LAIRAMAH HMASA BIK THILTHARHNA (Rev. Lai Ram Hu)

LAIRAMAH HMASA BIK THILTHARHNA Rev. Lai Ram Hu

(Hi ca hi 2008 lio i rak chuah cangmi a si i theihtlei ah rel a duhmi kan um sual ah tiah ka hun tar tthanmia si.)

Hakha Tipil Khrihfabu kum 100 Tlinnak niceuthar dawhte kan mitnih a hmuh khawh caah lawmhnak a tling khun. Kan i lawm cio, kan i lawm taktak ko.

Kum 100 tlinnak philh lonak le cinken awkah tuah dingmi cauk zong hi a pacang ngai ding a si tiah ka ruah caah, “AMERICAN BAPTIST MISSION NIH LAIRAM AH RIAN AN ṬUANNAK KONG UK KHATMAK” chungin thil thar (Hmasabik) tiin ka hmuhmi biapi tete kha ka langhter. Ka thimmi cu Dal 24 a si. Laimi zumtu dihlak nih hngalh awk ah a ṭha ko tiah ka thimmi an si.

1. Hmasa bik Siangbawite (Hakha) an phanh caan

Carsonte hi March 11, 1899 ni ah Falam an phan. Falam ah Zipeng bawipa nih an inn ah a tlunter hna i lumsa ngai in a zohkhenh hna. Hakha cu March 15,1899 ni ah an phan i, Rawn lai umnak Tayet khua in an pawhnak zarh ruk hnuah a si. Lairam thawngṭha a phanh ni cu a si.

2. Lairam ah Siangbawite he a phanmi hna

Laura siangbawinu nih a ṭialmi ah cun, lairam kan hung kai hmasa bik ah hin bawmtu minung panga nih an kan zulh, tiah a ti. Cu hna cu:-

1. Karen saya San Win (hmasa bik Karen saya)

2. Francis (India Tamil mi a si.R.C a si i, Hakha an phanh thla hnih May ah a thi)

3. Franis nupi (Kawlnu a si i a min a ṭial lo)

4. Tayet khua in Rawn Lai nungak 2an si a ti.

Karen Saya San Win hi lairam a phan hmasa bik siang ca chim le phungchim saya a kemhmi a si. Bassein khua pawng khuate ah a chuah i, Basein ah tang li a awng. 1900-09 tiang mission sianginn ah cachim a ṭuan i, phungchim rian zong a kemh. Hakha ah a um i, khonh ni Bassein ah a tlung i, Taifot zawtnak in April 1909 ah a thi.

3. Lairam ah hmasa bik Chin Misson an feher

Carson bawipa nih laitlang an phanh in a thin a phangmi cu Chin Mission hi Board nih an kan bawm lo, ti hi a si. Cucu a fian nakhnga Siangbawipa nih May 27, 1899 ah Dr. H.C Mabie sinah ca a kuat. Laitlangah Chin Mission rian hi kan ṭuan taktak lai maw, ṭuan taktak lo, cucu bia pakhat tein hung ka let. Kan ṭuan ko lai na a ti ahcun e ti law, Kan ṭuan lo dingah cun Ai rak ti. Cucu thirhri in ka khat tein hung ka let a ti. A bialehnak cu E ti a si i Chin Mission cu fehte a si.

4. Lairam ah hmasa bik Mission Khampawng (Biaknak vawlei)

Hakha vuanthawk inn an hlanmi kha a lak (man lo) in a si rua lai, an ti i thla khat ah Rs. 25 an lak hna tikah an lung a ṭha lo. Cu lengah Chin Bission cu fehter a si cang caah an phak le cangka ti awk in vawlei cawk ding kha an ruat. An hlat tikah eka 30 cawk ding kha an hmuh. Hi ram cu Lian Mo ram a si i Rs. 50 in an cawk. Siangbawite 1966 i an kir ah khan Hakha Baptist Association ah an pek tak hna.

