Rev. Dr. David Van Bik. ( 1926-2000 )

 Rev. Dr. David Van Bik. ( 1926-2000 ) (A tangbik ah Rev. Hrang Bik Ceu nih Hla a rak phuahmi Video in ka chiah chih)

Rev. Dr. David  Van Bik cu:

1. Chin mi lakah B.Th. degree a hmu hmasa bik a si.
2. Chin mi lakah Baibal lein M. A. degree a la hmasa bik a si.

Van Bik cu  1926 kum July 28 ni ah saya Chawn Tur le  Pi Renh Ṭial nih Thantlang peng Tlangpi khua ah an hrin. Amah cu Ramthlo Cenhrang phun a si. Amah cu 1934 kum in Lai ca tang li a awng. Mah lio i Tlangpi sianginn ah Zipeng Za Hu pa Kaw Kaw cu an sayaci a rak ṭuan.

A pa nih tang hnih a cawn lio 1936 kum ah a thihtak hna caah ngakṭah in khua an sa. Lai ca tang li a awn hnu cun Thra Aung Dwe nih Falam Anglo- Vernacular High  School ah ca a cawn ter.

1942 kum chung ah tang ruk a awng. Japan ral a tlun caah Kawl ramchung sianginn vialte khar dih a si i Van Bik zong cu pehzulh in ca cawn khawh ti loin ca cawn cu a ngol.

Japan ralchung cu ca cawn awk cu a um ti lo caah 1943-45 kum chung Bungkhua le Thangzang khua ah Mirang Ralkapbu (Allied Services) ah supply cazi rian a ṭuan.

Chin Hills Baptist Association (atu ZBC @ CBC) Civuipi cu 1945 kumchung ah Tlangpi khua ah rak tuah a si. Mah Civuipi ah cun Van Bik cu Cherapunjee  Presbyterian Theological College, Assam State, India ah Baibal ca cawn ding in an thim.

Mah Baibal sianginn ah cun Baibal ca cu a va cawng i 1948 kumchung ah Diploma in Theology (Dip.Th.) a awng. Dip.Th. a cawngmi lakah a thiam bik pahnihnak a si.

Mah Baibal ca a cawn hnu cun Serampore College i Matric zong Shillong  khua ah a cawng ṭhan i 1949 kum February thlachung ah Matric camipuai cu a awng. Mah hnu cun Hakha khua ah a rak tlung i Rev. Robert G. Johnson nih a phunhmi Chin Bible Training School ah June thla in lecturer a ṭuan. Mah Bible College i a kai lio cun David ti mi min aa bunh.

Saya Van Bik cu Chin Bible Training School ah lecturer kum hnih (1949-51) a ṭuan hnuah Burma Baptist Divinity School  (atu M.I.T) Insein ah Baibal ca cu a cawng ṭhan i 1955  kumchung ah Bachelor of Theology (B.Th)  degree cu Central Baptist Theological Seminary, Kansas nih an pek.

B.Th. degree a hmuh hnu cun  Hakha ah a hung tlung i Chin Bible Training School ah lecturer a ṭuan ṭhan. Amah cu Chin mi lakah B.Th. degree a la hmasa bik a si. Mah  Baibal Sianginn i lecturer a ṭuan lio 1956 kum April 23 ah Nu Mable Zo Kai he an i um.

Saya David Van Bik cu Zomi Baptist Convention (ZBC) nih Bualkhua ah 1957 kum June thlachung ah tuah mi Triennial meetingpi ah Ordination an pek i Saya Van Bik cu Rev. David Van Bik ti a si cang.

Amah cu kum hnih (1957-59) chung Berkeley Baptist Divinity School (atu American Baptist Seminary of the West), California ah M.A. in New Testament cawnnak nawl an pek caah mah cawn ah cun a kal i 1959 kumchung ah M.A. degree cu a la.

Mah M.A a cawn lioah Kawl ram in Cliff Kyaw Dwe he an cawngṭi i M.A degreee zong an laṭi.  M.A. a cawn ah hin Baibal calehnak ah a ka bawmtu an si te lai, tiah Greek holh le Hebrew holh hna zong a cawnchih.

Hi cawnnak nih hin Baibal Calehnak le Theology thuk deuh theihnak ah tampi an bawmh. Amah cu Chin mi lakah Baibal lei in M.A. a awng hmasa bik a si. Lai ram a rak tlun cangkate in Zomi Theological School, Falam ah Principal kum li a ṭuan Mah a ṭuan chung ah cun Falam Baptist Church ah caanlaang (part-time) in church Pastor a ṭuanpiak hna.

