Mibu Sersiamnak
=============
Vawleicung ah thlaraulei rianṭuannak
nganpi pakhat a si ve mi ‘4/14 Window’ timi bu a um. Ngakchia kum 4 in kum 14
karlak hna, taksa thlarau ah ṭha tein an ṭhan hi a biapi khun ah chia in rian a
ṭuanmi an si. Cu hna nih an timi pakhat cu, “Nihin ni biakinn an tlau
thluahmahnak le mibu nun ah sualnak a karh chin lengmangnak cu kan hnu chan hna
nih ngakchia an zohkhenh ning cung ah aa hngat,” ti hi a si. Kan miphun a
chiatṭhat te ding kong hi nihin i kan fale caah thazaang kan chuahmi a tlawmtam
cung ah aa hngat ko tinak a si. Chungkhar nih siseh, Khrifabu nih siseh, kan
fale caah thazaang kan chuah mi hi hmailei chan kan mibu kan sersiam a si.
Cucaah miphun a daw mi zumtu nih cun kan fale miṭha Pathian a daw mi siter kha
kan rian biapi bik ah chiah cio ding a si. Crd:
original
Ka fapa, Khrih Jesuh he kan i
pehtlaihnak thawngin kan hmuhmi Pathian vel nih ṭhawnnak in pek ko seh. Tehte
tampi hna theih ah ka chimmi bia kha i lak law, midang a cawnpiak kho ve
dingmi, na zumhmi hna kha va kenter hna.(2Tim 2: 1-2) (Feb. 20, 2023)
Ngakchia
le Thawngṭha
===============
1) Khrihfa nule pa vialte nih vancungkhua tiang kan i kai pi
khawh dingmi cu kan fale lawng hi an si. (Unknown)
2) Ngakchia Khrih sin i phanhpi tluk i thawngṭha chimnak i
hlawhtlinnak aum lo (R.A. Torry).
3) Ngakchiat lio i pianthar timi hi a taktak a si zia ka
theih, ngakchia Bawi Jesuh sin phakpi hi Khrihfabu ṭuanvo nganpi hrimhrim a si.
(H.A.Irons)
4) Ngakchia hrinṭhannak nih Khrihfabu a ṭhawnter zia hi ka
theihthiam khawh leng tiang a si. (D.L. Moody)
5) Thawngṭhabia hi puitling (upa) mi caah a dikmi a si bang
in ngakchia ca zongah a hmaanmi le adikmi a si, a tu le hmailei caan zongah
Pathian ram ca i ṭuan ding mi biapi bik cu ngakchia sin i thawngṭha chim hi asi.
(Billy Graham).
6) Ngakchia kum 8 an sihlan ah nu le pa nih zumhnak tlaici tuhcia
a herh, na tlai sual ahcun satan nih an tuh kanh lai. (Unknown).
7) Na fa nih na chim mi vilate a zumh dih lio ah Thawngṭha
chimh tluk in man ngei le a sunglawi mi a um lo. (Unknown)
Jesuh nih cun aa thawh i, “Ngakchia
cu ka sinah ra ko hna seh, dawn hna hlah u; zeicahtiah Vancung Pennak cu hi
bantuk mi hna ta hi pei a si cu,” tiah a ti. An cungah a kut a chuan i a
kal(Matt.19: 14-15). (Feb. 21, 2023)
Nunnak Suiphung Pawl
Na on ahcun khar ṭhan
Na van ahcun hmit ta
Tawh na on ahcun hrenh ṭhan
Na khiah ahcun bunh ṭhan
Na hrenh khawh lo ahcun a tuah kho
ding au hna
Na cawi ahcun cham ṭhan
Man na ngeihter ahcun zohkhenh
Na hnawmh ahcun thianh ṭhan
Na ṭhial ahcun chia ṭhan
Midang thil hman na duh ahcun, nawl
hal ta hna
Zeitindah ka tuah lai ti na hngalh
lo ahcun chia ta ko
Na rian a si lo ahcun biahalnak va
tuah hlah
Na hrawh lo ahcun remh duh hlah
Mizeimaw an i lawmhni a si ahcun
lawmhpi hna
Mizeimaw an min chiat ni ahcun dai
te in va um.
