B .C. 3666 Colonel Van Kulh @ Zeya Kyaw Htin, BGM, & Bar (Rtd.)
Colonel Van Kulh cu Chin mi lakah minlangmi pakhat a si ve. Amah cu Thantlang peng Tikhuangtum khuabawi Pu Tai Ṭhio le Pi Sun Dim nih 1925 kum October 1 ni ah an hrin i a phun cu Hlawnceu chung a si.
A nu Pi Sun Dim zong cu Tlangpi khuabawi Hlawnching chung Pu Ral Chum fanu a si. A pa cu mi rianṭuan tuk a si caah rawl tampi a ngei i bawi le laam le zudin sa-ei cu mah khuachung lawng si loin khua pangchem vialte zong puai ah cun a rak kawh tawn hna.
A pa cu mi lianngan a rak si caah a min zong an peng le an tlang ah cun a rak thang ngaingai. A nu cu Lailei rian fak tuk in a ṭuannak ah a titsa le a thazaang nih a rak celh lo ruangah amah kum 30 hrawng a si ah a rak thih tak hna.
A chuah pimi hna cu a farle ah nu pali an si i amah lawng ṭa upa bik a si. A nu a thih hnu cun a pa nih nupi dang a run ṭhit ṭhan i pa 6 le nu 2 a run hrin ṭhan hna.
Van Kulh cu 1934 kum in Tlangpi khua ah Lai cacawn ah an rak kalter i a pu le a pi sinah a rak um i tang khat in a rak cawng i 1938 kumah Lai ca tang li a rak awng i Scholarship a rak hmuh caah Cozah nih Falam khua ah Mirang ca cawn dingin an thim caah Falam ah cun ca cu a rak cawng i 1942 kum ah Mirang ca tang sarih a rak awng. Vawleicung Ralpi Pahnihnak (Japan ral) a tlung i Kawl ram pumpi sianginn an khar dih caah a sianginn kai cu a ngol.
Van Kulh cu a nu le a pa mirum an rak si ko na cun Lai ca a cawn thawk in Mirang ca a cawn tiangah kedan aa danh bal lo. Tawhrawlh tawi le angki ban tawite he sianginn a rak kai tawn i puanrang lamkalhte le sakhiphaw aa phah i thing chantlingte he a rak it tawn.
Amah cu a hmet liote in kuak le zu a tawng bal lo i thinhun zong a ngei lo. Amah cu mi leklak, mi tawzaang a rak si i mi ziarngeih le nahchuah zong a ngei lo. Mi tluangtlam, mi ṭha a si i ho he zong aa kom khomi a si. Cu lengah amah cu mi nunsiang a rak si fawn.
Van Kulh cu a ngakchiat liote in rangcit hi a rak uar ngaimi a si. Ni khat cu Manipurlei nih rang an rak zuar i a pa nih ranglate aa dawh ngaimi tangka Rs.14/- in a rak cawkpiak i mah a rang cu a rak i cit tawn.
A hmet lio i rang cit a rak uar bantukte in ralbawi a ṭuan hnu, Naingandaw Council a si hnupi tiang zong, Hakha pengchung khual a tlawn ah rangcung lawngte cun a kal tawn.
Van Kulh pa cu Khualhring tlang ah meithal paak a rak ngei hmasa bik a si caah ngakchiat liote in meithal cu a duh tawkin a hmangmi a si, vuatana le a ngeih fawn caah hawile he ram an vai lengmang.
Ralbawi a ṭuan hnupi tiang ram cu a vai lengmang i amah tawkte cun sa zong a kap ve. Sakhi 7, zatum 3, sathar 2, vom 2, ngal 1, nengpi 1, tatare 1 le ngaurual a kah hnu i sa pipum a kah zawn ah cun a pa nih a dirphau in a hnarpiak tawn.
Van Kulh cu ramvaih lawng vuatana a ngei lo. Pumpululh chuih, tennis tuk le golf tuk zong vuatana a ngei. Cu lengah caan lawng a ngeih paohah Mirang ca, Kawl ca le Lai ca rel awk ṭha a hmuhmi paoh a rel lengmang.
Cucaah mi dang nakin theihhngalhmi tam tuk a ngeih lawng si loin holh le caṭial zong a ti khawh caah Chin mi hmaihngaltertu pa bik pakhat ah a cang.
1942 kum November thlachung ah Major Davidson le Khuangsai ralkap pahra cu Tikhuangtum ah cun an va phan i Van Kulh nih cun a va ton hna i Major Davidson he cun Mirang holh in an i chawn i hawikom ṭha ah an cang colh.
