Minung Khuakhannak le Pathian Tinhmi
============================
(Phungthlukbia 16:1-3, 19:21, Jeremiah 29:11)
Rev. Dr. Lal Uk
2023 June thla dongh leiah vawleipi a hnintu thawng pakhat cu 1912 ah North Atlantic rilipi tawne ah a rak pilmi vawlei cung minthang Titanic tilawngpi a rawkmi zoh ah a kalmi Titan tilawng hmete a puah i tilawng chung minung an panga ning i an thihnak thawng a si. Tilawng chungah aa telmi hna cu lawng mawngtu Stockton Rush, Shahzada Dawood le a fapa Suleman Dawood, Hamish Harding le Paul Henri Nargeolet hna an si. Mirum, mifim thiam le mipipa lawngte an si. Tilawng ngeitu hi OceanGate Company an si i lawng zulh man ticket pakhat ah US dollar 250,000 a si. 2023 June 18 ah an i thawh i minit 45 an rauh ah pehtlaih khawh an si tilo. Oxygen an i kenmi hi suimilam 96 ca lawng a si fawn. June 22 ah cun rili tawne ah an tilawng a puak i an panga ning in an thi cang tiah thawng theih a si. Hi hna nih hin an lung chung in khuakhanmi le tinhmi thil tampi an ngei ve ko, sihmanhsehlaw an donghnak bia ngeitu cu kan Pathian a si ko.
2022 December 22 in Mercynu he Hakha in khual tlawn kan i thawh ve. Kalaymyo ah kan unu a dam lomi Pi Mah Pen (Iangkunu) sinah Christmas kan hmanpi lai i cuhnu ah Yangon ah medical checkup tuah ah kan lan te lai kan ti. Carson Baptist Church ah Christmas kan hmang. December 27 ah Yangon kan phan. Rai le ral ruangah kum thum hnu ah Yangon ka phanh than a si. Lai Baptist Church ah 2023 kum thar kan hmang. Medical checkup rian cu kan van thawk ni tlawmpal ah Kalaymyo kan unu a zual le January 11 ah Kalay ah kan kal than le January 16 ah a kan thih tak. January 24 ah Yangon ah kan kir than i checkup cu kan pehzulh than i Febtuary thlapum checkup in caan kan hmang. Zing chiar in ngandamnak caah Innya kanbawng ah exercise kan tuah tawn. Checkup zong cu kan dih cang le thal chungah khrihfabu meeting le riantuanding tampi a um caah 2023 March 2 ah Kalay in Hakha lei tlunding in vanlawng ticket kan cawk i tlun lai zong kan i ngaih ngaite.
Thaizing cu zingka tein kan tlung cang lai le tuzing te hi a donghnak exercise va tuah ta usih kan ti le kan va tuah dih i 2023 March 1 zing suimilam 7:55 ah kan lawi cang lai kan ti i lam tannak zawn in lam kan tan lioah ningcang lo in van mawnghmi motor pakhat nih Mercynu cu a pah i inn phan lo in Thukha Gabar sizung tu ah ruah lopi in kan va phan colh. A ngal ruh hmun hnih le a kut nau um an kiak. Motor nih a pah lio ah hin Mercynu cu a pumpi in motor a cungah a vai bat i pe 100 tluk motor nih a lanhpi hnu ah motor cu a dir i motor cung in vawleiah a pumpi in a tla than. Samfa tia hmanh nunnak lam a um lo nain Pathian nih a nunnak a domhtlaih i thihnak thlan khur in a chuah i a khamhmi a si ko.
Sizungah ni 15 kan um. Kan chuah hnu in a tu tiangah voi 33 sizungah kan kal cang. July thla chung hi zarhkhat voi hnih in kalpi rih ding a si. Cuhnu ah zeitindek an hei ti te hnga. Atu tiangah thiangthunh thunh buin inn chungah cun amah tein a um kal kho a si. Thlacamnak le ngeihchiah chawva he bawmchantu vialte cungah kan i lawmtuk, Bawipa nih a let sawm za thluachuah in pe ko hna seh. Kan thinlung chungah khuakhannak, saduhthahnak le riantuan tinhmi tampi kan ngei ve ko nain a donghnak bia ngeitu cu kan Pathian thiamthiam a rak si ko.
