(Tuanbia dik) Pu Vawmthu Mawng (1900 – 1966)

(Tuanbia dik) Pu Vawmthu Mawng (1900 – 1966) By Sayaci Dr. Bawi Hu

Pu Vawmthu Mawng cu : Chin mi lakah Chin Special Division, Chin Ziya Vuanci a ṭuan hmasa bik a si (1948 – 52).
Vawmthu Mawng cu 1900 kum April thlachung ah Pu Mawng Thang Pek le Pi Kilaw Man Zawng te nupa nih Mindat peng Vawmthu khua ah an hrin. Chuahpi unau ah pa 4 le nu 2 a ngei.

Vawmthu Mawng cu Kawl sianginn ah ca a cawng i Kawl ca tang 7 a awng. Kawl ca le Kawl holh cu a thiam ngaingai. Amah cu 1917 kum ah ralkap ah a lut i Lieutenant (bohnih) tiang a hmu. A ral a ṭha i raldohnak ah a min a lang. Cun leentecelhnak zongah mi dang nakin a ṭhawng deuh ngaingai. Ralkap cu sau ṭuan loin 1924 kum ah a chuak i Vawmthu khua ah a tlung. Amah nih 1925 kum June 1 ni in an khua ah National sianginn a tuahpi hna i amah nih ca a chimh hna. Cozah rianṭuan dang a kawl len nain a duhmi rian a hmu kho lo. Cozah rian a hmuh khawh lo hnu cun nainganzi leiah luh dingin ruahnak a ngeih caah Democracy uknak ningcang in ram le miphun i uknak thlen awkin aa zuam.

Pu Vawmthu Mawng nih 1934 kum March thlachung ah Mindat peng Matungnu khua ah ‘Lai miphun remnak bu’ (ခ်င္းအမ်ိဳးသားမ်ားစည္းလုံးညီညြတ္ေရးအဖြဲ႕) timi bu a dirh. 1934 kum September 24 ni ah Niwazi (ေန၀ရဲ) khua ah meeting a tuahpi hna. 1939 kum July 28 ni ah ‘Lai tlang Remnak Bu’ (ခ်င္းေတာင္ညီညြတ္ေရးအဖြဲ႕) tiah ‘Lai miphun remnak bu’ min cu a hun thlen. Mah ni hramthawk cun Kawl ram Luatnak hmuh khawhnak hnga ti in Mirang uknak dotu ‘Dubama Asi Azung’ (ဒို႔ဗမာအစည္းအရုံး) bu he pehtlaihnak a tuah i rian an ṭuanṭi. Mirang cozah nih Kawl le tlangcung ummi pawl thleidannak a ngeimi uknak cungah lungtlinlonak a ngei. Cucaah amah hruainak in Mirang Governor sinah Laimi nawlngeih khawhnak ding caah thil phun kua ca in an hal.

Thil phun kua an halnak ca cu Mirang Governor nih a rak hmuh Magwe i Mangki sinah ca a kuat. Magwe Mangki nih Falam Zipeng Mr. Naylor le Kanpetlet Vuanthok G. Po Ngiu sinah Kanpetlet ah 1940 kum February 20 ni i ton dingin ca a pek hna. Mah an meeting ah cun Pu Vawmthu Mawng le a hawile chim lo Lai mi sawhsawh minung 1000 leng an chuak i Mirang cozah nih, ‘Nan halmi cu kan in pe hna lai lo, ‘tiah an ti hna caah meeting a kaimi vialte cu an thin a hung i, “Kan ing kho lo, kan ing kho lo,” tiah an au. Cucaah cozah upa vialte cu an thin a phang i Saw khua ah an le. Mirang cozah nih 1940 kum March 24 ni ah Pu Vawmthu Mawng le a hawile 9 hna cu an tlaih hna i Pu Vawmthu Mawng cu Katha thong ah an thlak. Mah Katha thong a tlak lioah Japan nih Katha thonginn cu bomb a thlak ruangah thongtla vialte cu an chuak dih i Pu Vawmthu Mawng zong a chuak ve i Lai ram ah a tlung.

Pu Vawmthu Mawng nih Mirang cozah cu Kawl le Tlangcung thleidannak ngeiin uk ningcang cu a duh lonak a phunphun in a tawlrel ruangah Mirang nih, “Vawmthu Mawng a nung in a tlai khawhmi cu laksawng ah K. 5000/- le a thi in a ruak a hmutu cu K. 1000/- kan in pek hna lai,” tiah Kawl ramchung pumpi thawng an thanh. Pu Vawmthu Mawng cu an tlaih khawh lo ruangah an khua i a inn le a ngeihmi thilri vialte mei in an khangh dih. Pu Vawmthu Mawng cu an tlaih i thong lawngte voi 23 an thlak.

Phah-Sah-Ba-Lah (ဖဆပလ) hruainak in Kawl le Lai remnak tuahtu Commission an tuah i Chaklei Laitlang ṭuanvo latu dingah U Ba Saing le Pu Vawmthu Mawng ṭuanvo an pek hna i 1947 kum February 4 ni in 24 ni tiang Tedim, Falam, Hakha le khua cheu khat an tlawng lengmang. Thlanglei Lai ram ṭuanvo latu ah Thakhin Aung Min, U Mawng Ga Lay, U Mawng Kyi le Bo San Htun an kal. 1947 kum February 2 ni ah Mindat khua ah meeting an tuah i Kawl le Lai remnak ca i mi zapi pumhnak cu 1947 kum March 4 ni in 6 ni tiang Htilin khua ah tuah dingin biachahnak an tuah.