5. Lairam ah hmasa bik mission inn (Sianginn le bangla)

Innsak hi a herh tuk an ti i, an um zarh tlawmpal ah inn sak cu an timh colh. Laimi Thingah thiam an um lo caah Korkha an lak hna minung palinih ni 20 an ah i (6×1/2×12) kha vampang caah tlap 200 an ah. An sakmi inn hna cu, mission sianginn bangla (Siangbawite umnak inn), zunput le Karen Saya San win umnak inn hmete hna an si. Mission Sianginn cu May 1900 ah an lim. Khan li a ngei, khan khat ah 111/3×17 kau. Siangbawi umnak bangla zong May 1901 ah an lim. Phaisa cu:-

Mission Komiṭi nih Rs. 5000/-

Pegu siangbawi, Miss. Ella F. Mc Alliste nih Rs. 2157/-

Mission Board nih Rs. 900/-

6. Lairam ah hmasa bik mission sianginn

Carson nih Rawn laimi sin i a rianṭuan ciami lohma kha a cuanh ṭhan tikah fimnak hi thawngṭha karhnak le miphun ṭhanchonnak ah a herh bik le hma a kalnak bik ah mission sianginn kha a sak i, May 1900 ah a lim. A lim khap bak ah hngak ti loin June 1900 ah sianginn cu a hun colh. Cucu lairam um lai miphun caah hmasa bik kaumi fimnak meiceu cu a si. Hakha khua ah a si i cachim saya cu Karen saya San Win a si. Siangbawi nu zong nih hin manh lo ngai in a bawmh ve. Carson bawinu nih 1901 i report a pekning ah cun siangakchia hi pa 8 hrawng si dawh a si.

7. Lairam ah hmasa bik siibawi siangbawi

Carson bawipa nih Board sinah ca a kuatmi cu siibawi Siangbawi kan herh hrim ko ti hi a si. Hi caan ah laimi nih an zawt tik paoh ah an doctor cu khuachia a si ko kha a hmuh ruangah a si. Damnak hmuhnak caah khuachia sin raithawi kha a si. Hakha in khan kua a hlatnak hmun in Dr. East nih Hakha khua cu a hei hmuh. Cucu hmasa bik a si. Hmanbiluu in Hakha khua cu a hei bih i, “Siangbawi inn hmete cu tlang tangah Chokhlei sen le thingkung hring lakah a dir cicial ko kha ka hei hmuh, Cu nih cun ka lung tor kha a renter deuh” a ti. Arthur Carson nih Hakha in khan hnih thum a hlatnak tlangharawn in a don i, an i hmuh bak ah cun an lunglawmnak maw, an lilennak maw a zual tuk i an i kup i an ṭap. An tlun pah ah Carson bawipa nih, “lung thlengmi an um rih lo iai!” tiah a ti.

8. Lairam ah hmasa bik zumtu Khrihfa hna

Saya Shwe Zan nih Dr. East sinah Khuasak in July 25,1904 niah hitihin ca a kuat. Pau Suan le Thuam Hang (khuabawi) hna nih Jesuh nih sualnak in nunnak chungah a kan khamh khawh ti kha an zumh. Hei ra zau law, Khrih ruangah zeitluk in dik na vaa lawmh hnag! Ti hi a tawinak cun a si.

Cu bantuk thawngṭha cu East nih a theih tikah aa lawmhnak kha a sum in aa sum hrimhrim lo. A ni, a ṭap. Dr. East nih, “Sunparnak Siangpahrang hi Laitlang ah a lut hrimhrim cang. Tuukhal nih a thlaumi tuu kha a hung tlunpi hna tikah vancung darkhing cu an i tum! a ti(Bur. Ms.P71)

Chaklei Laimi lakah tipil a ing hmasa bik hna cu Tedim peng Siyinmi an si. Dr. East nih tipilnak cu a pek hna i, Tipil a pek ni cu May 1905 ah a si. Khuasak Pokloy tiva ah a si. Tipil a ingmi hmasa bik hna cu:- Pau Suan (27) le a nupi Kham Ciang , Thuam Hang (66) le a nu pi Dim Khaw Cing(30) an si.

