Salm 37
Miṭhalo Hna Le Miṭha Hna Donghnak
1Miṭhalo hna ruangah
awklokchong in um hlah
ṭhatlonak a tuahmi kha
hngar hna hlah
2a romi ram kung bantukin an um lai i
belhhring bantukin an um lai.
3BAWIPA cu i bochan ulaw ṭhatnak kha
tuah u;
ram chungah hin um u law him tein
khuasa u.
4BAWIPA kha i bochan u law
nan lungthli tum kha
an pek hna lai.
5Na nunnak kha BAWIPA pe tauh,
amah kha i bochan law amah nih
an bawmh lai.
6Na ṭhatnak kha ceunak bantukin
a ceuter lai i
na dinnak kha chunlai bantukin
a ceuter lai.
7BAWIPA hmai ah cun dai tein um ko law
zeidah a tuah lai ti kha lungsau in hngak ko;
thil ṭha lo an i tinhmi a tuah kho
lengmang mi hna le
an rian ṭuannak ah a hlawh
a tlingmi hna kong ah
zei poi lo in va um ko.
8Thinhung in um hlah u, hrut sual
hlah u!
lung rethei in um hlah u!
cu nih cun zeihmanh
an ṭhathnem hna lai lo.
9BAWIPA aa bochanmi cu him tein
ram chungah hin an um ko lai;
sihmanhsehlaw miṭhalo cu
ṭhawl an si lai.
10Luklak ah miṭhalo cu an lo ko lai,
na kawl hna hmanh ah
na hmu kho hna lai lo
11Sihmanhsehlaw mi toi ah aa dormi cu
ram chungah hin him tein
an um lai i
daihnak kha tlamtling tein
an hmuh lai.
12Mithalo nih miṭha hrawhnak ding
khua kha a khan i
a hacang a rial hnawh.
13Sihmanhsehlaw BAWIPA nih cun
mithalo cu a nihsawh men ko,
zeicahtiah luklak ah a rawh lai kha
a hngalh.
14Mithalo nih cun an nam kha an i zuh i
an likuk kha an i hruai i
sifak le retheimi kha thah le
miṭha mi nawn kha an duh;
15sihmanhsehlaw anmah nam lila nih
an keng ah a chunh hna lai i
an likuk cu a kiak dih lai.
16Miṭha nih a ngeihmi thil tlawmte cu
mithalo nih a khonmi thil tampi
nakin a ṭha deuh;
17zeicahtiah miṭhalopa cu BAWIPA nih
a thazaang a chuh lai i
miṭha cu a huhphenh lai.
18BAWIPA nih a nawl a zulmi cu
a zohkhenh hna i
ram cu anmah ta a si zungzal lai.
19Caan ṭhalo a tlun tikah sifah
an ing lai lo,
mangṭam a tlun tikah ei awk a za
an ngei lai.
20Sihmanhsehlaw miṭhalo cu an thi lai;
BAWIPA ral cu ramlak pangpar
bantukin an lo lai;
meikhu bantukin an ṭian lai.
21Miṭhalo nih cun thil a cawi hna tikah
a cham ṭhan ti lo,
sihmanhsehlaw miṭha cu
vel a ngei i nun a siang.
22BAWIPA nih thluachuah a pekmi cu
ram chungah hin him tein
an um lai,
sihmanhsehlaw chiat a serhmi cu
ṭhawl an si lai.
23Minung hi a kalnak ding lam
a hmuhsaktu cu BAWIPA a si,
Amah duhnak a tuahmi cu
a huhphenh hna.
24A tluk sual zongah a ril lan lo,
zeicahtiah BAWIPA nih a kut in
a thawh ṭhan.
25Ka rak no i atu cu ka tar cang,
asinain hi vialte chungah hin
miṭha cu
BAWIPA nih a hlawt kha
ka hmu bal lo i
a fale zong rawl hal in an vah kha
ka hmu bal lo.
26Siang tein mi kha a pe zungzal hna i
a coih zungzal hna,
cun a fale kha thluachuahnak an si.
