Salm 30
Lawmhnak Thlacam
1Maw BAWIPA, nangmah nih
na ka khamh i
ka ral kha ka cungah diriam in
na umter hna lo caah
kan thangṭhat.
2BAWIPA, ka Pathian, nangmah sinah
bawmhnak hal in ka au i
na ka damter.
3Mithikhua in na ka kirter ṭhan.
Khor Thukpi chung i a vung kalmi
hna sinah kaa tel ve nain,
ka nunnak cu na ka pek ṭhan.
4Nannih a mithiang hna, BAWIPA cu
thangṭhat u;
A Thiangmi Pathian nih
a tuahmi kha philh hlah u law
amah kha lawm u.
5A thinhun cu caan tawite chung
lawng a si;
a ṭhatnak tu nih cun chantlung
a nguh.
Zan ah mitthli tlaknak
um hmanh sehlaw
zinglei ah cun lawmhnak
a ra ṭhan ve.
6Him tein ka um kha ka hngalh i
"Ahohmanh nih an ka tei bal lai lo,"
ka ti.
7BAWIPA, ka cungah na ṭha ko;
tlang cungah a ummi ralhruang
a him bantukin
him tein na ka umter.
Sihmanhsehlaw na ka thuhtak tikah
ṭihnak in ka khat.
8BAWIPA, nangmah cu kan auh,
ka bawm ko sawh, tiah
kan nawl.
9Ka thihnak cun zei ṭhatnak dah
a chuak lai?
Thlan i ka va kalnak cun zei miaknak
dah a chuak lai?
Mithi nih an in thangṭhat khawh
maw?
A dong lomi na ṭhatnak cu an chim
khawh maw?
10Maw BAWIPA,
ka bia cu ka theihpiak law
ka zaangfah tuah!
BAWIPA, ka bawm tuah!
11Ka ngaihchiatnak cu
lunglawmh lamnak ah
na ka thlenpiak cang,
ka mithi ngaihnak puan cu
na ka lak piak i
lunglawmhnak puan kha na ka pek.
12Cucaah dai tein ka um lai lo;
nangmah cu kan thangṭhat ko lai.
BAWIPA, nangmah cu ka Pathian na si,
a zungzal in kan thangṭhat lai.
Hi salm cu caṭialtu hi fak tuk in a rak zaw i cu a zawtnak in a damnak lawmhnak bia Pathian sin ah a hun chimmi a si. A zawtnak nih a rak thihter dengmang. A sualnak ruang ah Pathian cu a cung ah a thin a hung i cu a sualnak ruang ah Pathian cu a damnak hrampi a si kha a thei lo. Cutikah harnak le mitthli tlaknak nih a hun den. Pathian cu a fuh ṭhan, a hun ṭahhnawh tikah Pathian nih a zunngaihnak puan kha a hawh piak i lunglawmhnak puan a aihnak kha kan hun hmuh. Hi salm cu Judas Maccabaeus nih biakinn a pekchanh ṭhannak (164 B.C) ah khan an rak rel. Hi lio ahhin cun pumpak hmuhtonmi ca lawng ah si lo in miphun huap in Pathian sin lunglawmh raithawinak an tuahmi ah an hman.[1] Tyndale le bang nih cun hi salm hi a hun uar ngai ve i zunngeihnak in lunglawmhnak ah ti in a tlang a tar piak ve.[2]
Caang khatnak: Bawipa nih fak tukin a zawtnak in a khamh i aa lawmhnak caah Pathian cu a thangṭhat. Hi caang i ka ral hna a timi hi miṭhalo hna kha an si i Pathian aa bochannak le a zumhnak cungah a nihsawh i zei i a rel lomi hna kha an si. Hi bantuk mi hna nih a cung i diriam in an um khawh lomi cungah a Pathian a thangṭhatnak a si.[3]
Caang hnihnak: Nangmah nih na ka damter tiah Pathian cu a lawmh. Pathian lawnglawng hi damtertu a si kha a zumh (Ex. 15:26). Israel miphun nih hin zawtnak le damnak hi an pahnih tein Pathian sin in a rami a si tiah an zumh (Det. 32:39). Zei bantuk damnak hmanh hi Pathian bochannak ah aa hngatmi a si ti kha an pomning a si (cf. 2 Siang. 20:1-7). Damnak caah Pathian fuh lo in thil dangdang a fuh panhmi cu Pathian cungah zumhawktlak lo (titsa ngei lo) a si tiah an pom (2 Siang. 1:2-8). A tlangpi in an pommi pakhat cu sualnak nih zawtnak le vanchiatnak a chuahpi an ti, asinain zawtnak paoh hi cu a si lem lo tiah an ruahnak zong a um len ve i hihi thilhar ngai pakhat an i el lengmang vemi cu a si (cf. Slm 107:16-20).[4]