Crd: Roy B. Zuck: The Speaker’s
Qoute Book.
Bawipa nih, “Na zulh awk hnga lam
kha kan hmuhsak lai,
kan cawnpiak lai i lungthin kan
cheuh lai(Ps. 32:8). (Feb. 23, 2023)
Sualnak: Pathian le minung hmuhning
Mi nih sualnak hi a cang sual an ti,
Pathian nih cun a ṭha lo hringhran a ti.
Mi nih sualnak cu i chuahsalnak tiah
an ti, Pathian nih cun mitcawtnak a ti.
Mi nih sualnak cu caan ṭha an ti,
Pathian nih cun i thimnak a ti.
Mi nih sualnak cu tlinlonak an ti,
Pathian nih cun zawtnak a ti.
Mi nih sualnak cu palhnak an ti,
Pathian nih cun i ralnak a ti.
Mi nih sualnak cu mi lunglaknak an
ti, Pathian nih cun thihhring in thihnak a ti.
Mi nih sualnak cu taksa damlonak an
ti, Pathian nih cun ṭhat lonak a ti.
Mi nih cun sualnak cu nuamhnak an
ti, Pathian nih cun nawlbuarnak a ti.
Mi nih cun sualnak cu thilte tuai
tiah an ti, Pathian nih cun ngaihchiat awk ngaingai a ti.
Mi nih sualnak cu ti sualmi an ti,
Pathian nih cun hruhnak a ti.
Mi nih sualnak cu derthawmnak an ti,
Pathian nih cun hramhraam in tuahmi a ti. Crd: Roy B. Zuck: The Speaker’s Qoute
Book.
Ka sualnak kha ka phuan hna lo tikah
chun nitlak in ka ṭap. Bawipa, chunzan in dan na ka tat i ka thazaang cu a
dihlak in a zor, ṭhal ni lin nih khua a roter bantuk khin ka thazang cu a ro
dih. Khi tikah ka sualnak cu nangmah sinah ka phuan hna; ṭhat lonak ka tuahmi
cu ka thup hna lo. Nangmah sinah khan ka phuan dih hna i ka nawlbuarnak vialte
cu, Cucaah zumhawktlak a simi vialte hna nih cun, herhnak caan an ton tikah na
sinah thla an cam awk a si; tilian a tlun tikah a phan hna lai lo. (Ps. 32:
3-6). (Feb. 24, 2023)
Mipa Thlacam
Khrihfa upa a tar ngai cangmi hi
thlacam pumh zaan ah a hruai tawn hna. Thla a cam tikpoah ah a thlacam donghnak
hi aa khat peng, “Bawipa ka nunnak hi maimomh bu bantuk in raanter law thianter
ko,” tihi a si. Thlacampa sining a thei ngaimi a innpa a um, thlacampa hi mah
zawn lawng aa ruatmi, mah diriamhnak lawng a kawl mi khrihfa a si. Cucaah
voikhat nithum zaan pumhnak ah khrihfa upa nih cun athlacam cu voiding bantuk
in a donghter, a innpa pa nih cun a rannak in a va naih i thangpi in a au, “
Bawipa cu bantuk in tuah hlah, tuah hraam hlah! Maimomh a thah dih hna lai!,”a
ti. Crd: Roy B. Zuck: The Speaker’s Qoute Book.
Ka thlacamnak cu nangmah sinah an
kai, ka kalnak ding lam cu ka hmuhsak ko(Ps. 143:8). (Feb. 25, 2023)
(Acung ca hna hi Pastor Dr. Siang Zi (Vice President, CCU) nih a facebook ah thazaang peknak ca i a tarmi ka tar chinmi a si.)
EmoticonEmoticon