HARNAK CAAN AH BAWIPA A THANGṬHAT KHO MI by Pastor Sang Tin Uk (Galilee)
Kan khualtlawnnak vawlei ahhin lungretheihnak,
ngeihchiatnak, ṭah-ai-hramnak hi kan
ton hrimhrim awk a si ko. Zeicatiah cun vawlei cu pei a si fom cu. Vancung khua
kan phanh hlan chung cu kan duh zong duhlo zongah vawlei nih a chuahpi mi
harnak hna hi kan cungah a tlung cio ko lai. Sihmanhsehlaw cu kan tonmi harnak
lakah Bawipa a thangṭhat kho mi si hi nun sunglawi, nun van ṭha mi cu an si.
Lamkaltu 16:16-40 karah Paul le Silas cu Filipi
thonginn ah an thlak hna nak kong kan hmuh. Paul le Silas cu Jesuh Khrih
khamhnak thawngṭha chim ah dinh mui hmu
loin nun pek in a vakmi an si. Paul nih Timote ca a kuat mi chungah “Mivialte
nih khamhnak hmu hna seh ti le biatak hngal hna seh ti hi Pathian duhmi a si (I
Tim 2:3-4) tiah a ṭial. Paul le Silas cu Pathian nih a duhmi Khamhnak thawngṭha chim rian ah aa pumpe mi an si. Sihmanhsehlaw
thawngṭha an chim ruangah thongthlak an i huah. Fir ruang le hrokhrol ruangah a
si lo. Pathian duhmi rian an ṭuan ruangah thongthlak an i huah nak a si. Paul le Silas cu thonginn chung an um
lio ahkhan Bawipa na duhmi rian kan ṭuan
ruangah thong kan tlak nak hi a si. Kan zoh sawhsawh hlah ngat tiin phun le zai
in le lungrawk in an vuivai lo. Pakhat le pakhat zong nangmah ruangah thong kan
tlak nak hi a si tiah sual an i phaw lo
i midang zong sual an phaw hna lo.
Israel pawl cu Eygpt sal taannak in an chuah lio
ahkhan lampi ah harsat nak tampi an tong. A caan ah cun ral tihnung an tong, a
caan ah cun ṭamhalnak an tong, a caan ah
cun zawtfahnak le thihnak hna an tong. Cu bantuk harnak an ton caan paoh ah an
hruaitu a simi Moses kha an phun an zai hnawh. Eygpt ram in kan chuahpi hlah
law hi harnak hi kan tong hnga lo tiah phun le zai in an i la. Israel pawl hi
khuaruah har ngai cu an si ko. An lam a tluan caan ah siseh, ti le rawl an hmuh
caan ah siseh, ral teinak an hmuh caan ah cun Pathian thangṭhat cu an thawng
hringhran ko. Pathian nih Moses ṭhiangṭhunh hmangin Rili sen a vun cheu i lei ro cungin
Israel mipi tiva ral an vun chuah khawh chawng hoi hna ahkhan cun Pathian an
thangṭhat ning cu a mak ko. Khuang he lam he Pathian cu an thangṭhat. Asinain khuaruahhar vansannak le lungretheihnak
an ton caan ah cun an thangṭhat nak nun cu a tlau diam i Pathian nung a biami
lo bang phun le zai le tloh le ciar in an i la. An phunzai tuk caah Pathian
tiang a thin a hung. Cu pawl minung hna cu kamhmi ram an phan kho lo. Phunzai
le tlohciar tuk cu Pathian kamhmi thluachuah a phitkhartu a si.
Paul le Silas cu harnak thukpi chungah tla hna
hmanhsehlaw Pathian thangṭhatnak tuin an caan an hman. Cu an thangṭhatnak nih
cun Pathian sunparnak a langhter i thonginn kutkaa vialte aa on dih lengah
Palek bawipa tiang nih Pathian khamhnak thawngṭha a co. Harnak caan lioah Pathian a thangṭhat khomi Paul le Silas nih
Pathian sunparnak an langhter. Caan tampi ah zumtu a timi mi tampi cu Israel
pawl bangin harnak le hneksaknak kan ton caan ah cun phun le zai in le midang
sual puh in kan caan kan hman theo tawn. Harnak caan ah kan der a si ah cun kan
der taktak a si (Phungtlukbia 24:10).
Nitinte kan nunnak ahhin vawlei nih harnak cu a kan
pek ko lai. Thihlohnak kan ton caan zong a um lai, zualcei ngaimi zawtfahnak
kan ton caan zong a um lai, kan rianṭuannak ah zatlak puicimhnak kan ton caan
zong a um lai, mi dang caah thilṭha kan tuah kan ti lio hmanhah thangchiatnak
kan ton caan zong a um lai, nupi va karah buaibainak ton caan zong a um lai,
fale kongkau ah lungretheih ton caan zong a um lai, suingun chawva kongah
lungretheihnak kan ton caan zong a um
lai tibantukin a phunphun in minung harnak le fahnak a kan pe kho tu vawlei
ahhin a tam tuk. Asinain kan tonmi kip ah vuivai loin le khat le khat sual i
phawt loin Paul le Silas bantukin Pathian thangṭhat in kan tonmi harnak a teimi
kan si ah cun kan nun in Pathian sunparnak a langhtertu le midang caah lawmhnak
le daihnak thluachuah a phortu kan si lai.
Nan dihlak Bawipa nih daihnak in pe ko hna seh.
EmoticonEmoticon