HLANLIO LAINU DIRHMUN
Hlan lio kan Lainu dirhmun kan zoh tikah ngaihchiat awk ngaingai a rak si. Hlanlio ah cun nu cu minung sawhsawh thilri he i tluk khan in zuarchaw, fahrin piaktu thilri sawhsawh bantuk ah rak ruah a si. Cheu khat pa hna nih cun fanu tampi an ngeih ahcun thirhring chaw tampi kan ngei lai tiah an rak i ruah chih. Zeicahtiah an fanu le kha chaw tampi a man khomi pa ṭiatum lo te a si zong ah, mi pumrua ṭha, midawh, miṭhawng nakin an duh deuh. An fanule nih zei tluk i an duh lomi tlangval a si zong ah chaw tampi a man khawh ahcun ṭap lengmang in an rak kalter hna. A fanu nih ka duh lo tiah a al kho lo.
Nu nih zei nawl (rigths) hmanh an rak ngei lo. Fanu tampi a ngeimi pa nih fapa a ngeih lo ahcun a pa ro cu a nau pa nih a co. A fanu le nih conak nawl an ngei lo. A thihtik ah a inn pi le a thilri vialte a unau pa nih a co i a nupi le a fanu le cu inn lo, thilri lo te in an rak um hna. An pa nun lio ah an rak ṭuan ṭi mi, an rak hmuh ṭimi chawhlawn thilri vialte cu fapa a ngeih lo ahcun mi kut ah a kal dih ko. Ngaihchiat awk ngaingai a rak si.
Nu cu nu le pa nih fimthiamnak ca cawn zong an rak senh hna lo. Nu ca cawn cu a herh lo tiah, nai te kum zabu 20 hnu lei te tiang kha a timi an um rih. (A hlan deuh lio ahcun pa zong ca cawn a rak um lo.)
Hlan lio kan Lainu cu an va le nih chaw tampi in cawkmi thilri bantuk in ruah a si caah an lungtling lo i an um sual ahcun thi deng zong in an rak velh hna. “Nupi velh ṭha, darkhuang cumh ṭha” ti tiang in phungthluk bia an rak ngei. Dawtnak taktak ti mi cu a har ngai. Duhnak ti mi tu cu a um ve ko.
Nu nih lapar an cin i laa ah an ser. An rial, an kah, an zual, an ker i laa a can hnu ah an inn chungkhar thilpuan pawl a tah hna. Nu kip nih laa tongh tham le thiam tah an rak thiam dih. An ngaknut hlan in an nu le nih an rak chimh hna i a thiam kho lo mi cu zeiruaram lo ah chiah a si. Cucaah an thiam hlan lo in an cawng tawn. An nupi le nih an va le hrang ah biarpi he biarte he an tahpiak hna. Angki, puan an tah piak hna.
Puan cu zan vorh puan lawng siloin zudin sa ei tik, bawilaam tik aih ding cawngnak le tawnlo puan zong an rak tahpiak tawn hna. Tawnlo puan cu miza kip nih aih phung le ngeih phung lo khan tluk in an upatmi a si. Bawiphun le safim, khuangcawimi lawng nih an rak i aih khawh mi puan a si. Mah zong cu an nupi le nih rak tah piak a si.
Thilpuan cu nu nih tah le zalh a si caah zan vorh puan zong, chuah vah tik aih ding zong tlam tlingte in a ngeimi innchungkhar cu an hmai a hngal ngaingai. Cucu nu thawng in a si ko nain pa a tam u nih cun mah zong cu ka nupi thawng in an ti duh lo i a hngal lo hrimhrim zong an um fawn.
Hlan lio kan Lainu cu a ngan zong an ngan, a ṭhawn zong an ṭhawng. Innchung rian vialte anmah rian lawng te a si. Ti than, thing phorh, rawl chumh tikhin vialte kha pa rian hrimhrim ah rel a si lo i nu rian lawng te ah chiah a si fawn.
Lo kal zong pa tlukte in an kal ve ṭhiamṭhiam. Nu cu an re a thei taktak ko. Nu nih pa bantuk tein lo rian an ṭuan pinah a hlei in inn lei rian kha ṭuan chih a si fawn.
Nau an i puak pah in lo an thlo, thing an phor, rian vialte hi nuapuak bu in an ṭuan dih. Mah tluk in an re a thei, pa nakin rian phun tam deuh an ṭuan ko nain pa nih cu cu nautat deuh le thangchiat deuh ṭhiamṭhiam a si.
Pa nih mah ticun nautat le a niam deuh i ruah a si caah an mah le an mah hrim hrim zong pa nak in kan niam deuh tiah an i ruat peng. An va le nakin rian tam deuh an ṭuan ko nain an va le tluk kan si, an mah nakin kan rian a tam deuh tiah zeitikhmanh ah an i ruat bal lo.
Cucaah hlan lio kan Lainu cu toidornak lungthin an ngei ngaingai kan ti khawh.
CACC Laica cawnnak LEVEL IIIB
Advertisement
EmoticonEmoticon