Chinram kulh peng khuapi pakua hna lakah Thantlang khua cu a thangchomi, a nuammi le ai dawhmi khuapi pakhat a si. Thantlang khua ah inn chungkhar 2,000 hrawng kan um i a milu in 10,000 hrawng kan si. Khrihfabu 22 kan um hna. Thantlang khua hmailei thanchonak kongah siseh, kan khrihfabu cio thanchonak ah siseh, kan inn chungkhar cio thanchonak ah siseh, khuakhannak le tinhmi tampi rak ngeih cio a si. Sihmanhsehlaw 2021 September 20 ah cun Thantlang khua cu chuahtak le zamtak viar kan si hna. Ramchung le ramleng khua zakhat renglo ah ralzam in kan i thek dih hna. Kum hnih hmanh a tlin deuh hlan ah kan dawtmi hna minung zakhat lengpi nih ralzamnak hmun ah an kan thih tak cang. Thantlang khua kanghuhnak kong, ralzam dirhmun i thuttonak innlo kong, pawcawmnak le nuncan khuasak harnak kong, zawtfah damlo caan thlopbulnak kong, fanau pawl sianginn kai fimcawnnak kong, khrihfabu he ipehtlaihnak kong vialte ruah ah cun lungmit a si ko. Cupinah cun raltuknak helicopter le vanlawng le miakpi le bomb thawng nih dangkhat in a si hoi. Hi thil vialte hi kan ton te lai tiah kan rak ruah balmi an si loh. Thantlang khuapi nih khua cu a phunphun in kan rak khan cio hna, khtihfabu kip le chungkhar cio zong nih thlacamnak tampi zong kan rak ngei hna, sihmanhsehlaw a donghnak bia a ngeitu cu kan Pathian thiamthiam a si ko.
Cucaah Phungthlukbia 16:1 ah, "Minung nih khua cu an khan ko lai, sihmanhsehlaw a donghnak bia a ngeitu cu Pathian a si." tiah a timi Pathian bia hi philh hna hlah usih. 16:2 ah cun, "Na tuahmi cu a tha dih in na ruah ko lai, sihmanhsehlaw Bawipa nih naa tinhnak na lungthin cu a hngalh dih." a ti. Minung nih a tha tiah kan ruahmi le kan khanmi thil hna hi Pathian nih a tha lo tiah a rak hmuhmi thil tampi a um kho ko. Cucaah a donghnak bia a ngeitu cu Pathian a sinak cu a si. 16:3 ah cun, "Na tuahmi vialte cu Bawipa sinah pe law na khuakhannak cu a tling kho lai." a ti. Zumtu hna mi vantha kan sinak cu hika zawn ah hin a lang khun. Zeicahtiah khuaruah khuakhan khawhnak a kan petu zong amah Pathian a si i kan thil tuahmi tlamtlintertu le a donghnak bia ngeitu zong amah Pathian thiamthiam a si caah hin a si.
Dawtmi u le nau hna, cucaah cun nihin na nun lamthluan ah hin na khuaruah ning le na tinh ning in thil a kal lomi kong ah na khuaruah hartuk hlah, lung rawk le lung dong in um fawn hlah, zeicahtiah a donghnak bia a ngeitu cu kan Pathian a si. Cucaah cun kan khuakhanmi le kan thil tuahmi vialte, kan thinlung le kan ruahnak dihlak in Bawipa sin tu ah hin pe ko hna usih. Zeicahtiah Bawipa nih a kan tinhpiakmi a um ko rih tihi philh hlah usih. Jeremiah 29:11ah,"Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin hmailei ruahchannak le thluachuahnak caah a si lai." tiah kan hmuhmi Pathian bia ah hin i lawm ko hna usih. Pathian nih tinhpiakmi a kan ngei cio ko, cucu amah lawnglawng nih a hngalh rih, kannih nih kan hngal rih lo, nikhat khat ah cun kan hngalh te ko lai. Cucu vanchiatnak si loin hmailei ruahchannak le thluachuahnak caah a si lai a ti. Cucaah minung nih khua kan khanmi le nihin i kan ton cuahmahmi harnak tampi nakin Pathian nih a kan tinhpiakmi cu a let tampi in a tha deuhmi a si zungzal. A fapa ngeihchunte hmanh pei ui loin a kan pek cu, cu a fapa a zummi cu an thi lai lo, zungzal nunnak an ngei lai, a kan ti cu. Cucaah Paul nih, "Nan i ruahchanmi thawng khan nan thanuam ko u, harnak nan in tikah lungsau thinfual in um ulaw thlacam zungzal u." (Rom 12:12) tiah a ti bantuk khan kan i ruahchanmi ah hin kan thanuam ko hna usih.
Kan khuakhanmi le kan ruahnak le kan thinlung vialte hi thlacamnak he Bawipa sinah pe ko hna usih. Pathian tinhmi caan kan phak tik ah cun nihin kan tonmi ralzamnak, kanghuhnak, thihnak, khawndennak, zawtfahnak, rawltam tihaalnak le harnak chung in a tha deuhmi le ai dawh deuhmi Thantlang khua, a dammi le a thangchomi khrihfabu, a daimi le a nuammi inn chungkhar Bawipa nih a kan pek than ko lai. "Minung lung chungah khuakhannak tampi a um ko lai, sihmanhsehlaw Pathian tinhmi lawng kha a hmun lai." (Phungthlukbia 19:21) Careltu vialte, Bawipa nih thluachuah in pe ko hna seh.
Johson Memorial Baptist Church Facebook Page ah an tarmi ka tar chinmi a si.
EmoticonEmoticon