Salm 29
Thlichia Chungah Bawipa Aw
1Nannih pathian hna, BAWIPA cu
thangṭhat ko u;
a sunparnak le a lianhngannak cu
thangṭhat u.
2BAWIPA min sunglawi cu thangṭhat u,
A Thiangmi BAWIPA cu a langh tikah
a hmaiah kun u.
3BAWIPA aw cu rili cungah a thang,
a sunglawimi Pathian cu khuari
bantukin a ri i
a aw cu rili cungah khan
a thang dih.
4BAWIPA aw cu a than khawh chung le
a ṭhawn khawh chungin a thang!
5BAWIPA aw nih cun sidar thing kha
a khiah dih hna,
Lebanon tlang sidar hmanh kha
a khiah dih hna.
6Lebanon tlang cu cawfa bantukin
a pehter hna i
Hermon Tlang cu fungtum no
bantukin a choiter.
7BAWIPA aw nih ṭek kha a tlakter.
8A aw nih thetse ram kha a hninh hna,
Kadesh thetse ram kha a hninh in
a hninh.
9"Pathian cu thangṭhat ko u," tiin
a biakinn chungah an au lioah,
BAWIPA aw nih cun sakhi kha
fa a hrinter hna i
thingkung kha a hnah vialte
a choih dih hna.
10Rili thuk pipi kha BAWIPA nih a uk hna,
siangpahrang bantukin zungzal in
a uk hna.
11BAWIPA nih a mi cu thazaang
a pek hna i
thluachuah daihnak a pek hna.
Hi salm cu thlichia siangpahrang hla a si tiah an ti phah. Kanaan miphun hna biaknak (Ugaritic) nih thlichia-pathian tiah timi Baal-Hadah kha an biak i hi salm nih aa tinhmi cu Kanaan miphun hna nih pathian tampi an biaknak kha a doh hna i (cf. 1 Siang 18:21, 24; Hos. 2:8) salm caṭialtu nih a dirpimi cu thlichia cung i nawlngeitu taktak hi Baal-Hadah si lo in Yahweh Pathian tu a si kha langhter a duh.[1]
Caang khatnak: Pathian cu sunparnak le upatnak pek ding hrimhrim a si kha hi caang ahhin a lang (Slm 115:1). Isaiah 6:3 chung i Serafim hna nih Pathian cu "A Thiang, A Thiang, A Thiang," tiah an thangṭhat i a lianhngannak kha an phuan bantuk kha lungthin ah a hung langmi a si. Babilon miphun hna nih sernak tuanbia an ngeihmi ah Marduk cu pathian dang hna nih an thangṭhat a ti. Salm caṭialtu nih El timi Pathian kong hlanlio an ruahnak kha a hun char ve i Yahweh Pathian cu pathian dang vialte nakin a lianngan deuh, teitu a si ti kha langhter a duhmi cu a si. Hi caang i 'nannih pathian hna' a hun timi hi 'pathian fapa hna' ti zong in fian khawh a si (Gen. 6:2.4; Deut. 32:8; Job 1:6. Slm 82:6; 89:6). Cun hi caang i a sunparnak le a ṭhawnnak (lianhngannak) tiah a hun chim duhmi cu sermi thil vialte cung i Pathian aa phuannak kha a si (cf. Slm 96:7).[2]
Caang hnihnak: Bawipa hmai i kun hi amah biak kha a si. Hi kunnak ahhin upat hmaizahmi hna hmai i kun phun kha a si i a bawh zong in an bok tawn (cf. Gen. 33:3; 1 Sam. 20:41; Slm 72:11). Bawipa cu thiannak in an sin i a langhnak hi a biakinn chungah a si. Pathian a hun i langhnak hi minung hmuh khawh awk in a si a hun tinak a si (cf. Ex. 33: 17-23).[3]
Caang thumnak le caang linak: Baal pathian cu Kannan miphun biaknak nih nikhua chiat ṭhatnak he pehtlai in nawlngeitu bik pathian (weather-god) in an zumh i nimtlau le ṭek cu a orhlei kut in aa tlaih i a aw hi khuari bantuk in a ri. Salm caṭialtu nih Pathian aw cu rili cungah a thang a hun ti tik ah Bawipa cu teitu a sinak kha a langhter (Ex. 15:3, 8).[4] Cuticun Pathian aw cu ṭhawng ngai in a thang. Hrokual tuk in le rumra ngeih bu in Bawipa aw a thannak, Pathian ṭhawnnak kha caang linak nih a hun nolhmi a si.[5]