9. Lairam ah hmasa bik mission sii-inn

Lairam ah mission sii inn ngeih ding hi a herh tuk ti kha Dr. East nih hin a rak i zuam zungzalmi a si. Cu saduhthah cu 1906 ah a tlin khawh nak hnga hram a thawk. Missouri peng St. Louis khua Khrihfa hawikom hna nih an bawmhnak tangka in a sakmi a si. Amin ah Emily Tyzzer Memorial Hospital (Emili Taizar Philhlonak Sii-inn) ti a si. Atu HBA zung (East Bungalaw) he kemh in caan khat ah an sak. 1908 kum ṭhal lawngah tlamtling tein an hman khawh. A hmetngan kong hngalhnak a um lo nain 40'x45' hrawng seseh law a dawh. 1947 Japan ral ah bom nih a puah i a rawk.

10. Lairam ah hmasa bik Khrihfabu

Lairam ah hmasa bik Khrihfabu cu Khuasak a si i, thawk ni cu February 17,1906 (Zarhte) ni ah a si. Khrihfabu a thawktu hna cu minung 11 an si.

- Pau Suan le a nupi Kham Ciang

- Thuam Hang le a nupi Dim Khaw Ciang

- Tum Lian le a nupi

- Sou Tun, Toum Tiang, Nau Neh, Lam Shwin le a nu pi hna an si.

An Pastor cu Saya Shwe Zan a si i Khrihfa upa ah Pau Suan le Thuam Hang an si.

11. Lairam ah hmasa bik nu siangngakchia

Hlan laimi nih nu hi hi lothlotu, innhngaktu le inn rianṭuantu lawngah rak ruah a si. Cu caah Siangbawite nih mission sianginn an tuah ah hin nu hi pakhat hmanh an rak kai lo. Carson bawinu nih Lainu hi fimnak catang an ngeih lawngah thil ṭha vialte i ṭhanchonak an hmuh lai, tiah a ruah i, Nu sianginn kai ter ding hi fakpi inn aa zuam. Cu thawng cun nu hi 1906 ah pakhat sianginn a kai, 1907 ah 7, 1908 ah 12 le ah cun 20 an si. Siangakchia pawl an min bel hngalh khawh a si lo.

12. Lairam ah hmasa bik pumhnak civui

Lairam ah hmasa bik civui pumh ṭinak hi March 23,24-1907 ah Hakha khua ah tuah a si. Civui a rami minung hna cu:-

Laizo in 2 (khan 33 hlat) Lai (inntek) 8

(Zokhua le Hakha)

Lumbang in 4(khan 52 hlat) Siangbawite 5

Khuasak in 11 (khan 100 hlat) Siangbawite 1

Tedim, Tonzang in 4 (khan 120 a hlat) Karem Saya 6

(Note: Khual danghnak ah a dihmi, caw 2, facang pawng 36 chiti pawng 15, ar 8, arti 36), ke lawngte in kal a si.

13. Lairam ah hmasa bik Association an dirh

Civui pumhnak a dih thaizing (March 25,1907 (cawn nikhat) zinglei suimilam 11:00am ah phungning tein hmasa bik Chin Hills Baptist Association cu an dirh. Hruaitu ding Lutlai pawl zong an thim hna. Holh fianternak caah lai holh (Hakha) Tashon holh, Siyin holh, Kamhau holh le kawl holh in an leh hna. Cucu pakhat hmanh bia theih lo um hlah seh ti an duh caah a si. Association thar tuahnak ah hin Sagaing siangbawi Dr. Sutherlan zong nih a telpi hna. Zan ah Carson bawipa nih Association cangthim lamkaltu 5:20 kha phung a chim. Hakha holh le Kawl holh in a chim Shwe Zan nih Siyain holh in a leh i, Pu Ko nih Kamhau holh in a leh.

March 24, 1907 (Zarhpi ni) pumh dih in Association kong cu meṭing an tuah chung cang. Dr East nih a hruai hna. Association a dirh tu hna hi miphun li an si i, miphun sinak ah cun aa ral ngaingaimi an si nain nihin ni ah cun Khrih min in “PHUN THLEIDANNAK VAMPANG CU A CIM CANG” an ti i hi Association an tuahnak ah hin Thlarau nih a kan hruai hrimhrim ti cu zumh lo awk a um hrim lo a si ko” tiah Carson nih a ṭial.

