𝐇𝐀𝐑𝐍𝐀𝐊 𝐇𝐌𝐀𝐍𝐆 𝐈𝐍 𝐏𝐀𝐓𝐇𝐈𝐀𝐍 𝐀 𝐂𝐀𝐖𝐋 (Rev. Thawng Peng Thazaang Peknak)

𝐇𝐀𝐑𝐍𝐀𝐊 𝐇𝐌𝐀𝐍𝐆 𝐈𝐍 𝐏𝐀𝐓𝐇𝐈𝐀𝐍 𝐀 𝐂𝐀𝐖𝐋

𝐒𝐚𝐥𝐦 𝟗𝟏:𝟏𝟒-𝟏𝟔

𝑻𝒉𝒂𝒘𝒏𝒈 𝑷𝒆𝒏𝒈

Mi tampi nih harnak kan ton tik ah mi vanchia bik ah kan i ruah tawn i, Pathian nih kan thlacamnak a kan let lo, a kan daw lo hlah maw, kan ti caan a um tawn. Asinain kan ton mi harnak paohpaoh hi kan caah thil ṭhalo an si thlu lo i, Pathian nih kan thlacamnak a kan leh lo, a si thlu lem lo.

Voikhat ah mipa pakhat cu tilawng in khual a tlawng. Vanchiat ah tilet a tho i, a tilawng cu ai let. Asinain amah minung bel a him. Tlunnak lam a thei ti lo. Ka umnak hi khoika dah a si, ti zong a fiang ti lo. Ei awk a ngei lo. I thlennak hnipuan zong a ngei ti lo. Amah pi lawng lungrethei tuk le harsa tuk in ramtang ah cun khua a sa. Thlam chiate ai sak i, thingthei in a paw ai cawm. Pathian sin ah thla a cam: “Bawipa, keimah chanhtu ding ah mi van thlah ko hna,” a ti. Ni a liam, zarh a liam, thla a liam. Ahohmanh chanhtu an ra hlei lo.

Nikhat cu rawl a kawl kar ah a thlam a kaang i, a ciam dih. Thinlung kekkuai ngaingai in rilikam ah a ṭhu i, Pathian sinah thla a cam ṭhan. “Bawipa, keimah chanhtu ding ah mi van thlah hna ka ti i, atu tiang ahohmanh an ra lo. Cu chinchap ah kai dornak thlamte a kaang fawn. Zeiruangah dah hi bantuk harnak hi ka cungah na tlunter?” a ti. Ngaihchia tuk le lung kekkuai tuk buin a ṭhu, khua zaza a ruat. Cu lio ah lamhlat nawn ah khin tilawng pakhat amah lei i a ra thliahmah mi te khi a hei hmuh. A sin an hong phan i, “Nangmah chanh ah kan ra,” an ti. Zeitindah ka umnak cu nan hngalh? tiah a hal hna. “Na umnak in meikhu van i a kai kha kan hmuh caah kan ratnak a si,” an ti.

Mipa thlacamnak kha a thlam kanghnak in Pathian nih a leh. Mipa caah cun ngaihchiat awk ngaingai a si ko. Asinain Pathian nih a thlam a kaang mi khu kha mipa umnak chimtu le thanhtu ding a 𝒍𝒂𝒎𝒌𝒂𝒍𝒕𝒖 ah a rak hmanpiak diam ai. Cucu kan hngalh khawh tawn lo mi Pathian khuakhanning a rak si tawn. Mipa nih a ton mi harnak kha a himnak, a luatnak le amah chanhtu ah a cang.

Kei zong ka thlacamnak kha zawtnak in Pathian nih a ka leh caan a um ve. Cucu zawtnak nakin a fak deuh mi harnak ton ding mi chungin ka luat khawh nakhnga caah a si.

