Salm 31
Pathian Bochan Thlacamnak
1Himnak hmuh duh ah kan fuh,
Maw BAWIPA,
ka sunghter sawh hlah.
Nang cu a dingmi Pathian na si,
ka khamh ko sawh, tiah kan nawl.
2Ka thlacamnak cu ka theihpiak law
ka khamh ko sawh;
ka himnak lungpi si law
ka khamhnak ding caah
a fekmi ralhau si ko.
3Nangmah cu ka lungpi le
ka ralhruang na si,
bia na ka kamh bangkhan lam
ka hmuhsak law ka hruai tuah.
4An ka chiahhnawhmi rap khan
ka veng ko;
nangmah cu himnak hmun na si.
5Nangmah kut chungah ka thlarau
ka chiah,
BAWIPA, nangmah nih
na ka khamh lai,
nang cu zumhawktlakmi
Pathian na si.
6Siasal santlailo a biami cu
na huat hna,
asinain kei cu nangmah kha
kan bochan.
7A fekmi na dawtnak ruangah ka lung
aa lawm lai i ka tha a nuam lai.
Ka temhinnak kha na hmuh i
ka harnak kha na hngalh.
8Ka ral hna kut chungah
na ka phakter lo,
himte tu in na ka zohkhenh.
9Harnak chung i ka um caah,
Maw Pathian ka zaangfah ko;
ka ṭah tuknak ah ka mit zong
a phing dih i
ka tha zong a dih cikcek cang.
10Ka nun chung kum hna cu
ngaihchiatnak in
a liam i hrum ainak in an khat,
Harnak tam tuk ka inmi ruangah
ka thazaang cu a lo dih i
ka ruh hna cu an rop thluahmah.
11Ka ral nih capo ah an ka saih,
ka innpa nih an ka nihsawh;
a ka hngalmi nih an ka ṭih i
lam i an ka hmuh tikah
an ka leektaak.
12Rak thi cang ning law cu bang,
mi vialte nih an ka philh i
hlonhmi thil bantuk ka si.
13Ka ral tampi nih a thli tein
an ka congoih,
ṭihnak nih a dum in an ka dum;
ka loh nakhnga ding khua kha
an khaan i
keimah thahnak ding khua kha
an ruat lengmang.
14Sihmanhsehlaw kaa bochanmi cu
nangmah na si, maw BAWIPA;
nangmah cu ka Pathian na si.
15Ka caan cu na kut chungah a um dih,
ka ral hna kut chungin
ka khamh law
a ka hremtu hna kut chungin
ka khamh tuah.
16Kei cu na sal ka si, ka cungah
zaangfahnak ngei ko;
a fekmi na dawtnak ruangah
ka khamh tuah!
17Maw BAWIPA, nangmah kha kan auh;
ka sunghter sawh hlah!
Miṭhalo cu sung hna seh, mithikhua
ah dai tein um hna seh.
18Lihchimmi kha daihter hna-
annih cu miporhlaw, miruamkai,
bia songpuam in miding mi
kong ceih a hmangmi an si.
19Nangmah an ṭihtu hna caah
na chiahmi thil ṭha cu
zeitluk in dah khuaruahhar an si.
Mikip hmuh ah na tuahmi thil ṭha cu
zeitluk in dah khuaruahhar a si,
nangmah an bochanmi cu
na huhphenh hna.
20Mi nih thah an timh hna caah
na thlam chungah khan
na thuh hna i
an ral pawl nih an nihsawh
khawh hna nakhnga lo
na thla tangah na chiah hna.
21BAWIPA cu thangṭhat ko u!
Ka ral nih an ka kulh i an ka tuk tikah
a dawtnak cu khuaruahhar in
ka cungah a langhter.
22Ka thin a phang i na sinah
umter ti loin
na ka dawi cang rua tiah ka ruah.
Sihmanhsehlaw nangmah sinah
bawmhnak hal in ka au tikah
ka aunak kha na rak theih.
