Salm 12
Bawmh Halnak Thlacam
(David Hla)
1 Ka khamh tuah, maw BAWIPA!
Miṭha an um ti lo i lihchim
lomi an um ti lo.
2 Pakhat le pakhat an i hleng i
hlepar faknak hmur le lung hnih
ngei in bia an chim.
3 Maw BAWIPA, hlepar fak thiam lei cu
daihter law
tluang a khawng lengmangmi
kaa cu phit hna.
4 Annih nih an i thawh i,
"Kan duhmi paoh kan chim ko lai,
ahohmanh nih an kan kham kho
lai lo.
Aho nih dah, cucu nan chim awk a si,
tiah an kan chimh khawh lai?"
an ti.
5 BAWIPA nih aa thawh i,
"Sifakmi cu an hrem hna i
retheimi cu aihram lengmang in
an tuah hna caah
atu cu ka ra lai i an ngaihmi
himnak cu ka pek hna lai," a ti.
6 BAWIPA biakamnak cu zumhawktlak
an si;
somei chungah voi sarih tiang
erletmi ngun tlukin an thiang.
7-8 Miṭhalo cu a kenkip ah an um i
mi zeipaoh nih thil ṭhalo kha
an hlawrh,
Maw BAWIPA, hi mi hna sin hin
kan kilveng law
him tein kan umter zungzal ko.
Hi Salm cu bia vaivuan, puhnak le lungrumhnak vialte chung in Pathian runvennak, bawmh halnak biazai a si. A biazai tungtlang umtuning zoh tik ah kan fian khawh taktakmi a um lo nain Saul siangpahrang pennak caan lio ah khan phuah dawh a si (cf. 1 Sam. 23:11, 19ff; 26:19); a zei a si hmanh ah a fiang pahmi cu sal an taan hlan kha a si i BC 8 le 7 karlak hrawng kha a si kho bik (cf. Hos. 4:1ff; Mik. 7:2ff; Isa. 33:7-12; Jer. 5:1-5). 'Hmur le ka in ral dohnak' chung in bawmh halnak (caang khat in caang li) a si i profet asiloah tlangbawi nih Pathian bia in lehnak (caang nganak); le khamhnak caah biakamhmi cungah mibu nih hnatlaknak in an leh venak, Pathian cu zeitik caan paoh ah bochan khawhmi a si an i hnangampinak (caang 6-8) Salm a si.[1]
Caang khatnak: Ka khamh tuah, a timi hi ka bawm tuah ti he hin aa khat i thilrit chawn a herhtuk mi nih ṭah bu in Pathian bawmh a hun halnak, a nawlnak a si (Slm 3:7; 6:4; 7:1; 118:25). Pathian a ṭihzahmi an um ti lo, zaangfahnak a ngeimi zong an um ti lo, asiloah zumh awktlak, titsa (loyalty) a ngeimi an um ti lo a ti. Elijah nih amah lawng Pathian a ṭihzahmi a taang mi cu a si rua tiah aa ruah (1 Siang. 19:10); Pathian a ṭihzahmi hna cu Pathian nawlbia a zul i amah cung ah titsa a ngeimi, midingmi an si. Cu bantuk mi cu an um ti lo a ti, lih an chim dih i miṭha an um ti lo a ti.[2]
Caang hnihnak: Miṭhalo nih cun an lei in Pathian nawl an ngai lo. Biatak kha an merh i an hnokter. An i tinhmi cu faknak bia hman i midang kha hlen i min thannak hmuh kha a si.[3] Faknak bia hi biaruahnak a si lo, rap in mi foihnak tu a si (cf. Isa. 30:10; Dan. 11:32) a si i midang rawhnak le aluaitungsa (exploit) tuahnak a si. Pathian cung ah hram a thla lomi nih cun lung hnih an ngei tawn i midepde an si (Jeims 1:8). Hi bantuk lungawṭawmnak a ngeimi cu an lungthin kha lihchimnak nih a cawlcanghter hna i lung hnih an ngeihnak cu a si.[4]