𝑷𝒂𝒕𝒉𝒊𝒂𝒏 𝒏𝒊𝒉 𝒂 𝒌𝒂 𝒅𝒂𝒘 𝒎𝒊 𝒄𝒖 𝒌𝒂 𝒌𝒉𝒂𝒎𝒉 𝒉𝒏𝒂 𝒍𝒂𝒊 𝒊, 𝒂 𝒌𝒂 𝒉𝒏𝒈𝒂𝒍 𝒎𝒊 𝒄𝒖 𝒌𝒂 𝒉𝒖𝒉𝒑𝒉𝒆𝒏𝒉 𝒉𝒏𝒂 𝒍𝒂𝒊. 𝑨𝒏 𝒌𝒂 𝒂𝒖𝒉 𝒕𝒊𝒌 𝒂𝒉 𝒌𝒂 𝒍𝒆𝒉 𝒉𝒏𝒂 𝒍𝒂𝒊 𝒊, 𝒉𝒂𝒓𝒏𝒂𝒌 𝒂𝒏 𝒊𝒏 𝒕𝒊𝒌 𝒂𝒉 𝒌𝒂 𝒖𝒎𝒑𝒊 𝒉𝒏𝒂 𝒍𝒂𝒊 – 𝑺𝒂𝒍𝒎 91:14-15.

Hi zawn ah hin “harnak an in tikah” a ti. “Harnak an ing lai lo” a ti lo. “Harnak an in ahcun” a ti fawn lo. “Harnak an in tikah” a ti i, harnak kan ing lai, ti cu a fiang cia.

Sihmanhsehlaw harnak in tiangah a dong mi a si lo. Kanmah lawng zong in harnak kan tuar fawn lo—Bawipa he kan si. “Harnak an in tik ah ka umpi hna lai” a ti. Cu lawng a si lo; harnak chungin Pathian a cawl i, cu harnak hmang cun Pathian nih luatnak lam a kan serpiak ti kha fiang tuk in hngalh khawh a si.

𝑯𝒂𝒓𝒏𝒂𝒌 𝒂𝒏 𝒊𝒏 𝒕𝒊𝒌 𝒂𝒉 𝒌𝒂 𝒖𝒎𝒑𝒊 𝒉𝒏𝒂 𝒍𝒂𝒊. 𝑲𝒂 𝒄𝒉𝒖𝒂𝒉 𝒉𝒏𝒂 𝒍𝒂𝒊 𝒊, 𝒌𝒂 𝒖𝒑𝒂𝒕 𝒉𝒏𝒂 𝒍𝒂𝒊. 𝑳𝒂𝒌𝒔𝒂𝒘𝒏𝒈 𝒂𝒉 𝒏𝒖𝒏 𝒔𝒂𝒖 𝒌𝒂 𝒑𝒆𝒌 𝒉𝒏𝒂 𝒍𝒂𝒊 𝒊, 𝒌𝒂 𝒌𝒉𝒂𝒎𝒉 𝒉𝒓𝒊𝒎𝒉𝒓𝒊𝒎 𝒉𝒏𝒂 𝒍𝒂𝒊 – 𝑺𝒂𝒍𝒎 91:15-16.

“𝐇𝐫𝐢𝐦𝐡𝐫𝐢𝐦” timi biafang nih a fiang bak mi, a pelh in a pelh kho lo mi sinak a langhter. Kawlholh in chim ahcun a 𝒕𝒆𝒄𝒉𝒊𝒂 bak mi a si. Ka khamh men hna lai, ti zong a si lo. Ka khamh khawh men hna, ti zong a si lo. Ka khamh ṭheu hna lai, ti zong a si lo. 𝑲𝒂 𝒌𝒉𝒂𝒎𝒉 𝒉𝒓𝒊𝒎𝒉𝒓𝒊𝒎 𝒉𝒏𝒂 𝒍𝒂𝒊, a ti. Pathian biakam cu a pelh bal lo. Nihin i kan tonmi harnak chungin Bawipa nih a kan khamh hrimhrim lai. Cucu zum ko—Bawipa bia a si.

Kan ton mi harnak vialte hi kan luatnak ding lam sialtu ah Bawipa nih canter hram ko seh. Amen…

(Johnson Memorial Baptist Church Facebook Page i an tarmi ka tar chinmi a si)