THAIHLUNG MANG
Mang timi hi khuaruahhar sining phunkhat a si. Thluak rianṭuannak a si, tiah mifim nih cun an ti. Kan thluak chungah hin, hmunpi (centre) pathum an um i, a lutlei hmunpi (Receiving centre), a chuaklei hmunpi (Transmiting centre), le i chingchiahnak lei hmunpi (Recording centre) ti an si, tiah an kan cawnpiak ṭheo.
Kan thluak nih aa chingchiahmi thil sining tampi an um i, cu kong lak in pakhatkhat kan vun ruah ṭhan tikah, a chuaklei hmunpi in an hun langhter caah, fiang tein kan hngalh ṭhan khawhnak a si, an ti.
Rianrang in an hun langhter khawh lo ahcun kan vun i ruah leen khi a si i, kan lung a hung pem khi an hun langhter cu a si, ti a si. Cucaah, mang timi cu kan i hngilh kar ah kan thluak chung um chingchiahmi hna lak in, pakhatkhat i cawhmaih in a chuak lei hmunpi nih a langhtermi an si, ti a si.
Cucaah, hmuh bal lomi, theih bal lomi, ruah bal lomi, hi mang ah manh khawh a si lo, an ti. Sullam ngei zong an si lo; dam lo tikah mang a tam lai, tiah an ti.
Laimi hi mang sullam ngeihter a hmangmi kan si. Cu lawng si loin, Khrihfami hi kan Baibal zulh in mang sullam ngeihter a hmangmi kan si fawn. Laimi nih mang cu phun 4 ah kan ṭhen.
Manhphanh, Mangvuanlau, Mangtak le Thaihlung mang ti an si. Manhphanh timi cu kan hmuh ciami thil, kongkau pakhatkhat kha, kan rak hmuhning nawn in mang ah i manh chih khi a si.
Mangvuanlau timi cu, kan dam lo, kan taksa ruhkhua a fah lio caan i, donghram ngei lo, mang phunphun kan manhmi khi an si. Mangtak timi cu, cang bantuk khin, fiang tein manhmi, donghram le sullam ngeih dawh a simi khi a si. (Tc. mang i chunhthah le salu hmuh cu, cukaa hmun/inn ngeitu thihnak a si, tiah pupa zumhning a si i, cu bantuk mangmanh ah cun a sol lo, ti a si ko).
Thaihlung mang timi cu, mang ah hmuhning tein, cang ah an hung si khi, chim duhmi a si. (Tc. a mang ah a ke a kiak i, a thaizing ah a ke aa khawn i a kiak taktak tbk.).
Thaihlung hi mi min a si hnga maw, tiah a ka halmi an um. Mi min si dawh a lo lo. A va si ah cun, nupi ṭha a ngeimi nih aa sakmi min a si hnga. Cu nakcun, zan ah manhmi cu, a thaizing ah cuning tein a hung um, tinak a si ko.
+++
A cung capar hi HBC SMD nih Pu G. Biak Nawl philh lonak ah a rak ttialmi Capar cheukhat cu 2015 ah cauk in an chuah. Cu chung in lak chimmi a si. A rauh hlan ah Chinlibrary chung zong ah an kan khumh piak lai i, a dihlak in rel a duhmi nih rel khawh a si te lai.
EmoticonEmoticon