Caang thumnak: Hlepar fak thiam lei cu daihter law a hun timi zawn te hi cik law tan dih cikcek hna ti zong in fian khawh a si i miṭhalo hna rawhralnak kha a chim duhmi cu a si (Mik. 7:4; Amos 2:3). Hmurka leidang nih hi kan minung sining hi a huap dih tawn caah aa porhlaw tukmi, tluang a khawng tukmi kaa cu phit ko hna tiah Bawipa sin i zaangfahnak a halnak a si.[5]
Caang linak: Miṭhalo hna nih an i tinhmi lam i a kal cuahmahnak ah hlepar fak thiam an lei an i sum lo, an i fak, an i porhlaw i Pathian lam an zul duh lo i anmah sunparnak kha an kawl i kan donghnak nih pei thiam a kan coh ko lai cu an i ti. [6] Annih cu bawi a ngei lomi miphun an si; aho dah kan bawi cu a si lai? tiah bia an i hal i aho hmanh kan cungah a bawi ding an um lo ti in anmah le anmah an i bochan. Minung kan sicannak ah Pathian a hun i thlak ve ti kha an pommi a si lo.[7]
Caang nganak: Hi caang nih a muru a langhter i Bawipa nih profet asiloah tlangbawi sin in mibu bia a lehnak kan hmuh khawh. Herhbaunak a ngeimi hna hrum-ainak aw kha Pathian nih a theih piak hna (Ex. 2:24). Atu ah ka ra lai tiah Bawipa nih a hun ti tik ahhin Isaiah 33:10 zong hi thinlung chung ah a hung lang ngaingai. Himnak ka pek hna lai, a ti i miṭhalo hna kut in luatnak an hmuhnak ding cu a si. Camh le aih a thiammi miṭhalo hna nih fahnak le harnak an pekmi hna chung in luatnak an hmu lai tinak zong a si.[8]
Caang ruknak: Pathian bia cu zumh awktlak a sinak cu mibu nih Amen ti in ah lehnak a si. Pathian nih bia a kamh hna i luatnak a peknak hna cung ah an i lawmhnak bia a si. Minung bia cu lih le zirtiannak in a khah i a hnawmh tuk lio ah Pathian bia cu a thiang tukmi a si i somei chung i voi sarih tiang erletmi ngun bantuk in a thiang. Pathian nih a bia cu a ven i zumh awktlak a si zungzal ko.[9]
Caang sarih le caang riatnak: A donghnak a biatlang ahhin Salm caṭialtu nih a hun tharchuahmi cu zaangfahnak a halnak kha a si. Ka kilveng law timi hi ka zohkhenh law tinak zong a si i khuazei paoh ah a um a kalmi miṭhalo hna kut in ka veng ko tinak a si.[10] Hi miṭhalo hna cu a kenkip ah a vakmi an si i sunlawinak an ngei lo. Anmah le anmah an i porhlaw an i fak i an lamkal hmanh ah a lang, asinain man a ngeimi a si lo.[11]
[1] NIBC, 564-565.
[2] Anderson, 124.
[3] Barker, 808.
[4] Anderson, 125. Lung (heart) hi Judahmi ruahnak ahcun khua kan ruahnak le nunzia kan ngeihnak hrampi, lungthin a ṭhutnak hmun a si an ti. Lung hnih ngeih cu biapi bik in thil pahnih i chiah kha a si i cucu lih lawnglawng nih a ven khawhmi a si caah a ṭha lo taktakmi cu a si; Word Biblical Commentary, Psalms 1-50, 138.
[5] Anderson, 125.
[6] Barker, 808.
[7] Anderson, 126.
[8] Ibid.
[9] Weiser, 160.
[10] IB, 71.
[11] NIBC, 565.
Credit: Rev. Dr. Lal Pek Lian Facebook
(Amah (Rev. Dr. Lal Pek Lian @ Church Pastor, IBC) nih Salm Hrilhfiah a kan ṭialpiak cuahmah lio ah zapi rel khawh ding in a post mi chung in târ chinmi a si.)
EmoticonEmoticon