(Note:- Meṭing a kai mi 24 Siangbawite 5 Karen Sayate 6, Khrihfa sawhsawh 15, Tipil ing ding 7 Siangbawi nupi 1).

14. Lairam ah hmasa bik Ordination peknak cu March 28,1907 ( caw ni li) ni ah an tuah i Ordination an pekmi hna cu Karen Sayate minung 3 an si. Ordination peknak i kutchuangtu hna ah kan Siangbawi Carson le Dr. East: Sagaing in siangbawi Dr. Sutherland hna an si.

1. Saya San Win - (Hakha siang cachim)

2. Saya Pu Ko - (Tonzang siang cachim)

3. Saya Shwe Zan - (Khuasak siang cachim)

Ṭha tein biahalnak camipuai an tuah hna i an awn caah pek tlak tiah pekmi hna an si. Hi tan ah hin Dr. Sutherland nih Ordination pekmi hna caah bia a chim, Rev. Carson nih zapi kha bia a cah hna i Dr. East nih phungchimnak a ngei.

Pu Ko nih Kamhau holh in, Swezan nih Siyin holh in, San Win nih Lai holh in lawmhnak bia an chim.

15. Lairam ah hmasa bik laimi phungchim saya a ṭuanmi hna

1907 dongh ah hin Lairam ah Khrihfa rianṭuantu phungchim saya hna cu Siangbawi 4 Karen Sayate 5, Rawn Lai (Asho)1, Laimi Saya 4 an si. A sinain Laimi Saya pa 4 hna kong hi chim a um tuk lo nain Hakha saya Isaac nih a chimning a hman ahcun:

Thuam Hang - Khuasak -Tedim peng
Pau Suan - Khuasak - Tedim peng
Thang Tsin - Lumbang - Falam peng
Sui Hleng - Thangtlang - Falam (Khualsim)
Shia Khaw - Hakha hna an si a ti.

Pau Suam le Thuam Hang cu Siyin mi an si. Thang Tsin cu Zangiat mi a si. Sui Hleng cu Khualsim mi a si i Shia Khaw cu Hakha mi a si. Sui Hleng cu Mission nih Siang cachim le phungchimtu si khawh dingah cawnnak (Tindan) kai awkah an thlah i a kir ti lo, tiah an ti. A kong hngalh khawh a si ti lo. A dang pali hna hi cu ṭha tein Khrihfa rianṭuannak ah hman an si.

16. Lairam ah hmasa bik kutsih ṭhitumnak

Hi kong hi Dr. Hjalmar East nih hitihin a ṭial (East cakuat 27-9-1910)

Kutsihnak tuahtu - Zan Lien le Klung Nuam (Cung Nuam)

Ni caan - May 23,1910

A hmun - Siangbawinu inn (Hakha)

An caah rawldanghnak hmete kan tuahpiak hna. Siangbawinu te nih changreu tlawmpal an tuahpiak i lakphakti aa dawhnak ah kei nih cawhnuk ka cawkpiak hna.

Tlangval nih tawhrolh raang a saumi le Angki leng a raangmi aa aih. A sam kha aa met i sakuh hmul bantukin a dir dih, nain a thianghlim ngaingai. Ngaknu cu Lai hni dawhte a fenh i khuk tiang a si. Laiphung ningin a hni cu a hmailei aa thlek i a venh tikah aa tonh. Angki raang kha a aih ve i hngawng sau, ban sau a si. Anmah kut tein an i tahmi thuam an si. Angki cu an hnakruh donghnak tiang a phan i cu tang cu thlitu le meiceu nih a huh hna. (ABM. Lairam rianṭuannak uk khatnak. Cahmai.341,342)

17. Lairam ah hmasa bik mission pumpalulh team

Hakha in ni khat lamkal Vathai (pioneer) bangla an riahnak in Dr. East nih hitihin ca a ṭial. Thil thar pakhat tuah ka zal i ka hngalh tiangah cun hi thil hi thil thar ngaingai ahohmanh tuah bal rih lomi a si. Hakha tlang 13 kha, hnam ngei tiah an timi hna, Siyin mi hna he hmunkhat ah rawlei ṭi awk le hmunkhat ah um ṭi awk ah an rak duh lo. Cu bantuk ruahnak a um lio ah hmunkhat i lete celh ṭi awkah chaklei ah kaa kalpi hna. Phun khat ke phun khat caah tlangval hna kha an ral hna lakah khan ka ratpi hna.

