V. I. P (Very Important Person) By Pastor Dr. Siang Chin Ṭial (HBC)
Biahmaiṭhi
Voikhat cu thlacamnak pakhat ah an ka sawm ve caah
zanlei suimilam pahnih hrawngah thlacamnak ah cun ka va kal ve. Thlacamnak a
dih tikah zanriah ei dingin ṭuanvo ngeitu hna nih timhlamhnak an ngei. Khua ka
hei zoh i ruah lo piin thutdan pakhat a lawngmi ka hmuh. Ka hei thu lai tiah ka
kal. A pawng ka phak ah thutdan cungah cafang ngan pathum aa ṭial kha ka hmuh.
Cu cafang ngan pathum cu V.I.P timi a si. A sullam hngal hlah ning law cu cu
thutdan ah cun ka thu ko hnga. Sihmanhsehlaw, V.I.P timi sullam cu fiang tein
ka hngalh ve caah ka thu ngam lo. Kan hngalh cia bantukin V.I.P timi sullam cu
mirang biafang a tawinak in an lakmi a si i a sullam cu ‘Very Important Person’
tinak a si. Lai in cun a biapi tukmi minung tinak a si.
Cucaah, V.I.P caah timhtuahmi ṭhutdan cu ka hei fuh
ko nain ṭhu loin ka kir ṭhan. Cu V.I.P timi cafang ngan pathum ka hmuh le cangka
in ka lung ah V.I.P timi tlangtar hmangin capar ṭial ning law a ṭha hnga tiah
khua ka rak ruat. Tutan HBA Hmurka ah capar ṭial dingin ca an ka pek tikah ka
rak ruahmi V.I.P kong he pehtlai in ṭial kaa timhmi kha Bawipa nih ka saduhthah
a tlinter tiah ka ruah caah Bawipa cungah kaa lawm tuk i, ṭuanvo ngeitu cung
zongah kaa lawmhnak ka langhter.
V.I.P
Vawlei cungah biafang tampi an um i, cu vialte lakah
V.I.P timi biafang hi mi tam deuh nih kan hngalhmi biafang a si ti usihlaw kan
palh tuk hnga lo. Hi biafang hi biaknak ca nak hmanh in vawlei lei uknak lei ca
deuh ah an hmanmi a si fawn ti zong hi kan hngalh ngaimi a si fawn. Asinain, hi
biafang hi vawlei lei i uknak ca lawng hmanh ah siloin thlarau lei sining in
kan ruah ah cun a sullam hi a rak thuk ngaimi dirhmun in ruah khawh a si. A
ruat balmi zong kan um ko lai dah! Vawlei lei in cun V.I.P timi min chuankhan
in auhmi hna cu zapi nakin a sang/bawi deuh/khunmi an si. Phundang in kan chim ah
cun mi nakin, hawi nakin mi nih upat deuhmi, hawi nakin zohcho deuhmi minung an
si.
Minung sinak in cuai i thlainak hi a um lengmang.
Cucu a palh tiah ti duhnak si loin vawlei nih kalpimi sining kha chim duhmi a
si. Zapi koko hi cu mi zapi caah V.I.P kan si kho dih lai lo. V.I.P tiah an ṭialmi
ca ka hmuh lioah ka ruahmi cu “Aw… kei cu bawi ka si ve lo caah hi ṭhutnak hi
cu kaa tlak lo tiah zakzum in le khua zaza ruat in a ummi tampi an um lai dah
tiah ka zumh.” Zapi zaraan ko cu mi hmanh nih hngalh lem lomi, innki sapang ah
khua a sami tampi kan um. Sihmanhsehlaw, a cunglei ah kan langhter bantukin hi
biafang hi vawlei lei ca lawngah si loin thlarau lei mit in kan zoh tikah kan
zapite ca zongah a si ve ti kha ruah khawh nakding caah le cu bantuk V.I.P a
simi hna i sining, lungput le ṭuanvo hi zeidah an si ti kha a tanglei sining
(3) in thazaang kan i lak nakding caah langhter ka duhmi a si.