23Nannih a mithiang vialte hna,
BAWIPA cu daw ko u!
BAWIPA nih zumhawktlakmi cu
a huhphenh hna,
sihmanhsehlaw miporhlaw cu
fak piin dan a tat hna.
24BAWIPA cungah a ruahchannak
a chiami vialte hna,
lungṭhawng le thazaang ṭhawng in
um ko u!
Pumpak ṭahnak hla a si i cu chungah cung lunglawmh raithawinak zong a hung lang thiam ngaingai. Ṭhen thum ah ṭhen a si i cang khat in caang riat tiang hi mipa cu a ral hna nih an dawi i hnahnawhnak an pek lio caan ah Pathian aa bochannak thlacamnak a si i David dirhmun he khan a hun i tlak ngaingai (cf. 1 Sam. 23:15-29); ṭhen hnihnak cu caang kua in hleiriatnak tiang a si i mi pakhatkhat cu a fak tukmi zawtnak nih a den i a hawi le hmanh nih an hlawtnak a tonmi kha kan hun rel khawh (e.g. Job), hi caang chung hna ahhin lih puhnak le hremnak zong a tong fawn i Jeremiah sining he khan a hun i tlak ngaingai ve; cuticun ṭhen thumnak cu caang hlei kua in kul le li tiang hi a si i luatnak cu pek a sinak kha kan hun rel khawh (Slm 6). Baibal thiam sang cheukhat nih cun Salm pahnih kha fungkhat ah an fonhmi zong a si kho men tiah a ruatmi zong an um. [1]
Caang khatnak: Himnak hmuh duh ah kan fuh timi bia hi ṭahnak hla a sining te a si tawn i Salm 71:1-3 tiang he hin an hun i khat ngaingai i Baibal thiamsang hna nih cun Salm 31 hi a hram deuh a si lai tiah an zumh. Ralzam nih biakinn chungah himnak hmuh duh ah Pathian a fuhpanhnak phun kha a si (cf. Ex. 21:12ff; 1 Siang. 1:50) i thlarau lei himnak le hrimhṭhannak caah Pathian sin i i dor zong kha a si (cf. Isa. 57:13). Ka sunghter sawh hlah a hun timi ahhin zeitik hmanh ah ningzahnak hmu hlah ning ti zong in fian khawh a si i a nun chung vialte Pathian vennak kha a kawlnak a si (Slm 25:2; cf, Ex. 21:6). Nangmah cu a dingmi Pathian na si tiah a hun bochannak aw hi Pathian nih a mi hna sin i bia a rak kamhnak hna kha a hun char ṭhannak a si. Na dinnak chungah dor ka duh ko tinak a si.[2]
Caang hnihnak: Ka thlacamnak ka theihpiak timi cu ka thlacamnak ka let ko sawh ti he hin a sullam aa khat (cf. Slm 102:2). Hika i ka khamh ko sawh a hun timi ahhin riangrang in ka khamh ko ti in lung pem khawh a si (Slm 71:2) a ruang cu a ral hna nih hna an hnawh tuk tik ah lakhruak tuk in bawmh a herh caah a si. Cuticun Bawipa cu aa dornak lungpi le a fekmi ralhau a si kha aa bochan (Slm 71:3; cf. 18:2; 42:9 le 27:1).[3]
Caang thum in caang nganak tiang: Bawipa cu a lungpi le a ralhruang a si i annih cu a mi, bia a kamhmi hna a mi an si. A ral nih rap an chiah hnawh i foinh an timh peng ko nain Bawipa cu a liannganmi a Tuukhal a si kha aa bochan. Bawipa cu a himnak a si caah Amah chungah a thlarau cu a chiah (cf. Lk. 23:46). Salm caṭialtu nih hin a lungthin vaivuanh lai kha a phaang ngaingai, Pathiancu a zumh i aa bochan taktak. A ding i zumh awktlak Pathian kut chungah a nunnak cu aa ap.[4]