1963 kumchung in Principal rian cun a chuak  Lai Baibal Thiang caantling (full- time) in leh hram a thawk. Baibal caleh cu 1976 kumchung ah a dih 1978 kumchung ah United Bible Society (UBS) nih a cauk in an nam i an chuah. Mah hramthawk cun Lai Khrifabu nih Lai Baibal Thiang a cauk in hun ngeih a si.

Rev. David Van Bik cu Baibal ca a leh dih hnuah Hakha Council of  Churches an tuah i Secretary a ṭuan. Mah rian a ṭuan lioah cun ca lei rianṭuannak he pehtlai in Japan ram ah WACC meeting a va kai.

Mah  hnu cun Oxford khua ah calei rianṭuannak he pehtlai in 1985 kumchung ah thlaruk chung training a va kai. Amah cu 1989 kumchung ah America New Heaven khua ah an tuah mi Vawleicung Mission rian ṭuannak (Overseas Ministries Study Center) kum khat cawn dingin an auh i America ah a kal ṭhan.

A cacawnnak cu 1990 kum May thla ah a dih. Cu hnuah America Baptist zungpi nih thla hnih chung cawnpiak le phungchim an fialnak hmun tampi ah a kal.

Mah hnu cun Amerika Baptist ceihhmainak World Misson Conference cu Amerika chaklei Wisconsin Ramṭhen Green Lake an timi hmun ah an tuah;  Rev. David Van Bik zong cu an sawm ve i a kal.

David Van Bik cu Khrifabu caah a rianṭuannak zong a sau ve cang ruang ah Hakha Baptist Association nih kum 60 tlinnak pensen an pek.

Asinain Chin Christian Literature Society (C.C.L.S.) timi calei komhnakbu cu 1988 kum in hun dirh a si tikah fakpi in a ṭang i cauk chuahnak kongkau ah a si khawh chung caan a pe i  aa zuam.

Hi hlan zongah 1979 kumchung ah Laica Tuahtu Komiti rak tuah a si i Biafangfonh (Word Combination) zong amah ṭanpinak in hun tuah khawh a rak si. Hi C.C.L.S nih 1990 kumchung ah Chin Bible School (atu C.C.C) hi rak dirh a si tikah amah cu a hmasa bik Principal ah an hman ṭhan i 1996 kum tiang a ṭuan piak hna.

Rev. David Van Bik cu 1985 kumchung ah American Baptist Seminary of the West, Berkeley, CA nih  Alumnus of the year award an pek lengah Myanmar Institute of Theology and Myanmar Baptist Convention nih 1990 kumchung ah Fellow of  Distingquished Christian Service an pek.

Amah cu 1994 kumchung ah The American Baptist Seminary of the West, Berkeley, C.A  nih Honorary Doctorate Degree (D.D) an pek. Mah ni thawk cun Rev. David Van Bik cu  Rev. Dr. David Van Bik ti a si cang.  Hakha i tuahmi Baibal Sianginn Library ca zongah a hawile sinah cauk a va hal hna i uk 6000 tluk a chuahpi.

Rev. Dr. David Van Bik cu ram le miphun le Baptist Khrifabu caah zumhtlakte in rian a ṭuan ruangah a tanglei bantukin upatnak an pek cio.

1. Myanmar Institute of Theology (M.I.T) nih kum 25 in a cunglei le zumhtlakte in rian a ṭuan caah upatnak an pek. Cun kum 35 in a cunglei le kum 45 in a cunglei zumhtlakte in rian a ṭuan caah 1985 kumchung ah upatnak an pek.
2. Myanmar Baptist Convention (MBC) le Myanmar Institute of Theology (MIT) nih Fellow of Distinquised Christian Service (FDCS) an pek.
3. Hakha Baptist Association (HBA) nh Doctor of Divinity le Lai Baibal ca a lehnak kong ah upatnak an tuah i a rianṭuannak in kum 50 tlinnak Golden Jubilee zong an tuahpiak.
4. Chin Association for Christian Communication (CACC) nih Biaknaklei cauk tam bik a ṭialtu a si lengah biafang 16593 tlum English – Chin Dictionary a tuahtu a si, tiah upatnak roca an pek.
5. CBA, TABC, ZPBA, LABC le Khrifabu dangdang zong nih upat peknak roca an pek cio.

Rev. Dr. David Van Bik cu 1999 kum August thlachungah University of California at Berkeley, CA nih Visiting Scholar ca in an sawm caah Chin-English Dictionary zong tuah pah awkin Steven nu he an kal.