27Ṭhatlonak kha mertak u law ṭhatnak
kha tuah u;
cun hi ram chungah hin
nan um zungzal lai;
28zeicahtiah a hmaanmi thil kha
BAWIPA nih a duh i zumhtlak a simi
a mi kha a kaltak bal hna lo.
annih cu a huhphenh zungzal hna,
sihmanhsehlaw miṭhalomi hna
an tefa cu ṭhawl an si lai.
29A dingmi cu ram chungah him tein
an um lai i
ram cu zungzal in anmah ta a si lai.
30Mifim nih cun fimnak bia an chim i
ahmaanmi bia kha an ka in a chuak.
31A Pathian nawlbia kha
a lung chungah aa chiah i
zeitikhmanh ah a kaltak lo.
32Miṭhalo nih cun miṭha kha
aa ngiat aa ngiat i thah a zalh;
33sihmanhsehlaw BAWIPA nih a ral kut
chungah khan miṭha cu a kaltak lo,
tazacuai a si zongah khan
sual phawtnak a phakter lo.
34BAWIPA cu i bochan u law a nawl kha
zul tuah u;
ram kha co awkah thazaang
an pek hna lai i
miṭhalo cu pawnchuah an si kha
nan hmuh lai.
35Miṭhalopa pakhat, mipuarhrang ngai
a si i
Lebanon sidar thingkung bantukin
mi vialte a iap dih hna kha
ka rak hmuh;
36sihmanhsehlaw tlawmpal ah khin
cuka ah cun ka va kal ṭhan i
cu pa cu a rak um ti lo;
ka kawl len nain ka hmu ti lo.
37Miṭha khi zohhmanh u, miding khi
zohhmanh u;
daihnak mi cu tefa an ngei;
38sihmanhsehlaw misual cu hrawh
an si dih,
an tefa cu hloh an si.
39BAWIPA nih miding cu a khamh hna i
harnak caan ah a huhphenh hna.
40A bawmh hna i a chuah hna;
annih nih huhphenhnak hmuh
awkah an fuh caah
miṭhalo hna kut chung khan
a khamh hna.
Hi salm cu Phungthlukbia cauk bang fimchimtu salm tiah auh khawh a si ve. A ṭialtu hi kum khua lei in upa a si cang i hmuhtonmi tampi a ngeihmi kha ṭhangthar fa-nau hna caah cheuhbauh duhnak lungput he a ṭialmi si dawh a si. Aa tinh bikmi cu nunnak ah ningcang lo thil tampi kan tonmi hna lak ahhin Pathian a ṭihzahmi hna kha pehzulh in Pathian an i bochan khawh naklai thazaang a pek hna. Nunnak i ningcang lo thil kan tonmi hna hi zungzal a nguhmi an si lo zia kha theihter aa zuam.[1]Harnak chungah hin lungsau in intuar khawh kha aa tinhmi a si i Pathian mi hna nih cun cu intuar khawhnak cu an ngeih caah zungzal a hmunmi laksawng kha an co lai ti kha an hngalh i cu nih cun caan tawite chung lawng a nguhmi harnak kha a tei khawh tuk ti kha a si.[2]
Caang khat le caang hnihnak: Miṭhalo hna an thancho ruangah thinhung le ingpuan in um a herh lo. A dik lomi thil a tuah i hlawh a tlingmi hna ruang zong ah thinhun ding a si lo. Annih cu an lo dih zau ko lai. Hi bantuk cawnpiaknak phun hi Phungthlukbia 24:19 (cf. Phut. 3:21; 23:17; 24:1) zongah kan rel khawh. Thil thalo a tuahmi hna cu Pathian aa bochan i thiltha a tuahmi hna he aa ralchanhmi an si (Slm. 28:3; 119:3; cf. Zefe. 3:5, 13). Hi bantuk mi hna cu ram ro bantuk an si a ti i hika i ram kung tiah a hun timi hi hmanthlak bia a si i caan sau a nguh lomi he a tahchunh (cf. Job 14:2; Slm 90:5ff., 103:15, 129:6; Isa. 40:6; Matt. 6:30, Jeims 1:10, 11).[3]