Mah lio caante ah cun Japan ralkap cu Falam in an rak phan ve i Major Davidson nih cun, ‘Japan ral cu na kap ve lai maw?’ tiah a hal i, ‘ka kap ve ko lai,’ tiah Van Kulh nih a ti caah miakzin (rifle) a pek ve i a hawile he Vailophul in Japan cu an rak kah hna i ral cu pahnih an thi i pahnih hma an pu.
Cucaah Major Davidson nih, ‘Levy ralkap na tuah khawh lai maw?’ tiah a hal i, ‘ka tuah khawh ko lai,’ tiah Van Kulh nih a leh i Levy ralkap Platoon pakhat in tuahnak nawl a pek i mah thawk cun Van Kulh cu Levy Leader ah Major Davidson nih cun a chiah i Jemadar (bokhat) a benh.
Amah cu 1943 kum chung, amah kum 18 a ti ah Bokhat a rak hmu i ralbawi ah a cang. Van Kulh cu Mirang holh a thiam ruangah le a ral a ṭhat caah ralbawi ah a cang i mah hnu cun ‘Van Kulh’ tiah kawh ti lo in ‘Jemadar Van Kulh’ ti a si cang.
Jemadar Van Kulh cu a Levy ralkap pawl he Japan ral cu Thantlang le Falam peng khua zakip ah an i kap i an tei cuahmah hna. A hnuah cun Kalaymyo le Gangaw peng kar khua hna zong ah an i kap i Japan ral cu Gangaw tiang an dawi hna.
Amah cu Rulbu, Ṭiahdai le Zamual khua i Japan ral an teinak hna ruangah minṭhatnak ‘Burma Gallantry Medal (BGM) cu 1945 kum June 28 ni ah London Gazette in an chuah i an pek.
Cu hnuah Chaungwa khua i Japan ral he ṭha lote in an i kap i an tei hna caah minṭhatnak B.G.M. ṭhiamṭhiam cu 1946 kum January 17 ni ah London Gazette in a voihnihnak an chuah i an pek.
Jemadar Van Kulh cu 1945 kum February thlachung ah Hakha a phanh hnu tlawmpal ah Lavies cu an hrawh i First Chin Rifles tu tuah ding a si. Cun Tedim zongah Second Chin Rifles tuah ding a si ve.
Mah lioah cun Lieut Colonel L.B. Oatts, D.S.O, M.C cu ‘Commanding Officer’ a si i Van Kulh cu a auh i ralkap ah luh a fial. 1st Chin Rifles cu Falam ah phunh ding a si caah Van Kulh zong cu Falam ah a va kal i 1st Chin Rifles ah cun a va kal i ralkap ah cun a va lut.
Lt. Col. L.B Oatts cu aa lawm ngai. Van Kulh cu 1945 kum December 15 ni ah Mirang rank in Second Lieutenant (bokhat) an pek i 2nd Lt. Van Kulh ti a si ṭhan. Tlawmpal 1946 kum ah Lieutenant (bohnih) a hmu i 1947 kumchung ah Captain (bothum) a hmu.
Mah hnu kum khat 1948 kumchung ah Major (Buhmu) ah a rian cu a kai ṭhan. Buhmu Van Kulh cu rian aa zuam ca le a thiam caah a rian cu a dotdot in a kum khat ah dot khat in a kai lengmang.
Mah lio caan ah cun 1st Chin Rifles ah Lt. Col. Hrang Ṭhio B.G.M cu Battalion Commanding Offier a rak ṭuan i Buhmu Van Kulh tu cu 2nd in Command a rak ṭuan.
1949 kumchung in Karen miphun ral an tho i Kawl cozah cu an doh hna. Mah cu cangkate cun Chin Ralbawi vialte meeting an tuah zokzok i Lt. Col. Hrang Ṭhio nih Kawl cozah bawmh i Karen ral cu doh dingin a rak ti hna caah Karen ral cu 1949 kum January thla thawk in an doh i Insein Myone cu May 22 ni ah ral kut in an rak lak ṭhan i thla nga khengte an rau.
Mah Karen ral an dohnak ah 1st Chin Rifles cu a thimi le hmapumi minung 300 reng lo an si. An Commanding Officer Lt. Col. Hrang Ṭhio zong cu mah Karen ral an dohnak ah cun a paam. Lt. Col. Hrang Ṭhio a thih hnu cun Buhmu Van Kulh cu amah rian changtu ah ṭuanvo an pek i amah nih 1st Chin Rifles cu a run uk hna.
Karen ral a hrahnak bik Htantabin khua cu laak dingin ṭuanvo pek a si ṭhan. Lt. Col. Hrang Ṭhio a paam zong kha mah khua tuk dingin a kalnak ah Myaungo khua ummi Karen ral nih an rak kah hna i dahkaw a paam cu.