Thla zeimaw zat an um hnu December in a hnar ah cancer zawtnak a sem, tiah Berkeley khua um Siibawite nih an hmuh caah 2000 kum February thlachung in Maryland khua ah an kal i siibawite nih an si khawh chungin an thlopbul len ko nain a taksa le a thazaang nih a celh ti lo caah 2000 kum August 19 Zarhteni zingle suimilam 9:05 caan ah a dawtu le a rian a ṭuanpiakmi a Pa Pathian sinah siaremte in aa din. A hnuah a innchung nu Pi Zo Kai le an fale Steven, Eric, Rollin, Kenneth le Alice a rohtak hna; tule 11 a ngei.

Rev. Dr. David Van Bik ruak cu American ah vui ding zong a si ko nain a chuahsemnak, le a rianṭuannak khua le ramte ah vui dingin upa pawl le chuahsempi unau le cingla rualchan hna nih an khan caah America ram cun a ruak cu Kawl ram ah rak tlunpi i Hakha khua ah vuiding a si caah vanzuanglawng in an rak phawrh i Yangon khua cu 2000 kum August 31 ni zanlei suimilam 7:00 ah a phan i suimilam 8:00 bak ah Yangon khua um Chin mi vialte nih Lai Baptist Church in an don i an ruakkuang cu a chung i an luhpi hnuah an hun i Rev. E. Za Bik nih thla a cam hnuah U Tabyu Memorial Hall ah an kalpi i pumhnak an tuah.

M. I. T Principal hlun Sayamaci Ewah nih thla a cam i Rev. Dr. Pau Khan En nih phung a chim. Mah hnu cun a ruak cu ruakkuang ah an khumh ṭhan i zan suimilam 11:00 ah Yangoon in Mandalay ah an lanhpi. LBC nih Rev. Tin Kung cu ruakthlahtu ah ṭuanvo an pek i amah nih a tlunpi, A thaizing zanlei suimilam 5:30 ah Mandalay an phanhpi i Zomi Baptist Church ah pumhnak an tuahpiak i Rev. Dam Za Nang nih phung a chim.

Mandalay cun zan suimilam 7:30 in ruak cu an tlunpi i a thaizing suimilam 6:00 ah Tinam khua an phanhpi. Rev. Dr. David Van Bik ruak cu 2000 kum September 3 Zarhpini chunhnu suimilam 2 ah Hakha khua a phan i a inntual ah ruak cu suan a si.

A ruak cu zan khat suan a si i a thaizing September 4 ni chunhnu ah Hakha Khrihfa thlaanmual ah an vui.

American in an rak tlunpinak a ruakkuang cu Hakha Baptist Association upa pawl nih museum (ျပတိုက္) ah chiah awkin an ruah caah tlorkuang a ṭhami an tuah i mah tlorkuang cun Rev. Dr. David Van Bik ruak cu an vui i American in a ruakkuang tu cu Hakha Baptist Association zungpi i museum ah an chiah.

cc :   To God be the Glory ( In memory and honor of David Van Bik), page 42 – 45.

Rev. Dr. Van Bik Chuahkehnak:

 Van Bik pu puchin – Pu Chiah Khar – Ramthlo in Tlangpi in Thaidor ah a pem. Pu Chiah Khar fapa (Van Bik pu) cu Pu Ṭio Kham a si i Thaidor in Zahau ram Khuangṭul ah a pem i Chawn Tur a hrin hnuah Ṭio Kham cu a thih caah Chawn Tur cu Thaidor ah a pem ṭhan. Chawn Tur nih Thaidor nu a ṭhit i a thihtak caah Tlangpi ah a hung pem. Chawn Tur nih Renh Ṭial a ṭhit i Van Bik, Biak Mang, Sung Iang, Siang Thlia, Ro Thlia an hrin hnuah Chawn Tur cu 1936 kum, amah kum 40 ah a thi.

Van Bik pa Saya Chawn Tur cu Chin Hills Baptist Association nih Re. 1/- an pek i Saya Aung Dwe nih amah pumpak in Rs. 6/- a dihlak ah Rs. 7/- lahkhah an pek.

Cattialtu Sayaci Dr. Bawi Hu Tuanbia hika ahhin rel khawh a si.

Chin Hmaisuang Hna Tuanbia Biahmaitthi rel na duh ahcun Hika catlang hi click

Rev. Hrang Bik Ceu nih Rev. Dr. David Van Bik hla a phuah i a sakmi ngaih khawh a si. Cinrung zong nih an rak phuah i an sak len nain ka hmu kho lo.

Advertisement