MI RALTHA LAWNGLAWNG
Ule nau hna,
Pathian nih Israel mi hna raltuk a rak fial
tik hna ah biapi ngai in a chiahpiak mi hna cu a ralthami, aa sehchihmi
lawnglawng kal hna seh tihi a si. Cucu Deut 20 chung ah fiang tein a chimhmi
hna a si. “Cun bawi hna nih cun mizapi sin ah cun, thinphang le lungder nan um
maw? cu pa cu a inn ah kir tthan seh, a hawile lung zong kha amah lung bantukin
a zor sual lai, tiah an chim lai” (Deut 20:8). Mi ralchia mi, thinphan thlalau
in a khatmi cu inn ah kir ko hna seh tiah Israel mi cu a chimh ter hna. A chimhning
in an zulh ve tik ah teinak a hrawm hna, an zulhlo tik ah teimi ah an cang ve.
Zumtu fale hna zong nih nihin ah taksa,
thinlung, thlarau ral kan tuk tik ah Pathian nih a mi hna a rak fial ning te
kha kan hmuhthiam le kan zumh a herh ve. Kan Pathian ai khat, kan ram tu a kau
deuh, culawng cu ai dang. Kannih zumtu hna cu taksa, thinlung, thlarau ram
raltu mi kan si. PATHIAN RALKAP kan si i, cu raldohnak ahcun mi raltha mi,
sehchihnak a ngeimi lawnglawng kal hna seh a kan ti ve. Cu raltuknak ahcun
ralchiat a ngah lo. Mi ralchia cu raltuk an ngamh taktak lo, an tihmi a tamtuk,
an solhphelhmi a tam tuk. An ralthatbik ah a chim tiang lawng a si theo.
Rusia nih Ukrine an tuk ka te ah khan US
nih Ukrine President cu kan in laak lai, kan in zaamter lai tiah an ti nain a
duh lo, ka zaam lai lo, hriamnam tu ka bawm u, a ti hna. Sehtan le a hnuzul hna
kan dohnak hna ah Pathian ralkap hna nih cubantuk in kan chim ngam ve ding a
si.
Zeitindah Pathian ralkap hna nih ral kan
doh lai?
Pakhatnak,
HNULEI CAAN AH A KAN UMPI NAK PHILH HLAH.
‘Nannih nih nan ral hna doh awkah nan kal
i, rang hna le rangleng hna le nanmah i nak in a ngan deuhmi ralkapbu nan hmuh
tikah, nan ttih hna lai lo; zeitintiah IZIP RAM IN AN CHUAHPI TU HNA BAWIPA NAN
PATHIAN KHA NAN SIN AH A UM” (Deut 20:1).
Pathian min in raltuk cu hriamnam cung ah a
hngat hmasa lo, rang le rangleng cung ah aa hngat hmasa lo, mitlawm le mitam ah
aa hngat hmasa lo, ralkap bungan le buhmet ah aa hngat hmasa lo. PATHIAN KAN
SAWM HMASA I BAWIPA AH KAN I HNGAT hmasa timi kha biapi cem a si.
Israel mi hna sin a biacah cu, Bawipa nan
Pathian, Izip ram in an chuahpi tu hna kha nan sin ah a um, ti a si.
Nihin ah ral nganpi kan tuk lio ah Pathian
nih philh hna hlahseh tiah a kan cahmi cu hnulei caan ah a mi hna sin ah a rak
dirkamhnak hna kha a si.
Abraham, Isaac, le Jakob Pathian kha Chinmi
kan Pathian, kan chungkhar Pathian, kan pumpak Pathian zong a si ve. FAPA JESUH
KHRIH in a kan autu kan Pathian a si.
Harnak phunzakip chung in a kan chuah kha
philh hlah usih.
Retheih sifahnak phunkip in a kan chuah kha
philh hlah u sih.
Thihnak le hremnak phunkip chung in a kan
chuah kha philh hlah usih.
Namnehnak le zeirellonak chung in a kan
chuah kha philh hlah usih.
Uktu thalo le hruaitu thalo kutchung in a
kan chuah kha philh hlah usih.
Chin mi a thongthong in vawlei ramtha tha
ah a kan kuat kha philh hlah usih.
Hi vialte hi Chinmi kan Pathian nih kan sin
ah a kan umpinak tehte an si. Nihin ah a bia cu, nan tuanbia philh hlah u, ti a
si ko.
Pahnihnak,
TEINAK CU ZEITINDAH A KAN HRAWM VE LAI
'Cun raltuknak hmun kha nan phak dengmang
tikah TLANGBAWI KHA HMAI AH AN RAK CHUAK LAI I, mipi sin ahcun, Maw Israel,
thei tuah u, nihin cu nan ral do hawk ah raltuknak hmun cu nan phan dengmang
cang; …tiah a ti lai” (Deut 20:2)
Zei a ti cu? Tlangbawi hna cu rak chuak hna
seh.. a ti. Pathian hmai kawltu ding, Pathian hmai ah a dir dingmi tlangbawi
pawl cu chuak hna seh, a ti.
Nihin ah kakip in a lamkip in Chinmi nih
Pathian kan auh ve mi hi tlangbawi nih an rak auh bantuk a si ve.