Caang thumnak: Bawipa bochan le ṭhatnak tuah kha a fial hna. Pathian bochan hi lungchung i a ummi sivai bantuk a simi hnahchuahnak te hna thinhunnak te hna a damh kho tu a si (cf. Slm 4:5; Phut. 3:5, 16:20, 28:25f.; Isa. 26:4). Pathian cung i zumhawktlak in a ummi hna caah thluachuahnak he ram chung ah him tein an um lainak kha a hun chim. Kamhmi ram, Kanaan ram i an um khawh nakding kha a chim duhmi a si i hi thluachuah hi nawl a ngaimi hna nun theipar cu a si. Ram chung i him tein an um lai timi zawn i himnak le kilvennak hmanthlak nih a langhtermi cu himnak in a khatmi ramhring lak ah ti he hin a sullam aa khatmi a si i rumnak he zong a tahchunh rihmi a si (cang 16).[4]
Caang linak: Hi Baibal caang hi mi tampi nih thlarau thazaang ah an i laakmi a si. Caang khatnak in caang linak tiang hi miṭhalo hna ruang ah lungrethei le thinphan in um awk a si lo zia; Pathian i bochannak le Amah hngalhnak nih lawmhnak a pek zia, lungsau in an umnak ding kha a tlangpi in a cawnpiakmi cu a si.[5] Pathian nih hringtu Pa bantukin a zohkhenhnak hna tang ah lungawṭawmnak zeihmanh ngei lo in aa dormi le a zummi nih an lungthlitum saduhthah an hmuh lai a ti.[6] Anderson nih cun Yahweh Pathian cungah aa hngatchanmi nih cun an rak i ruahchanmi vialte kha tling te in an hmuh lai tiah a ti i cu nih cun an lung di a riam ter lai a ti (cf. Slm. 20:4f; 21:2; Matt. 6:33; Lk. 12:31). [7]
Caang nganak: Bawipa lei ah na nunnak lam cu lungthin dihlak in i pe tuah ti zong in hi caang hi lung pem khawh a si (Slm. 22:8; Cf. Phut. 16:3; 1 Pet. 5:7). Hi caang nih a hrampi in a chim duhmi ahhin ‘Na lungretheihnak vialte kha Bawipa pe law’ (Slm 55:22; 103:7) ti he hin a sullam aa khat. Cuticun Pathian duhning ah na lam vialte kha chia law Amah cu i bochan ti kha a hun nolh, cu ti na tuah ahcun amah nih an bawmh lai a ti (cf. Phut. 16:20, 28:26).[8] Hika i an bawmh lai timi ahhin G. R. Driver nih a fianter ning ahcun ‘Amah nih a mithmai an hoih lai’ ti zong in lungpem khawh a si.[9]
Caang ruknak: Pathian cu a dingmi le duhdanhnak zeihmanh a ngei lomi Bawipa a si i cu a dinnak cu a sunparnak bantukin karhter a duh. Cu sunparnak cu chunlai ni bang a ceu i zeihmanh nih an khuh kho lo. Miṭhalo hna ruangah miding hna cu fahnak an tuar men ko lai, asinain Pathian dinnak chungah ruahchannak he an nung lai i ṭhatlonak kha Pathian dinnak in an tei lai.[10]
Caang sarihnak: Pathian nih zeidah a tuah lai ti kha lungsau te in hngah kha a fial. Hi a hngahnak ahhin i zizang hleng lo in, lungfim te in hngah kha a fialmi cu a si. Miṭhalo hna an hlawhtlinnak i aa buaipimi hna cu sualnak chungtu ah an tla ve tawn. Hi bantuk miṭhalo hna cu thil ṭhalo an tuahmi chungin hlawhtlinnak an hmuhmi kha a si i anmah ruangah lungretheihnak i pek lo ding a si.[11] Pathian biaceihnak hna daite in hngah kha a fial hna, vawlei thilri i hlawhtlinnak hmuh kha thluachuahnak a zik a si lo zia kha cawnpiak a duh hna (cf. 73:3; Job 42:10ff). Pathian lawnglawng nih an herh taktakmi bialehnak aphi cu a ngeih ko ti kha hi caang nih hin a hun fianter.[12]