Atu cu Buhmu Van Kulh ṭuanvo ah pek a si ṭhan hoi caah zarh hnih chung timhlamhnak caan a tuah. Mah hnuah cun Hlaing tiva in Navy tilawng pali in Karen raldoh ah cun an i thawh.
Karen ral he cun an i kap i a ralkap cu pariat an thi i hmapumi zong an tam cang. Buhmu Van Kulh cu a lung a dongh cang caah Sgt. Thai Cawn le Sgt. Run Ling a auh hna i bia an i ruah.
Mah hnu cun Sgt. Thai Cawn le Sgt. Run Ling cu hriamnam tlingte he tilawngcung cun an zuang i ralram ah cun thlite in an lut. Pulrin lo karte ah an kah ciammam hna i Karen ral cu ceilakte an thah hna i an zaam dih.
Mah cun Buhmu Van Kulh le a ralkap vialte nih cun an dawi hna i Htantabin area vialte cu har ngaiin an laak khawh. Buhmu Van Kulh nih, ‘Bawipa Hrang Ṭhio phu kan hlam khawh cang,’ tiah a ralkap vialte cu a chimh hna.
Buhmu Van Kulh ukmi 1st Chin Rifles cu Taungoo khua laak dingah ṭuanvo pek a si ṭhan. A ralkap pawl he cun timhlamhnak ṭhate in an tuah hnuah 1950 kum March thla thawkka hrawngin Taungoo khua cu an laak ṭhan.
Cucaah Buhmu Van Kulh cu a min a lang ngaingai i 1950 kum June thlachung ah Lt. Colonel rank ah an kaiter i 4th Chin Rifles, Pakokku khua ah an ṭhial. Cun 1952 kumchung ah 4th Chin Rifles cu an Battalion pi in Lashio khua ah an ṭhial hna. Cun Lt. Col. Van Kulh cu 1956 kumchung ah 4th Chin Rifles, Lashio khua cun 1st Burma Regiment. Kengtung ah an ṭhial ṭhan.
Kengtung khualei cu KMT timi Koa Mintang ral an hrahnak bik khua le ram a si caah Lt. Col. Van Kulh cu mah ral hna he cun atu le tu an i kap lengmang. KMT cu Tuluk ral an si. 1959 kum May 15 ni ah Wanton khua ah KMT ral pawl he cun an i do.
‘Kawl ralkap nih cun kum riat hmanhah an kan tei lai lo,’ tiah an ti i an i zum ngai. Mah khua cu an va fuh hna i an va tei hna. Mah khua i an i kahnak kong cu Capt. Mya Tin (Retd.) nih ‘အညတရရဲေဘာ္’ tiah cauk pakhat a ṭial. Mah lioah hin Lt. Col. Van Kulh cu 9th Brigade ah Acting Commander a rak ṭuan.
Lt. Col. Van Kulh cu 1959 kumchung ah Kengtung cun 11th Brigade, Ngaunglebin ah an ṭhial i Karen ral a doh ṭhan hna. Mah hnu cun South West Command. Pathein ah Deputy Commander in an ṭhial ṭhan.
Amah cu 1962 kum chung ah ‘Full Colonel’ rank ah a kai i Mandalay North West Command ah Deputy Commander in an ṭhial. 1964 kumchung ah 7th Brigade Commander in Myitkyina ah a um i 1964 kumchung ah Mandalay ah an ṭhial ṭhan.
Deputy Commander a ṭuan lioah State High School le 100 beded Hospital, Falam sak rih lo a si caah Tainghmu he Falam ah cun an hung kal i an sakter hna. Cun Kalaymyo ah Chin Usi zung ah an kir i Chin Usi zung cu hika ah tuah hlah uh.
Nan duhnak Chin State chung hmun khatkhat ah i ṭhial uh, tiah an ti hna caah upa vialte cu meeting an ṭhu i Chin Usi zung ṭhialnak kong cu an i ceih. A hnu bik ah ‘Hakha ah kan i ṭhial lai,’ tiah bia an chah bantuk in 1965 kum July 6 ni ah Hakha khua ah an i ṭhial caah mah ni cu Hakha cu Chin ram Khualipi (Chin Pyine Myodaw) ah a cang, tiah Col. Van Kulh nih a ṭial. Thantlang zong 1965 kum cun Myone pek a si, a ti.
Kawl ram uknak cu a hun i thleng i 1974 kum in People’s Council chan a hung chuak i Col. Van Kulh zong cu a thilthuam aa thleng i Hlutdaw ah a pe i Hakha Myone in thim a si caah Naingandaw Council ah aa tel khawh ve caah Hakha Myone caah rian tampi ṭuan dingin saduhthahnak a ngeihmi hna lakah Hakha – Gangaw lam cu amah hruainak in zohthawk a si.