Hruaitu nih kan auh,
Hruaimi nih kan auh,
Khrifabu kip nih kan auh,
Mipi ralkap nih kan auh,
Hmunkip in kan auh mi hi tlangbawi rian kan
tuan cuahmah mi a si.
Kan inn cio in kan auh,
Online in kan auh,
Biakinn kip in kan auh.
Bawipa aa lawm hrimhrim. Aa lawm chin
lengmang lai. Cun, teinak a kan hrawm ve hrimhrim lai.
Pathian a au lo mi cozah, Pathian zei i a
rello mi ralkapbu vialte cu a thawngbikmi Pathian zei a rello mi an si caah an
sung hrimhrim lai. Pathian a aumi tu hi teinak hmu mi cu kan si lai.
Theituah u, Israel a ti hna…
Theituah u Chinmi hna, theituah u, theituah
u… Pathian biakam hi… Bawipa Jesuh biakam hi… Thiang Thlarau in a kan kamhmi
vialte hi.. theituah u… a kan ti ve.
Pathian bia nih teinak kamh lawng silo, cu
hrawm khawhnak ding ah sehchihnak le lungfehnak a kan pek chih.
NOAH sehchihnak le lungfehnak bantuk a kan
pek.
ABRAHAM lungfehnak le sehchihnak bantuk a
kan pek.
DAVID lungfehnak le sehchihnak bantuk a kan
pek.
Annih cu Pathian caah mi raltha an si. Mi
raltha lawnglawng ral an tu ngam lai i teinak hrawmh an si lai.
Paul nih a nung in pekmi raithawinak in i
pe u (Rom 12:1) a kan ti. Pathian kan auhnak kha a lenghawng sihlahseh,
titernak sawhsawh sihlahseh, a phungmen sawhsawh sihlahseh, a khangh in
khanghmi raithawinak bantuk siseh a kan ti. Tukawng cu a ningpi in biaktheng ah
raithawi a si bantuk in kan raithawinak cu kan sining dihlak in a si lai. Mei
in thawimi a si i, Bawipa sin a phanmi rimhmui thawinak a si (Ex 29:18
relchap).
Cutining in raithawinak chung kan um tik ah
Bawipa bianing tein kan nun ah a lang chin lengmang lai. “Ka bia a thei i a
zulmi cu lungcung innsami mifim pa bantuk a si. Ruah a sur, ti a liang, thlitu
nih fak piin a hranh i a pur lo” (Mt 7:24)
Pathumnak,
TUAH TA DING KAN TUAH CAAH A DONGCHUAK A
THA : Tlangbawi hmang in Israel mi hna nih
Pathian sin ah raithawinak an ngeih cang caah, apnak, peknak an ngeih cang
caah, sehchihnak le lungfehnak he ral an doh caah a dongchuak a ttha. Bawipa
umpinak mithmuh kuttongh in an teh… ttihnak le phannak vialte a lo dih.
Nehemiah ai fiang tuk: “annih cu ttih hna
hlah u. A lianngan i ttih a nungi Bawipa kha hngal camcin tuah u, cun nan unau
hna le nan fapa hna le nan fanu hna le nan nupi hna le nan inn hna caah khan do
hna u, tiah ka ti hna” (Neh 4:14).
Ulenau,
Kannih Pathian ralkap hna zong raithawinak
he, sehchihnak le lungfehnak he ral kan doh tik ah a dongchuak a that ter cang.
A thatter chin lengmang fawn lai. Miphun caah a si, Pumpak le cungkhar caah a
si. Cucu Pathian nih a kan fialmi raldohnak cu a si.
Palinak,
TTIHNAK PHANNAK A UM TAWN
Mibu lak ah ralchia mi um phung a si,
thinphang ol tak mi um phung a si nain cu bantuk mi hna cu hitin a chimh
hna:Thinphang le lungder mi cu a inn ah kir seh, culo ahcun midang kha an lung
an der ter hna lai, a ti hna.
Phannak, ttihnak hi ichawnh khawh a si,
tlangrai bantuk in. Moses thlahmi minung 12 lak ah 10 kha zohhna ulaw, an ttih
an phannak kha mipi sin ah an chawnh hna i kum 40 tiang these rawn ah caan
hmannak a chuak (Nambar 13,14 relchap).
ASI NAIN,
TTIHNAK PHANNAK A NGEIMI CU PATHIAN HMAI
RAITHAWINAK AH KUUN RIH USIH, raithawinak ah ipe rih usih, tthawnnak a hram a
simi ah i bunh than rih usih. Thazang thar la than rih usih.
Cuticun MI RALTHA AH KAN CANG VE LAI I
TAKSA, THINLUNG, THLARAU RAM RALDOHNAK AH THAZANG NGEI NGAI IN KAN I TEL KHO
LAI.
Ulenau,
ASI, MI RALTHA LAWNGLAWNG HI NUNTHAP IN
RALDOH AH A KALNGAM MI CU AN SI TAKTAK KO. CUN, TEINAK HRAWMHMI ZONG ANMAH HI
AN SI ZUNGZAL KO LAI.
Haleluia
Amen.
Khrih ah nan hawi,
Thawngling Mualhlun
CEBC Indianapolis
July 25, 2023
(A Facebook Timeline ah a tarmi ka chiah chinmi a si.)
EmoticonEmoticon