Caang riatnak le caang kuanak: Hi caang i thin hunnak a hun timi hi Bawipa cung i thinhunnak kha a chim duhmi cu a si ko. Hi ingpuan thinhunnak hi an hmuh an tonmi chungin a chuakmi a si; a ruang bik cu miṭhalo hna cu harnak a tong lomi an lawh tik ah cucu an celh ve lomi kha a si; minung nunnak ah cucu duhdanh ngeihnak nganpi chungin a chuakmi ko khi an lo tawn. Cucaah lungsaunak kha a hun biapit tuknak cu a si, zeitintiah thinhunnak nih cun ngaihchiat chinchinnak tu kha chuahpi. Cucaah thinhung lo in Bawipa i bochan kha a hun hneek hna i cu ti an um khawh ahcun kamhmi ram kha an co ko lai. Miṭhalo hna cu thawl le hlonh an si ko lai ti kha a cawnpiak hna.[13]
Caang hra le caang hleikhatnak: Miṭhalo hna cu luklak ah an kong theih a si ti lai lo (cf. Job 24:24; Slm. 44); sihmanhsehlaw mi toiah aa dormi mi nunnem hna nih cun ram kha an co lai (cf. Matt. 5:5). Salm caṭialtu lungchung ah a langmi cu vawlei a ngeimi mi rum hna nih anmah bochan in an lo an ram chung i rian a ṭuanmi mi sifak hna a nehsawhnak hna kha a si. A ngaingai ti ahcun ram co tu taktak cu miṭhalo hna kha si lo in Pathian aa bochanmi, mitoidor kha an si, hihi Fimchimtu le Salm nih a tlangpi in a cawnpiak pengmi cu a si (caang 22, 27, 29, 34). Mithmuh i a hung ṭhang cuahmah mi miṭhalo hna, miding mi a nehsawh ngaimi hna kha a rauh hlan ah thumh an si lainak kha a chim, Pathian aa bochanmi hna nih zungzal lunglamwhnak le hnangamnak an hmuh lainak kha bia a kamhmi hna a si.[14]
Caang hlei hnih le hleithumnak: Miṭhalo nih thatlonak khua kha a khan (caang 7 le 32) i Pathian a ṭihzahmi kha hrawh ding ah an i tim. Sahrang nih an hacang an rial bantukin an rial hnawh hna. Huatnak mit in an zoh chih hna (cf. Job 16:9; Slm 35:16; 112:10; Ṭah. 2:16). Sihmahsehlaw miṭhalo hna cu Bawipa nih a nihsawh men ko hna (Slm 2:4). A ruang cu miṭhalo pa cu luklak ah a rawh lai ni kha a phan lai a ti (cf. 1 Sam. 26:10; Job 18:20; Obediah 12).[15]
Caang hlei li le hlei nganak: Hika i nam le likuk tiah hmanthlakbia a hmanmi sullam cu zaang ennak le namneetnak hna hi an si. Hihi miṭhalo hna hriam kha a si i an nun ah soisel awk a um lo i dinnak in a nungmi hna kha an nam in sah le an likuk in sifak mi hna hrem kha an i tinh mi cu a si (cf. 44:6; Phungthlukbia 29:27; Slm 7:10, 11:2, 32:11, 36:10). Cuticun salm caṭialtu nih felte in a hun dirpimi cu sualnak nih cun misual kha a donghnak ah a hrawh cikcek ti hi a si. Kha ṭhatlonak vialte kha anmah sin lila ah a rak kir ṭhan a ti (cf. Slm. 7:14; Jer. 2:19, 5:25, 6:21).[16]
