Hma Banhmi kut In A Ka Hruai
“Atuu kha a min in a auh hna i leng ah a hruai hna” (Johan 10:3)
Pathian nih kan min cio theng tein a kan auh hi ruah tikah a sunglawi tuk. Tukhal ṭha Amah hrimhrim nih thirkhenhnak hmapel a ummi a kut in thi thehmi lam zawh in thlarau thluachuah ramhring hmun ah a kan hruai ti hi zeitluk hna ngamnak dah a si.
Ruth Gibbs Zwall nih a ṭialmi cauk chungin “Thaizing tahchunhnak” tiah a phuan mi te hi zoh hnik hmanh u sih. Thazaang la cio hna u sih. A ṭialmi ah:
“Tlang khi ka zoh. Bawipa, kei caah cun a har tuk ka kai kho lai lo” ka ti. Bawipa nih dinte in “ka kut hi i tlaih tuah, na ṭhawnnak ka si lai” a ka ti.
Lam ka hmuh. “Bawipa, a sau tuk i a har tuk” ka ti. Bawipa nih “Ka dawtnak i lak tuah, na ke a vengtu ka si lai” a ka ti.
Van ka zoh. “Bawipa, ni a tla cang, muih hram aa thawk cang” ka ti. Bawipa nih “Ka bia mei-inn i lak law an ceuh ko lai” a ka ti.
Bawipa he kan kalṭi. Lam cu a bi i a cho tuk, asinain lam cu a ceu ko. Hling ka pah tikah keimah a ka tongh hlan ah Amah kut a tongh hmasa. Kan lam a har tikah a dawtnak nih ka ke a tlukrilh nakhnga lo a ka ven peng ti ka hngalh.
Cun ka ba tuk, ka kal kho ti lo ka ti. Bawipa nih “zaan a dih cang, van lei zoh tuah ka fa dawt” a ka ti. Ka zoh i khua a dei cang kha ka hmuh. Tlang tang ah ramhring nelrawnpi ka hmuh. “Bawipa a tu cu keimah lawng ka kal kho cang” ka ti.
Cun Bawipa cu ṭhate in ka vun zoh i “Bawipa, hmabanhnak lawngte na si ṭung, na kut ah thi a chuak. Na ke aa hliam khuai dih. Hihi keimah caah a si maw? ka ti. Bawipa nih “Lunglawmte in nangmah caah ka tuahmi a si” a ka ti.
Cun a kehram ah ka bawk. “Bawipa, ka hruai rih ko sawh, na caah cun lam a sau ti a um lo i hor thuk ti zong a um lo. Ka sin i na um paoh ahcun khuazei hmanh ah nangmah he cun ka kal kho lai” tiah ka ṭahbu in ka chimh.
A tu cu amah he hmuhkhat te ah kan kalṭi cang. Atu lawng a si lo, zungzal in zungzal tiang….
Pu Din Lian nih Thlarau Thazaang, 2015 lio i a rak chuahmi chung in tar ṭhanmi a si.
A cauk tling te rel na duh ahcun a tang i link hi install tuah law uk 1 nak in uk 4 nak tiang rel khawh a si.
Download tuahnak : Hika Link ahhin kal in Download khawh a si.
EmoticonEmoticon