William Nelson te
chungkhar cu an Christmas kha chungkhar sahlawh he kan hmangṭi lai tiah timhtuahnak nganpi an ngei.
Tihang ca le meh caah a phunphun an cawk i a thawt khawh chung in an chuan. A
rauh hlan ah sahlawh rualchan hna an ra lai tiah timhlamh ngai in an hngah hna.
A sinain ruah lopi in
nikhua a chia i vur a tla thluahmah. Lam zong ah motor aa chawk ti lo.
Telephone zong a dai dih. Chungkhat rualchan hna he kan i nuam lai an timi zong
an ra kho ti lo. Cubantuk Christmas caan ah sahlawh rualchan hna he Christmas
nuamte in hmanti khawh lo cu an ngaih a chia tuk. Ṭhut dan le cabuai hna zong a
lawng liangluang. Rawl an timhtuahmi cu cabuai ah a khat ko. Dumtu ahohmanh an
um lo. Kumkhat chung ah lawmh bik caan cu lunglawmh lo bik caan ah a cang.
Rawl dum caan a phanh
tikah anmah chungkhar lawng an dum. An pa bik nih Pathian sin ah lawmhnak bia a
chim. Asinain ahohmanh an ei kho lo. Ahohmanh zong an holh lo. Cu lio ah an nu
nih, “Christmas timi cu i hrawm hi a si, kan inn pawng inn pa hna lak ah a lung
a leng mi innchungkhar zong an um kho ko. Christmas zanriah hi hrawm hna u
sih,” a ti. Cun ei lo in an thoṭhan dih i rawl cu ṭhate in an khuh hna.
Rawl cu ṭhate in an
fun hna i an pa nih innpa hna hrawmh ding ah a kal pi. Inn tam nawn a lawnh hnu
ah inn rang te pakhat a hmuh ah lung siaherhnak a ngeih i a dir i innka a kingh
colh. Inn ngeitu pa nih innka a vun hun ah a fale pali pawng ah an dir kha a
hmuh. Cun Christmas rawl hrawm ding a phorhmi cu motor in a chuah i a pek hna.
Cu cangka an pa nih, “Zeitin dah nizan kan nu siizung in a tum na hngalh, kan
innchungkhar Christmas i hrawm ding ah zaanriah tlamtling kan ngei lo,” a ti.
Cu cangka cu a fapa nih, “Ka pa ka thlacamnak Pathian nih pei a theih cu,” a ti
colh.
Nelson cu inn a phanh ṭhan tikah rawl cu
an lum ṭhan i an chungkahr te in an dum ṭhan. An pa nih, “Bawipa, lunglawmte in
Christmas na kan hmanter caah ka lawm tuk,” tiah Pathian sin ah lunglawmh nak
bia a chim. Nang teh tukum Christmas ah lunglawmhnak aho dah na hrawmh ve lai?
Pu Din Lian Thlarau thazaang chung in lakmi a si (Amah hnatlaknak in)
Advertisement
EmoticonEmoticon