Hakha tlangval 13 kaa kalpimi hna cu:-

Sonnie Newlang - Samuel Newlang
Pe Gyi - (Karen Saya)
Kyi Gaing - (Ci Khaing Saya)
Shia Khaw - Hakha
Tum Thuan - Hakha
Chai Thuan - Hakha
Rel Lian - Laizo
Lian Bia - Lungbang
Vom Hrang - Hualngo
Sun Vum - Hngalh lo
Chia Khawm - Hakha
Dum Luai - Hniarlawn
Mang Duai - Hakha

March 14, 1910 Tedim, zinglei suimilam 9 ah an phan i zanlei ah ralkap he pumpalulh cu an chuih i Hakha nih an tei hna. A thaizing ah India palek pawl he kan chuih ṭhan i an pumrua a ngan tuktuk na in an i tluk. March 16, 1910 ah Khuasak ah kan kir i civui chung Khuasak ah kan caam, Khuasak civui hi a voi linak a si i March 18-20,1910.

18. Lairam ah hmasa bik Baibol Sianginn

Chin Hills Baptist Association civuipi Hakha i an tuah tan (March 1928) ah hin Laitlang ah Baibal sianginn tuah dingmi kong hi an rak suai. An ceih chihmi cu: Baibal sianginn cu Hakha ah tuah siseh.

Kum khat ah thla 5 (asiloah) thla 6 cawnpiak siseh.

Kum li chung cawnpiak si hna seh.

Peng peng thum (Tedim, Hakha, Falam) chungah minung 12 kai hna seh.

Khua an khan bantukin May 1, 1928 ah Hakha ah hmasa bik Baibol sinaginn cu an rak thawk.

September 15,1928 tiang an kai. Siangngakchia hna cu Tedim 4, Falam 4 le Hakha -5 an si. Hakha pakhat hi thlangleimi a si caah a hlei in ruahpiakmi a si.

19. Lairam ah hmasa bik Baibol sianginn a awngmi hna

Hiti kan ti tikah Hakha Baibol sianginn in a awngmi hna kha chim duhmi a si.

1. Kham Kham - Tedim

2. On Khaw Kai - Tedim

3. Thang Lian - Tedim

4. Kim Ngin - Tedim

5. Than Kap - Falam

6. Lal Hrim - Falam

7. Ca Luai - Falam

8. Lian Thang - Falam

9. Than Sai - Hakha

10. Leng Kham - Hakha

11. That Nawn - Hakha

12. Tai Tam - Hakha

13. Za Ling - Hakha

20. Lairam ah hmasa bik siangbawite tuahmi thil thar tete:

Strait siangbawipa nih laimi nih anmah tein dir i, duhdim tein an nun khawh nakhnga caah tiin thil thar tete a hneksakmi, a tuahmi cu a tanglei bantuk hi an si.

1928 - Tuu zuat a thawk
1928 - Baibol Sianginn ah Chatpiat ser a cawnpiak hna.
1929 - Lakphak ci a tlunpi i a phawt hna.
1931 - Lei facang cinning a forh hna i an thawk.
1931 - Baibol Siangakchia kha thingah a chimh.
1931 - Laimi Khrihfa nih cawhnuk din an thawk. (thiam)
1931 - Kawfi cin an thawk.
1934 - Thanthling (Fuhang in) ser an thiam.
1934 - Laithlang ah thing ahnak hluah pa 3 a um.
1934 - Hla cauk an rel thiam cang.
1934 - Iowa fangvoi ci, lapar ci, Califonia ( Kalifawnia) Meitei, phaizawng ci, mirang khuhlu, thingkung phun 3 ci, tihang ci, lingmaw kung 12 laitlang ah a phorh.

