caan hi chun mangmanhnak ah hmang- na nunnak muru nih van
Arfi a phak lai
Na caan hi nihnak ah hmang- Nunnak muru i a ringawn an si
Na caan hi thlacamnak ah hmang- Jesuh Khrih he naih deuh ah an
hruai lai. Crd: Roy B. Zuck: The Speaker’s Qoute Book.
Atu
caan hi zei caan dah a si cang ti kha nan hngalh caah hihi nan tuah awk a si.
Atu cu nan i hlauh awk caan a si cang, zeicahtiah khamh kan si lai caan cu kan
rak zumh ka nakkhan atu ah cun kan naih deuh cang.(Rom 10:11) <Feb. 15,
2023>
Na hreitlung Taat
Hlanlio ah a ṭhawng
ngaimi thing hauthiampa cu rian a kawl i thing zuarpa sin ah a va kal. A
rianṭuanding le a hmuh ding a tuak tikah a ṭha ngaingai cucaah thinghau thiampa
nih a ṭha bik ṭuan ding bia khiahnak a tuah. A Boss nih hreitlung a pek cun a
thing haunak ding hmunhma a chimh. Nikhatnak ah thinghau thiampa nih kung 18 a
hau. A boss pa nih a lawmh, “A ṭha tuk mah tite hin i zuam,”a ti. Thing haupa
cu a lung a tho ngai a thaizing cu a hau ṭhan i kung 15 lawng a hau khawh. A
kiptuh ahcun kung 10 lawng a hau khawh. “Ka thazaang maw a zor hnga,”tiah
Thinghau pa khua a ruat. Zeidah a cang ti a hngal kho lo cucaah A boss pa sin a
kal i a vanawl. A boss pa nih, “A hnu bik zeitik ahdah na hreitlung na taat?”a
ti. “Hreitlung!”hreitung taatnak caan ka ngeih tung lo, thingkung hau ding ka
zuamnak ah kaa manh lo,” a ti. Caan tampi ah kan rian a tamtuk ka ti hreitlung
taatnak caan ka pe tawn lo. Hi vawlei ah mi vialte hi manh lo ngaiin an um
sihmanhsehlaw an I nuamh caan a tlawm ngaingai. Rian fakpi ṭuan le manh lo ngai
in cawlcangh cu a ṭhat lonak a um lo, sihmanhsehawl kan nunak ah thil a biapi
tuk mi; kan mah nunnak, kan chungkhar, carel caan le Sertu Pathian he caanlak
ṭi philh tiang in kan i manh lo awk a si lo.. Kan dihlak in i dinh caan kan
herh, khuaruah caan, thlacam caan, cawn le ṭhan zong kan herh. Kan hreitlung
taatnak caang kan hngalh lo ahcun kan hnawl lai i kan santlaihnak a tlau lai
tiah catial tu nih a chap. Crd: Dr Fami, “Sharpen your axe”Febuary 13, 2023.
A dermi le a bami kha thazaang a pek hna. A nomi hmanh kha
an tha a der tawn i tlangval hmanh kha an tha a ba kho. Sihmanhsehlaw Bawipa aa
bochanmi cu thazaang thar an la. Mupi bangin an zuang lai; an tlik tikah an baa
lai lo, an kal tik zongah an tha a di lai lo(Isa. 40: 29-30) <Feb. 17, 2023>
Nun in Thawngṭha Chim
Nule va an um an nu cu Khrihfa a si. Kumhnih hrawng an umti hnu
ah an nu nih kan pa Khrihfa ah lut ve ko, a ti Jesuh Khrih a thihnak athawh
ṭhannak kong tampi a chimh. An pa nih cun kan nu na biakmi Jesuh Khrih hi ka
hngal lo nain abiatu nangmah cu nihin ah Zuu le rithainak ka tuah mi paoh na
tuah dih ve, lih ka chim ah na chim ve, bia ṭha lo ka chim ah keimah nak hmanh
in tam deuh na chim fawn zei dah nangmah le keimah kan I dannak a um hlei, a
ti. Minu a lung a pem, ihnak khan chungah a lut i Pathian sinah a sualnak aa
ngaichih. Bawipa kan pa hi Jesuh Kong cu ka chimh nain ka nunnak ah zohchunh ka
tlak lo caah kum hnih chung caan ṭha ka liam ter ka ngaithiam a ti, thla a cam.
Cu hnu ah minu cu a nun a hung i thleng, an pa cu Bawi Jesuh hi zum ve ko
tihmanh a hau lo kumhnih chungah aa thlang ve. Zumhnak dang pawl nih kan biakmi
Jesuh Khrih hi an hngal lo, Bible zong an hngalh duhmi a si lo. Sihmanhsehlaw a
zumtu nangmah le keimah nun hi an zoh zungzal. Crd: Ye Ming - RubyLand
Na
kum a no ruangah ahohmanh nih in zawmhtaih hna hlah seh, sihmanhsehlaw na
biachim na holhrel ah siseh, na zia na za ah siseh, dawtnak, zumhnak le
thiannak na ngeihmi ah siseh, zumtu hna caah tahchunh awk tlak va si tuah
(1Tim4:2). <Feb. 19, 2023>
Vawleicung ah thlaraulei rianṭuannak nganpi pakhat a si ve mi
‘4/14 Window’ timi bu a um. Ngakchia kum 4 in kum 14 karlak hna, taksa thlarau
ah ṭha tein an ṭhan hi a biapi khun ah chia in rian a ṭuanmi an si. Cu hna nih
an timi pakhat cu, “Nihin ni biakinn an tlau thluahmahnak le mibu nun ah
sualnak a karh chin lengmangnak cu kan hnu chan hna nih ngakchia an zohkhenh
ning cung ah aa hngat,” ti hi a si. Kan miphun a chiatṭhat te ding kong hi
nihin i kan fale caah thazaang kan chuahmi a tlawmtam cung ah aa hngat ko tinak
a si. Chungkhar nih siseh, Khrifabu nih siseh, kan fale caah thazaang kan chuah
mi hi hmailei chan kan mibu kan sersiam a si. Cucaah miphun a daw mi zumtu nih
cun kan fale miṭha Pathian a daw mi siter kha kan rian biapi bik ah chiah cio
ding a si. Crd:original
Ka
fapa, Khrih Jesuh he kan i pehtlaihnak thawngin kan hmuhmi Pathian vel nih
ṭhawnnak in pek ko seh. Tehte tampi hna theih ah ka chimmi bia kha i lak law,
midang a cawnpiak kho ve dingmi, na zumhmi hna kha va kenter hna.(2Tim 2: 1-2) <Feb.
20, 2023>
EmoticonEmoticon