Zei thil paoh nih mui/hmai pakhat lawng an ngeih lo caah hmai khat zohnak lawng cun a donghnak biathleh nak tuah ding cu a si hnga lo.
Ka ruat len ve! CDF supporting tumtah a puitlinlo mi cu lung a
fak bak. Phaisa tampi sungh a si. Hihi hmai khat a si. Nain CDF supporting team
hmai dang zoh philhlo a biapi. Bochannak nganpi he fialmi an si. I din thiamlo
in an cawl ve. An ṭha a ba. Ningzah ruatlo in an chim rel. Hi an cawlcanghnak
nih miphun dawtnak thinlung a rak thangh. Ramrian kong ah tuanvo kan ngeih cio
ning an kan theihter. A rak lang kho ballo mi kan sining an hlai.
Miphun dawtnak a der tukmi ah kan rak i ruat nain zeitluk in dah
kan thawn ti kan i hmu. Lung aa ruallo ah kan rak i ruat nain lungrualnak a
ngeimi kan si kan i hmu. Sifakmi ah kan rak i ruat nain kan si a fak hrimhrimlo
ti a kan hmuhsak. Hruaitu a upatlomi ah kan rak i ruat nain a herh tik ah
hruaitu nawlngaimi kan si a langhter. A ral a chiami le thazaang a dermi ah kan
rak i ruat nain ralṭhami le a ṭhawngmi kan si a kan theih ter. Hi cawlcanghnak
hi rak um hlah sehlaw a sunglawimi kan sining hi i hmu kholo in kan um ko hnga
i zeihmanh tuah ngamlo in kan i thup peng sual men ko hnga. Hihi CDF supporting
team theitlai pakhat a si. Lung a hmui bak.
Kan miphun nih ral ngan kan tu ballo. Kan thiam kho rihlo. Cucu pom a hau. CNF/A faktuk kan soisel tawn mi hna hi ngaihchia le ningzak tu a si. A soiseltu hna hi lut ve hna sehlaw zeikhi dek an tuah khawh hlei hnga! Cucu kan i hngal tawnlo. Ngantuk in saduh kan ṭhat. Kan phaklo tik ah faktuk in mah le mah mawh kan i phurh. Hi lungput tu hi thinh a hau mi a si. Raltuk thiam bik timi ralbawi nganngan hna zong khi an sung tawn ko. Teitu an si zungzal hleilo. An palhnak an i hmuh ṭhan hnu ah a ngan deuhmi teinak an hmu ṭhan.
Kan nih kan sungh a voikhatnak lawng a si rih. Kan sunghmi cu
phaisa a si. Thinlung kan sungh rih ṭunglo. Hi sunghnak nih fimnak a kan pek
lai. Thachiatnak ah la hlah usih. I zumhlo nak rumro in zohhlah usih. Tuah hram
rumro puh hlah usih.
Kan sunghmi nak in a ngan deuhtuk mi lungrualnak le lungṭhawnnak pei a chuahpi ko hi! Tumtah mi rak tling sehlaw rawhnak lei hmanh a si kho lehlam dawkaw! Kan sunghnak hi miaknak ah thlen khawh zuam deuh hna usih.
(A cung ca hi Rev. M. Thawng Kam nih a Facebook Timeline ah a ttialmi chung in tar chinmi a si.)
EmoticonEmoticon