1. Mivialte hi Pathian caah V.I.P kan si dih (I Korin 6:19-20)
Minung mithmuh ah cun V.I.P cu zapi tein kan si kho dih lo. A ruang cu, kan sining le kan dirhmun nih bia a chim. Cu nih a langhtermi cu “nang cu na niam deuh, kei cu ka sang deuh” ti kha a si. Cu bantuk sining chungah mi tampi kan khuaruahnak le kan tuaktannak hi a dam lomi sining ah a um. Vawlei tahfung ruangah mi tampi cu zapi hmai hmanhah chuak ngam loin le mi hmai biachim hmanh ngamh loin a nungmi tampi kan um. Cucu vawlei zohnak a si. Vawlei kalpi ning hi kan hlawt dih lai tinak si loin vawlei sining rumro in khua kan ruah, kan kal ah cun thinlung dam lo a fawi te. Vawlei cungah mizeimaw cu thinlung nuam lo ngaiin khua a sami tampi kan um. Cu ti kan umnak a ruang cu a tampi ko men lai. Cu lakah ‘nang cu na biapi lo cuh’! tiah mi bia le pawngkam aw-aan hna hi kan dam lonak a ruang lakah pakhat cu a si ve men lai dah ka ti. Minung hi zeibantuk te kan si zongah zeihmanh na si lo ti le na biapi lo ti cu ahohmanh nih kan duh lo ngaimi a si. Minung hi direct in cun na santlai lo tuk, na biapi lo tuk ti cu kan i ti tuk lai lo nain, indirect in anih cu cucu dahkaw a si cu, bawi a si, mi lianngan a si tiah kan theih tikah mah le mah zumh ngamnak tlau in le lungnuam lo in a ummi kan tampi lai dah ka ti! Cuti kan ti tikah nahchuahnak ngeih ruangah a si ti kha chim duhmi a si lo. Cucu kan fian ngai a haumi a si. Minung hi kan lungput le kan khuaruah dan nih kan nun hi a khalh caah kan ruahnak le kan lungput ah san ka tlai lo, zeihmanh ka si lo ti hi ruah lo ding hi a biapi ngaimi a si. Cucaah vawlei lei in mi nih anih V.I.P a si tiah an kan ti lo zongah Pathian caah cun V.I.P kan si ti hi hngalh a herh ngaimi a si. Pathian nih zungzal hrem hmun Hell ah kal a kan sianh lo caah kan Bawipa Jesuh Khrih a kan pek i, thisen sung in tlanhmi kan si (Johan 3:16; I Peter 1:19). Cu nih a langhtermi cu Pathian caah minung vialte hi a biapi tukmi lawngte kan si dih. Pakhat te hmanh tlau lai a kan sianh lotu Pathian a si (II Peter 3:9). Vawlei nih hngalhmi si lo zong ah Pathian nih hngalhmi si hi a biapi deuhmi a si. Cucaah Pathian caah a biapi tukmi kan si timi le Pathian nih hngalhmi kan si timi nih kan lung hi a damter ding a biapi tukmi a si.
2. V.I.P
Lungput (Isaiah 41:10)
V.I.P cu hawi nakin cawisanmi le upatmi an si caah mah le mah zumhngamnak an ngei lai ti cu al awk ṭha lo a si. Zeicahtiah, minung hi mi nih cawisan deuh le upat deuh ah cun mah le mah zumhngamnak kan ngei. Cucaah, V.I.P lungput le zumhngamnak ngeih cu ṭhen awk ṭha lo a si. Kannih vialte zong Pathian caah V.I.P kan si caah mah le mah zumhngamnak kan ngeih a hau. Mah le mah zumhngamhnak ngeih kan ti tikah i porhlawt le i uah kha chim duhmi siloin thilṭha tuahnak caah mah le mah i bochan tu kha a sawh duhmi a si. Minung nih vawlei hi vawlei mit lawngin kan cuanh ah cun mah le mah zumhngamhnak ngei lo a fawi te. Zeicatiah, vawlei ah kan mah nak in thil tikho tampi an um. Sihmanhsehlaw, thlarau mit in kan cuanh ah cun Pathian bochannak he kar hlan khawh a si. Cucaah, Pathian mi fa hna nih cun vawlei/ mah le mah sining i bochan loin Pathian i bochannak tu he mah le mah zumhngamhnak kan ngeih ding hi a herh mi a si. Cucaah, a hohmanh nih ka nauta tuk timi lungput ngei lo in Pathian mithmuh ah a biapi tukmi kan si timi lungput nih kan nun hi a ṭhawnter, kar a hlanter ding hi a biapi tukmi a si.
3. V.I.P A
Rian (Efesa 2:10)
V.I.P a rian cu ram le miphun caah le midang caah nun kha a si. Cucaah, Pathian V.I.P a si mi kannih zong kan rian a biapi bik cu Pathian ram kauhnak caah le kan minung hawi caah nun kha a si. Vawlei cung kan nun chung caan tawite ah hin khua zei ah dah na um/ ka um timi nak in zei bantuk minung dah na si/ ka si ti hi a biapi deuh. Mi tampi nih kan buai pimi cu umnak hmun le hma kong deuh hi a si. Sihmanhsehlaw, khua zei ka i kan um hmanhah Pathian ram kauhnak caah le kan minung hawi caah thlumalnak le santlaihnak kan ngeih lo ah cun santlaihnak a um lo. Cucaah, khuazei ka kan umnak hmun poh ah Pathian fa kan sinak langhter kha a biapi mi a si. Zeicahtiah, kannih cu Pathian nih thilṭha tuah ding ah Khrih chungah serṭhan mi kan si (Efesa 2:10).
Biatlang
kawmnak
Khrih thisen in tlanhmi Pathian V.I.P a simi nang le
kei nih vawlei ah hrambunh loin Pathian tu ah hrambunh in kar kan hlan ah cun
vawlei ah lungdernak le zakzumnak ngeih loin lungṭhawnnak le mah le mah
zumhngamhnak he Pathian caah le vawlei caah a ṭhahnemmi minung kan si ko lai.
Pathian V.I.P kan si ti hi zeitik hmanh ah philh hna hlah u sih!
A cung cabia hi HBA Hmurka Vol. 18 No. 3 August (Hniang), 2020 ta a si.
EmoticonEmoticon