Caang thumnak: Khor Thukpi (Sheol: Slm 28:1) chung in na ka chuah tiah a hun ti tik ah tikhor i balṭin in ti kan hun than i balṭin kha tikhor in kan hun chuahpi bantuk khi a si (cf. Slm 40:2).[5] Damnak hi Mithikhua chungin khamh a si tiah an zumh. Hika i mithikhua a timi hi Sheol kha a si i Sheol ti tik ah Israelmi hna an lungthin chungah a ummi cu zawtnak te hna, thazaang derthawmnak te hna, Pathian kaltaaknak te hna hi Sheol nih a kan pekmi ziaza an si tiah an ruah. Pathian nih cu dirhmun in a khamh hna lo ahcun an thi taktak i Sheol hmun ah an kal taktak tiah an pom (cf. Slm 88:5; Job 30:32). Ka nunnak cu a ka pek ṭhan tiah a hun i lawmh ngaimi hi Pathian nih a kaltaak lonak kha a si. Thihnak le nunnak hi an chimkemmi a si zungzal; nunnak ah thazaang a dertertu thil paoh hi thihnak phun i an ruah lio ah Pathian nih a hlawt lo i a damternak cungah aa lawmhnak kha a si (Slm 119:25).[6]
Caang linak: Hi caang i mithiang hna a timi hi Bawipa cungah zumhawktlak (titsa ngeimi) a simi hna kha an si. Annih nih Pathian min thiang kha an thangṭhat, a ruang cu ngaihthiam an sinak le khamh an sinak i an i lawmh ruangah khan a si.[7]
Caang nganak: Pathian thinhunnak hi a dawtmi hna nunzia dawh chimhnak caah chimhhrinnak phun a si. Minung nih sualnak le palhnak chungah an tlak thai nakhnga lo ding caah cawnpiaknak a si, anmah rawhnak le hrawh duh ah a thin a hun hnawhmi hna a si lo. Cucaah caan tawite lawng a thin a hung a ti. Zan ah ṭahnak a um ko lai nain zinglei ahcun lawmhnak an hmu lai a ti. Hika zawn ahhin hi zanlei ṭahnak hi thihnak he tahchunh a si ve tawn i zinglei lawmhnak hi thawhṭhannak he tahchunh a si ve tawn.[8]
Caang ruknak le caang sarihnak: Salm caṭialtu a zawt hlan ah a chimmi bia an si i tlawmpal te cu a hun i porhlaw deuh i a chimmi cu: "zeihmanh nih a ka hnir kho in an ka ṭhial kho lai lo" a rak ti. Pathian mithmai peknak thawngin tlangcung hmanh ah a dir kho ti kha a langhter. Sihmanhsehlaw dam lonak nih a hun phaak tikah cun a lung a hun pem i Pathian nih a thuh taak (cf. Slm 104:29) ahcun lungrawhnak le ṭihnak in ka khat a ti (cf. Job 10:1-7).[9]
Caang riatnak: Cuticun Pathian sin ah a hun ṭap i bawmh hal in Pathian cu a hun auh ṭhan. Pathian kehram ah a nun a hun i chep ṭhan.[10] Cirik a kai cangmi thir cu mei ah kan hun rawh i fak tukin linhnak kan hun pek ṭhan tik lawng ah hman khawh ṭhan a si bantukin vailam tah nunnih a kan den ve tik lawngah Pathian fuhpanhnak lungthin kha kan hun ngei kho ṭhan tawn. Pathian nih a thuh taak ding kha David a thin phan tukmi cu a si i cucaah fakpi in Pathian bawmh a hun halnak cu a si.[11]
Caang kuanak le caang hranak: Mithikhua ah khamhnak caah ruahchannak a um lo zia kha a langhter i zeihmanh nih miaknak le hlawknak a chuakpi khawh lo kha a hun langhter (Slm. 88:10ff; 115:17; Isa. 38:18ff).[12] Cuticun Salm caṭialtu nih hin a sining, amah le amah aa hmuhning kha biapi ngai in a hun langhter. Pathian zaangfah velngeihnak lawnglawng kha a hun i bochanmi a si i ka bawm ko sawh tiah bawmhnak cu a hal.[13]
Caang hleikhat le hleihnihnak: Hi caang hna cu lunglawmh raithawinak (thanksgiving) tiah kan hun ti khawh ko lai. Pathian sin in bialehnak a hun hmuhnak kha an si. Zunngeihnak cu an ziam cang i lunglawmh hlasaknak nih a ai a rawlh cang. Lungrawh in puanchia tlek i hruk i vutcam i phulhnak dirhmun khan puaizawh lai i aihmi lawmhnak puanfual aihnak ah a sining cu a hun thlen piak cang (cf. Slm. 26:6-7; 118:27-28). Cu bantukin Bawipa nih a cung i a tuahmi thil ṭha ruangah daite in a um kho lo i Pathian cu a thangṭhat.[14]
[1] IB, 158.
[2] Tyndale, 128.
[3] Oesterley, 203.
[4] Anderson, 240-241.
[5] NIBC, 576.
[6] Anderson, 241.
[7] Barker, 831.
[8] Anderson, 242-243.
[9] Oesterley, 204. Hi tlang hi Zion tlang kha a chim duhmi si dawh a si i hninh khawh zong a si lomi, dirhmun fek a ngeihnak hmelchunhnak a ngei (1 Siang. 15:4); NIBC, 576.
[10] Ibid.
[11] Calvin, 156.
[12] NIBC, 576.
[13] Barker, 831.
[14] IB, 162.
Credit: Rev. Dr. Lal Pek Lian Facebook
EmoticonEmoticon