21. Lairam ah hmasa bik Nu khual an tlawng (Civui)

Hlan deuh ahcun khual tlawn tikah ke bak in kal a hau. Phun khat le phun khat rak i ral a si. Cucaah nu cu lo thlo rua, inn rianṭuan rua, menmen ah ruah a si i khualtlawn phun ah rak ruah hrimhrim an rak si bal lo.

1930 March, Khuasak civui i Hakha nu pawl an kalnak kong kha strait bawipa nih theihtlei ngai le hngalh phu ngaiin a ṭial.

“Hakha lei kam ah ka lung aa lawmh ngaingai. Keimah fial hmanh hau loin kan nu le pa 6 hna cu ni ruk lamkal civui ah an i thawh. Hihi Nu civui kal hmasa bik cu an si. Tedim pawl tam uak nih Hakha nu pawl cu an upat tuk hna, an dawt tuk hna, an tlaihchan tuk hna i, hmaizahnak tampi an pek ka hmu tikah hin ka lung a ka suk tuk. Hi miphun pahinh hna hi hlan kum 50 lioah khan cun ral bak an si rih nain, nihin ah cun an i daw tuk cang. Hi nu hna hi hmai bik te ah ṭhutnak an tuahpiak hna i pumh chung vialte a hlei in an dawt hna. Thawngṭha hmual cu a lang taktak. (ABM: Lairam rianṭuannak. Uk khatnak, cahmai, 575, 576)

22. Lairam ah Hmasa bik Biakam Thar cauk

Kamhau (Tedim) Biakam Thar baibal cauk cu March 1932 ah a chuak. American Mission Press, Rangoon nih an nam. Cope bawipa, Tedim sayate le Karen sayate i bawm in an lehmi a si. Laimi nih Pathian bia kha kan kut cung te ah kan i put khawh hmasa bik a si.
Lai Baibal ca (N.T) chin: Lai Dialect cu 1940 ah an lim i 1940 ah B.F.B.S nih uk 5000 an chuah.

23. Lairam ah hmasa bik Hlapi (Anthem)

Strait bawipa nih khua min a langhter lo. A tanglei bantuk in a ṭial. 1936 January thawkka ah Hakha peng Khrihfabu 34 kha an i pum i minung 7000 nak tam an si. Hi tan ah hin Laimi nih Handle phuahmi hlapi “MESSIAH” timi hla an rak remh hmasa bik a si. Laimi hla lei an ṭhanchonak a langhnak a si i Civui tuahnak khua nih khan awli tling in an sak. Lushai in an lakmi a si i Lai hla in a leh ṭhanmi a si. Zoh lo bak in minit15 bakte an rau. Tam deuh cu Laica thiam lo an si. An sakmi cu Laimi nih hla lei ah zeidah an lawhte lai ti langhter tu a si.

24. Lairam ah a hmasa bik Piano

Tedim peng a zohtu Vuanthawk cu Norman Kelly a si. Nelson siangbawite he hawikom ṭha ngai an si. Tedim ah piano pakhat tal cawk khawh siseh law timi kha Vuanthawk bawipa le Nelson te rawl ei ṭinak an ngeih lioah Philed nih a chim tikah cawk zokzok dingah an duh. Nelson bawipa nih Board sinah Piano cawknak tangka a hal colh. Vuanthawk bawipa Norman nih a phorhnak vialte liam ding a si. 1940 ah Nelson bawipa nih Rangoon ah a cawk colh i, Kuli 30 nih Kalewa ah an va don. June 12,1940 ni cu lairam ah hmasa bik Piano kan ngeih ni a si. An tinhmi cu hi nih hin “laimi hlasak thiamtertu a si” tihi an saduhthah cu a si.

000

(HBC Kum za tlinnak (1908-2008) an tuanbia chung cahmai 252 - 262) tiang lak chommi a si)