Caang nganak le caang ruknak: Pathian sunparnak cu fingtlang tiang hmanh ahhin fiang tukin a lang (Slm 114:4, 6). Tlang hna cu a hmaiah ther lengmang in an um. Hi tluk tlang ngan pipi hna, a san lei ah rili in pe thonghra reng lo an si, asinain Amah hmai ahcun cawfa le fungtum no bantukin a pehter hna i a choiter hna. Pathian ṭhawnnak a ngan zia cu Lebanon tlang cedar thing hmanh kha a khiah dih ko hna.[6]
Caang sarihnak le caang riatnak: Hi caang hi caang thumnak tu kha hun zul sehlaw a biakalning ah a dik deuh lai tiah a ruatmi zong an um. A cheu nih cun caang ruknak hlan deuh vak te ah an chiah ve. A zei a va si hmanh ah a sullam cu Pathian aw cu mei zik bantuk a si tiah a ti i cu a sullam cu Pathian aw nih ṭek a tlakter ti he khan aa khatmi a si kho. Kadesh thetse ram tiah a hun hman tik ah ramcar chung an kal lio, Sinai tlang i nunphung thar an laknak an tuanbia he khan pehtlaihnak a ngei lai tiah ruah a si. Kadesh cu Izipt ram in Palestine ram kalnak lam ah a um caah a si. Thetse ram cu a hninh in an I hnin a ti tik ah a ther bak in an ṭih tuk caah an ther ti he hin a sullam aa khat (Slm 96:9. 97:4; 114:7). [7]
Caang kuanak: Saram pawl vialte le fingtlang dihlak nih Pathian aw cu a nawl an ngaih. Pathian aw nih sakhi cu fa a hrinter i thlichia le rial nih thinghnah vialte an ṭilhter dih. Pathian sunparnak kha a biakinn thiang chung ah an thangṭhat. Caang khatnak i hun langhter cangmi pathian fapa le hna nih an thangṭhatnak kha hi caang ahhin a hun lang ṭhan.[8]
Caang hranak: Hika ahhin a Hebru holh umtuning ahcun buanchukcho kha a si a ti i Noah chan lio ah ti vialte cung i Pathian nawl a ngeihnak kha a hung lang (Gen. 7-8). Pathian cu thlichia tilet cungah a ṭhu ti a si hnga i a sullam cu rili thuk pipi kha a uk hna ti kha a si ko. Rili cung i nawlngeitu bik a si kha a lang.[9]
Caang hleikhatnak: Hi caang nih cun miphun nih ngandamnak le thluachuahnak a hmuhnak ding caah duhsaknak nganpi a ngeihnak kha a lang.[10] Sermi thil vialte cung le kokek sining (tabawah) cungah Pathian sunparnak a langhnak nih daihnak le lawmhnak a kan pek. Pathian, kan Bawipa cu a sunparnak he a liannganmi kan Pathian a si i a mi hna cu a ven hna i thazaang a pek hna.[11]
[1] NIBC, 575.
[2] Anderson, 233-235. 'A ṭhawng tukmi hna' tiah a Hebru holh ahcun a um i 'pathian fapa le hna' tinak zong a si. Hi hna he epchun in Biakam Hlun ah an hun chimchih tawnmi cu Pathian cu a vanmi run nih an but i an thangṭhat ti a si (1 Siang. 22:19; Isa. 6:2-4; Slm 8:6; 148:1-2, etc). Hi caang ahhin salm caṭialtu nih a hun chim hnawhmi cu Pathian cu thangṭhatnak pe u ti kha a si ko; Broyles, 152.
[3] Ibid., 235.
[4] Word Biblical Commentary, Psalms 1-50, 247. Thlichia tilet le buanchukcho cung ah Pathian nih cun a siangpahrang inn cu fek tuk in hram a thlak ti kha an zumhning a si (cf. Slm 93:3); Anderson, 236.
[5] Anderson, 236.
[6] Barker, 830. Lebanon le Siron hi hlan lio Hermon Tlang min a si (Deut. 3:9); CBC, 366.
[7] Anderson, 237. Pathian aw nih ṭek a tlakter a hun timi mei kong hi Pentecost ni i Pathian nih mei-lei in bia a hun chimmi he khan an pehtlaihter tawn (Lam. 2:1-4); Tyndale, 126.
[8] Weiser, 264. Pathian sunparnak kha minung nih a hmuh tik ah khuaruahhar in a zoh i Pathian cu a thangṭhat. Pathian aw nih vawlei a hun cul dih tikah cu a sunparnak cu a biakinn thiang chungah thangṭhat a si; John Calvin, 152.
[9] NIBC, 576.
[10] Oesterley, 202.
[11] Barker, 830.
Credit: Rev. Dr. Lal Pek Lian Facebook
EmoticonEmoticon