Sempangi Tehte Khannak
===================
Kum 1973 ah khan Uganda hi ṭih a nung ngaimi Idi Amin kuttang ah hrem an tuar. Pastor mino te a simi
Kefa Sempangi zong hi an hrem, an tuk ahmai zong mei in an khanghnak hma neh a
um rih. Sihmanhsehlaw kum 1973 Thawhṭhan zing ah Bawlung cuihnak stadium pakhat
ah minung 7000 cu Thawhṭhan thawngṭha kha ralṭha tak in a chimh hna. Rifles a
putmi mi panga an ra i Sempangi hmai ah an sawh, “Amin nawl na ngaih lo caah
kan in thah lai, ” tiah an hruaitu nih a ti. “Na thih hlan ah chim na duh mi
chim ta,”a ti. Sempangi cu hmakhat te ah a nupi le a fanu kha a ruat hna nain a
lu a thin. Tho ṭhan Jesuh Khrih a thinlung chungah
a um caah thazaang a pek. “Nan duh ning paoh in ka tuah ko u, Pathian bia ning
cun kei cu Khrih he kan thi cang, ka nunnak cu Pathian chungah Amah he kan i
thup cang. A tu hi ka nunnak cu ṭihnung chungah a um lo, nan mah tu hi ṭihnung mi chungah nan um. Kei cu
Khrih he ka tho ṭhan cang sihmanhselaw nan nih cu
sualnak chungah nan thi rih ko, zungzal rawhnak chung in Amah nih an luatter
khawh hna,” a ti. An hruaitu nih Sempangi cu saupi a zoh hnu ah a meithal cu a
tang ah a thumh cun, “Kan caah thla na kan campiak kho lai maw?”a ti. Sempangi
nih thla a campiak hna. Sempangi nih ral ṭha tak in tehte a khan nak nih an lung a
suk hna caah an dihlak in an thleng. A nih cun hremtu si tilo in kilvengtu ah
an cang. Source: 31 Days of miracles, Daniel Sathiaraj
Pathian bia cu a nung i a ṭhawng. Kap hnih har vainam nakin a haar
deuh. Hlang lak in a cheu khawh, nunnak le thlarau an i tonnak tiang, hliahcang
le thlik an i tonnak tiang a cheu khawh. Minung lungthin duhnak le ruahnak
vialte kha a hngalh dih(Hebru 4:12).
Napoleon Bia Roling
==============
- Napoleon nih a thih laite ah a chim takmi bia roling cu:
- “Kei hi hlan ah ralbawi ka si, ralkap thong tampi ka thithruai i nawl ka pek hna.
- Asinain a tu ah ka pawngkam ah mi zeihmanh a um lo.
- Kei hi hlan ah Continent pathum ka tei i ka uk khawh.
- Asinain a tu ka ke chiahnak hmunte hmanh ka ngei ti lo.
- Jesuh cu keimah nak in hlawhtlinnak tampi a hmu.
- Ralkap pakhat hmanh a rak ngei lo.
- Vawlei ah ram pakhat te hmanh a uk bal lo.
Sihmanhsehlaw a uknak ram
cu minung thong tampi thinlung chungah a um mi a si,”a ti.
A dikmi dawtnak hi hriamnam
nakin a haar deuh i minung thinlung le Thlarau chung tiang hmunhma a lak khawh.
(Aug 29, 2013 )Crd.
" 13A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak i a ngan bik cu dawtnak a si. (1 Kor. 13:13).
Zawngnganpi le Khualtlawng Pahnih
=======================
Mi pahnih bia dik a chim pengmi le lih rumro a chim tawnmi an um i voikhat
cu khual an tlawng ti. Zawngnganpi pi an umnak hmun an phan. Cuka ah
Zawngnganpi pakhat cu a mah le mah kha siangpahrang ah aa sermi a um,
khualtlawng cu a hmuh hna caah a sinah ratpi hna dingin nawl a pek hna. Cun
Zawng a dang vialte kha kehlei ah tlangkhat orhlei ah tlangkhat in a dir ter
hna alai i thutnak amah caah a chiah i a ṭhu. Cu hnu ah khualtlawng pahnih cu a
hmaika ah a auh hna. Donnak bia a chim hnu ah, “ Maw mising hna, nan caah hin
zeibantuk siangpahrang dah ka lawh?”a ti. Mi lih chimpa nih cun, “Keimah caah
cun Nang cu a liannganmi siangpahrang na si ko,”a ti. Zawngnganpi nih, “ka
pawng i pawl hi tah?”tiah a hal ṭhan. Milih chimpa nih cun, “ Hi hna pawl hi
na caah hawikom ṭha lawng te an si, lamkaltu le
ralkap hruaitu ah an i tlak,”a ti. Lihchim pa cungah cun aa lawm ngainga i
lawmhnak bia a chim laksawng tampi a pek. Bia dik lawng a chimmi pa cu khua a
ruat. “Lih ka chim ve ahcun laksawng tampi ka hmuh lai, ka sining tawn in bia
dik ka chim ah maw a that hnga,”a ti. Cu lio ah Zawngnganpi nih a mah lei a hun
i mer i, “Keimah le ka pawng mi hna hi na caah zeidah kan lawh?”a ti. Mi pa nih
, “Zawng lakah khuaruah har nan si, cun na pawng um mi zong hi khuaruahhar an
si ṭhiamṭhiam ,”a ti. Zawngnganpi nih mipa nih
biatak a chimmi a theih tikah a hawikom hna kha seh u law khuah dih u! a ti
hna. Crd;
Miṭhalo thiamcoh le miding sualphawt
hi, an pahnih in Bawipa mithmuh ah fihnung an si veve(Phungt. 17:15).
(Acung ca
hna hi Pastor Dr. Siang Zi (Vice President, CCU) nih a facebook ah thazaang
peknak ca i a tarmi ka tar chinmi a si.)
EmoticonEmoticon