Caang ruknak in caang riatnak tiang: Hika i ka ral le a timi hna hi siasal biami an si. Pathian nih cu hna kutchung in a khamh ding hrimhrim a si ti kha aa bochan, a ruang cu Amah kha a zumh caah a si. Cu bantuk harnak chungin a rak khamh tawnmi a hmuhtonmi kha a hun ruat ṭhan i thlacamnak he Pathian cu a thangṭhat: "Na dawtvelngeihnak chungah i lawm ning law ka tha nuam ko seh" a ti.[5]
Caang kuanak: Ka zaangfah ko tiah a hun nawlmi cu na mithmaiṭha ka pe ko sawh (Slm 6:2) ti he hin a sullam aa khat. A zawt tuk caah a lungretheihnak kha Pathian sin i a phuannak a si. A lungfah tuk ruang i a ṭahnak nih a mit zong a phing dih ti kha a hun langhter. Pumsa i a zawt zong a si kho i lungthin lei retheihnak le fahnak a pe khomi harnak phun kip kha a si kho tiah ruah a si (Slm 6:7). Hi vialte harnak a tonmi chungin Pathian zaangahnak a hmuhnak ding caah thla a cam a si.[6]
Caang hranak: A rak i lawmhnak vialte kha harnak a tonmi ruangah an lo dih a ti. A nunnak ah a pumsa, a ruh tiang hmanh nih fahnak a tuarinnak kha a hun langhter. Hi nih a hun langhtermi cu a minung sinak a nunnak dihlak kha a chim duhmi a si i pumsa le thlarau lei tiang in a tuarinnak kha a si i thihnak tiang hmanh a phaakpi deng ti kha a langhter. A harnak kha a fah tuk caah Pathian zaangfahnak kha a hngak cawk ti lo. Rianrang in a sining chung i hun zuan hnawh kha a duhmi cu a si.[7]
Caang hleikhatnak: A ral hna nih an huat ning hi ṭih a nung ngaingai. A innpa hmanh nih harnak a ton ding a si ko ti phun in an hmuh cang. Capo saih awk le chimawk tahchunhnak ah an hman cang (cf. Slm 74:22). Amah a hmutu hna nih an zaam taak (cf. Slm. 38:11; 88:8,18). Pathian nih dan a tatmi a si tiah an ruah ruang ah kaltaaknak hi a tonnak cu a si.[8]
Caang hleihnih le hleithumnak: Mi vialte nih an philh i minung cazin ah an chia ti lo. Mi thinlung ruahnak ah a caam ti lo, a kuaimi um bantuk in hlonh a si cang. Mi zapi caah man a ngei ti lo, amah cu an doh dih. Ka ral tampi tiah a hun timi hi a liannganmi a ral tampi ti duhnak a si i amah lohralnak ding khua an khaang, cucu a faktukmi tukforhnak a tonmi cu a si.[9]
Caang hleili le hleinganak: Salm caṭialtu cu ṭih a nung tukmi ral nih an kulh i hawi sin in pheonak a ton bu in Pathian cu a zumh i aa bochan. Nangmah cu ka Pathian na si tiah Pathian cung I lungsihnangam tein a umnak le zumhawktlak a sinak kha a hun langhter (Slm. 143:10; cf. Slm 86:3; Isa. 25:1; Jer. 31:18). Ka caan cu na kut chungah a um a hun timi sullam cu ka vanṭhat vanchiatnak vialte cu na kut chungah a um tinak a si. Kawlholh cun kanciama (fate) tinak kha a si i aa tinhmi le a sining vialte kha Pathian kut ah a um ti kha a chim duhmi a si.[10]