A voikhatnak Council lioah alienment cu Ṭengva in Darva in Gangawlei ah an rak zoh i Pu Van Kulh cu a lung a tlin lo caah kum li chung zeihmanh ṭuan loin an rak um i A voihnihnak Council (1978-81) thawkka in Lamtuk in Lungcawi in Bungzung in Gargaw tiang alienment cu zoh ṭhan a si i Pu Van Kulh nih a hna a tlak caah 1979 kum January 5 in Lungkarabo, Hakha in meng kua in tuk thawk a si.
Hakha peng minung 5000 leng nih mah riahcawte le thazaang chuah in Zokhua tiang; cun 1980-81 kum chung cu Zokhua in Lamtuk tiang; cun 1980-82, chung ah Lamtuk in Lungcawi in Tare (Hakha le Gangaw ramri tiang tuk asi lioah ‘Cozah nih tavuan lak a si cang lai; rak tu ti hlah uh,’ tiah a ti caah minung 3500 hrawng cu anmah le an lam cioin lunglawmte in an kir i ‘Pu Van Kulh ṭannak thawngin’ tiah lunglawmhnak mitthli he an khua cioah an tlung.
Hakha –Gangaw lampi cu Pu Van Kulh ṭannak thawngin ro ṭha bik ah Hakha le Thantlang peng nih run co a si. Vawlei a dongh hlan lo pu Van Kulh ro cu kan co chin lengmang ko lai. A dang a aupimi meiduah khamhnak le cangdot lei tuknak kong tu cu roṭha tuk ah an cang rih lo.
Pu Van Kulh cu Hakha Myone in Pituh Hlutdaw ah 1988 kum tiang a ṭuan i mah kum cun uknak cu an thlen caah aa din i 1990 kumchung ah thimnak (election) run tuah a si ṭhan i National United Party (NUP) in Hakha Myone ah aa cuh ve i a sungh caah Yangon an inn ah lungdaite le hnangamte in a um. Pu Van Kulh i a tlaihtleng ( motto) hna cu-
- Honesty - dinfelnak,
- Hardwork - rianṭuan zuamnak,
- Discipline - sikan ngeihnak,
- Diligence - felnak,
- Docility - toidornak,
- Patience - lungsaunak, thinfualnak le
- Perseverance - teirialnak hna an si.
Hakha khuanu khuapa nih Pu Van Kulh cu Hakha-Gangaw lampi meng 3/3 ah lungdonhnak an tuahpiak i hitihin hla an phuahmi an ṭial.
Ṭhutpum aw:
Run le tipi le Letsa phau dong ral khua sa nih, Lawng bang an lei kho lo lungkil zaang cheu len hna, Zocin rung hmun Lairam ceu chin thluachuah cung vanni za he.
Thington aw:
Vazuun bawi Ngunuk thaisung le hrinthar hniang he, Semnak leen ram hung hal lai ti hna
Leeng na rual nih nan siang tlangcung ṭhumhlo,
Ngunkhar Ṭialhmung sung hlei in dawi ko u law.
Thingparsang aw:
Lairam daw biktu Van Kulh min e philhlonak lungpher
Remdawh ah an hnuai ro caṭial pumcung bia,
Semchin chan tiang hmun lai dah ngai.
Miphun e hawi khi phan hna seh ti’n,
Cungmang miṭhi lalang rual he,
Lai hrin Van Kulh leen dar zun,
Thawng bang khuazung hnin cuaimai kha.
Bawikil aw:
Khuaza tluang valno na pumh hmun tualrawn kha,
Van Kulh reng sangkai na uk lai hna ti’n,
Ṭhabik leen min au kha sungkhun chin cuang dai lo.
MONUMENT
Colonel VAN KULH BGM- BAR (Rtd).
One of the Founders of:
- The Chin State Capital Hakha - 1965.
- The Hakha – Gangaw Highway -1979 – 1983.
- The Hakha Golf Club -1979.
He became Bn. Commanding Officer at the age of 25 B C . 3666
He served as :
- Deputy Commander of North - West Cammand-1962 – 70.
- Minister for Social Welfare - 1974-78.
- Member of State Council - 1978 – 88.
He is the pillor of the LAI Community Erected by
Hakha Town Elders on 24-3 -2006
cc: The Autobiography of Colonel Van Kulh, BGM – BAR (Rtd)
Sayaci Dr. Bawi Hu nih Chin Hmaisuang Hna Tuanbia Section 2 chung ta ka tarmi a si.
Cattialtu Sayaci Dr. Bawi Hu Tuanbia hika ahhin rel khawh a si.
Chin Hmaisuang Hna Tuanbia Biahmaitthi rel na duh ahcun Hika catlang hi click
EmoticonEmoticon