An ni khiahmi caan cu a hung phan i Buchoke Aung San cu amah a kal thiam lo ruangah amah aiawh in Deduke U Ba Cho hruaitu ah a thim i Thakhin Wa Tin, U Ba Saing le U Mawng Ka Lay le Thlanglei Lai ram aiawh in Pu Vawmthu Mawng le Chaklei Lai ram in Zokhua mi Pu Za Hu. ( A.T.M, B.G.M, M.B.E) an thim hna. Buchoke Aung San i kuatmi capar cu Vuanzi Deduke U Ba Cho nih a rel. U Ba Saing. Pu Vawmthu Mawng le Pu Za Hu hna zong nih remnak bia an chim cio. Mah hnu cun Deduke U Ba Cho, Pu Vawmthu Mawng le Pu Za Hu hna nih Kawl le Lai remnak caah philhlonak rolung an phun.

1948 kum January 4 ni Kawl ram luatnak hmuh ni thawk in Lai mi pawl nih rak ngeih khawh bal lomi ‘Chin Special Division, Chin Affairs Council, Chin Zeya Vuanci, Chin Zeya Ṭhanah in Lai ram dothlattu Commission ngeih awkin bia an chuah. Mah an biachuahmi chung ah cun-

1. Hruaitu – Pu Vawmthu Mawng.
2. Chungṭuan - Sithu U Thein Mawng (A.T.M) Lai ram Mangki le
3. Chungtel - U Soe Win hna an si.

Lai ram Dothlattu Commission nih Lai mi sinah voi hra tiang bia i ruahṭinak an ngei. A hnu bik 1948 kum February ni 19 in ni 22 tiang Falam khua ah Lai mi 5000 leng a peng kip palai pawl pumhkhawmhnak an ngei i Pu Vawmthu Mawng nih a hruai hna. ‘Lai ram cu Ram-uk bawi nih uk ti loin Democracy ukning in kan i uk cang lai,’ tiah Pu Thawng Za Khup nih biatung a dirh i Falam peng in Pu Sum Mang le Kanpetlet peng in Pu Thang Mawng nih an dirkamh. Mah ni cu 1948 kum February 20 ni a si i mah ni thawk cun February 20 ni cu ‘Lai Phunpi Ni’ (csif;trsdK;om;aeU) tiah fehter a si i nihin tiang le vawlei a hmunh chung, Lai mi vialte sal kuttang in kan luat ni a si, ti cu a hmun zungzal ko lai.
Kawl ram Luatnak a hmuh hnu a hmasa bik Chin Special Division uktu ah Chin Affairs Council nih Pu Vawmthu Mawng cu Chin Zeya Vuanci ah an thim i amah cu Vuanci a ṭuan hmasa bik a si.
1948 – 1952 kumchung a hmasa bik Chin Zeya Council chungtel hna cu-

1. Thiri Pianchi Pu Lian Ṭhum (Hakha) Tabapaṭih.
2. Thadu Mahatayah situ Pu Vawmthu Mawng (Kanpetlet) Chin Zeya Vuanci.
3. Thadu Mahatayah Situ Capt. Mang Tung Ngun (Tedim) Chungṭuan.
4. Wunna Kyaw Htin Pu Hlur Hmung (Falam) Pyituh Hlutdaw Amat,
5. Thiri Pianchi Pu That Hlaing (Paletwa) Pyituh Hlutdaw Amat le
6. Thiri Pianchi Pu Sang Ning (Matupi) Pyituh Hlutdaw Amat hna an si.

Pu Vawmthu Mawng cu Ram le miphun caah a phunphun in harnak a tuarmi a si caah a tanglei minṭhatnak hi an pek. Mah hna cu –

1. Thadu Mahatayah Situ (သတိုးမဟာသရစည္သူ) le
2. Luatlatzi Mawngunwin 1stClass (လြတ္လပ္ေရးေမာ္ကြင္း၀င္ပထမ) hna an si.

Pu Vawmthu Mawng cu 1966 kum February 20 ni, a voi 18nak Lai Phunpi Ni puai cu Mindat khua ah Sunglawi ngaiin tuah a si i mah puai ah cun sawm a si caah a kal i a kirlei February 23 ni ah aa citmi mawṭawka cu lamthlang ah a tla sual i mah ni, amah kum 66 ah a thi. A thih ah fapa 6 le fanu 5 a rohtak hna.
cc :     Lai ram mi langsar pawl le Pathian kutneh mawizia page 87 – 98.
Hi tuanbia hi Sayaci Dr. Bawi Hu nih Chin Hmaisuang hna tuanbia a ttialmi Section 1, kong 19 nak ca ning in kan tar chinmi a si. 
Cattialtu Sayaci Dr. Bawi Hu Tuanbia hika ahhin rel khawh a si.

Advertisement