Caang hleiruk le hleisarihnak: David nih hin Pathian sin in mithmaiṭha a hmuh khawh naklai Pathian a fuhpanhnak a si i harnak ruangah a mui tukmi faknak a tonmi chungin Pathian zaangfahnak thluachuah kha a hal (Nam. 6:25; cf. Slm. 84:9, 11; 123:1-4). Miṭhalo hna kha cu mithi khua ah daite in um hna seh tiah a hun timi hi Sheol ah ti pil bang va pil dih hna seh ti zong in fian khawh a si i David nih hin a ral hna cu cawl kho lo in um hna seh ti kha a duhnak cu a si.[11]
Caang hleiriatnak: Dinnak le midingmi a dotu vialte kha daihter hna ti kha a hun chim duhmi a si i hi bantuk mi hna cu milihchim, miporhlaw, miruamkai an si tiah a hun langhter. Ruruhranghrang le bongal ngaiin a ummi hna an si i miding mi kha an doh hna. A dingmi Pathian ralchanh tinak zong a si kho (cf. Dan. 7:9, 13, 22).[12]
Caang hleikua in kul le hnihnak tiang: Bawipa cu dingte in rian a ṭuan i Amah a ṭihzahmi hna cungah a ṭha. Hi bantuk mi hna cu tukmi khualipi bantuk in namnetnak tong hna hmanhsehlaw Pathian umpinak cu an caah i dornak bantuk a si i an himnak a si. Pathian a ṭihzahmi hna cu 'khuaruahhar a dawtnak' chungah an um i hnursuannak phunphun le dohdalnak phunkip tong hmanhsehlaw lileng in a um lai lo. Bawipa cu thangṭhat ko u tiah a hun chim khawhmi nih Pathian nih a khamhnak cung i aa lawmhnak a si i hlawtmi a si lo kha a hu langhter.[13]
Caang kul le caang thumnak: Bawipa cu daw ko u (Slm 26:8; 119:47; cf. Deut. 6:5, 10:12) tiah a mithiang hna cu a hun fial hna (Slm 30:4; 86:2). Minung prohlawtnak nih hin minung sunparnak kha a kawl tawn. Cucaah Pathian cungah zumhawktlak in um kha fial hna. Porhlawtnak nih cun rawhralnak ah a hruai ko hna lai (Phut. 16:18; cf. 29:23).[14]
Caang kul le cang linak: Ṭhawng ngai in um ko u (Slm. 27:14) a ti. Pathian a hngakmi hna cu ti tikah a chim duhmi cu ruahchannak in Pathian nih a biakamnak a tlinter lainak a hngakmi hna tinak a si i Amah a zum i aa bochanmi hna tinak a si (cf. Slm. 33:18; 69:3; 147:11). A dawtzaangfahnak le Pathian ṭhatnak hngah ti zong in fian khawh a si.[15]
[1] NIBC, 576.
[2] Anderson, 247.
[3] Ibid.
[4] Barker, 831-832. Rap foihter timi hi salm caṭialtu nih a lung a pem ngaingaimi kha a si i a ral nih amah thah awk i an i timhcianak phun kha a si (cf. Slm 9:15; 37:7; 57:6; 140:5).
[5] Oesterley, 206.
[6] Anderson, 249-250.
[7] Barker, 832.
[8] Anderson, 250-251.
[9] Calvin, 160. NIBC nih cun Jeremiah 22:28 hi caang hlei hnih he epchun in rel a kan fial i caang hleithum caah hin Jeremaih 6:25; 11:9; 18:23; 20:3,4 10; Ṭah. 2:2 hna hi rel chih a kan fial; NIBC, 577.
[10] Anderson, 251-252. Hika i kanciama (fate) a hun timi (cf. Isa. 33:6) hi thil pakhat cung i Pathian nih bia a ceih lai ni le caan a hun khiahmi tinak zong si dawh a si (cf. Phungchimtu 8:5; Job 24:1); IB, 166 ah zoh.
[11] Tyndale, 132.
[12] Anderson, 252.
[13] Barker, 832.
[14] Anderson, 253-254.
[15] Ibid.
Credit: Rev. Dr. Lal Pek Lian Facebook
EmoticonEmoticon