Caang hlei ruk le hleisarihnak: Pathian a bia lo i vawlei ngeihchiah chawva a ngeimi nakin Pathian lei ah aa zuam i a ṭihzah mi nih tlawmte a ngeihmi ah khan lunglawmhnak a um deuh ti kha a hun langhter (cf. Phut. 15:16, 16:8). Cu bantuk Pathian a bia lomi miṭhalo pa cu Pathian nih a thazaang a chuh lai a ti, hika i thazaang chuh timi hi miṭhalo hna an ban cu a kiak lai ti zong in fian khawh a si. Hebru holh ahhin ban ti hi hmanthlakbia a si i a sullam cu thazaang ti asiloah ṭhawnnak tinak a si (Slm. 77:15, 89:10). Miṭha cu Pathian ṭhawnnak thawngin zeihmanh nih a ṭhawnter kho hna lo, a ruang cu Pathian kha an thazaang hrampi a si caah a si (cf. Job 22:8-9).[17]
Caang hleiriat in kul tiang: Hi caang hna ahhin “Miding mi hna nikhua le caan cu Bawipa nih a hngalh ko” ti in biatlang tlangkhat in fumtom khawh a si i cu nih sullam tam ial a ngei: (a) Pathian nih kan sining dihlak in a hngalh dih i kan herhmi a kan pek; (b) Pathian nih zei can dah kan nun lai kha a hngalh i kan donghnak tiang a kan cawmken (Slm 90:12); (c) Pathian nih cun vawlei i kan caan hna hi zungzal in Amah he kan um te lai nak i a thoknak lawng a si kha a hngalh ti hi a si.[18] Pathian nih miding mi hna cu a cawisan hna caah harnak caan ah an ning a zak lai lo i maangtam a tlun tik zong ah ei awk a za in an ngei ko lai a ti.[19]
Caang kul le caang khat le caang hnihnak: Hi caang hi a Hebru Baibal i caang an ṭhenning ahcun caang kulnak a si ko nain a hrilhfiahmi tu kha biapi ah kan chiah ko lai. Miṭhalo nih cun thil an cawi tikah cham ṭhan an duh ti lo, asinain miṭha cu vel an ngei i lungtho te in midang pek an sian caah Pathian ṭhawnnak cu an bia chungah a um i huham an ngei i thluachuah an pekmi hna nih ram kha an co i chiat an serhmi hna cu mibu nun khan hlawt an si.[20] Nun a siang i Pathian a ṭihzahmi thluachuahnak le miṭhalo hna an rawhralnak hmanthlak kha hi caang chung ahhin kan rel khawhmi a si i kan nun caah kan i cawn khawhmi cu Bawipa nih mithmai peknak a ngeihmi hna nih midang caah nun siannak an ngei kho ti hi a si.[21]
Caang kul le caang thum le caang linak: Hmanthlak bia in a hun langhtermi a si i ngakchia cu a lamhmi vawlei khan a ke a naal sual i a ril sual men ko lai, asinain a nu le a pa nih a tluk nakhnga lo a kut khan fek tein an tlaih (cf. 73:2, 23). Miṭha miding zong harnak le donhkhannak nih a hrial hlei hna lai lo, asinain Bawipa nih a bawmh ko hna lai ti kha a biakamnak kan hmuhmi cu a si.[22]
Caang kul le caang nganak: Tarpa bia a si i a hmuh tonmi chungah miding mi hna cu Pathian nih a hlaw bal hna lo i an tefa hna zong kutdawh in an vahvaih a hmu bal hna lo ti kha tehte a khaan mi cu a si. Asinain hihi a biafang ning bak in kan i char awk a si theng lo, zeitintiah miṭha le miding nih hin harnak kha an ton pengmi a si ko caah hin a si (caang 7, 12, 14, 19, 24, 32, 33, 39, 40). A chim duhmi taktak cu Pathian a ṭihzahmi miding hna cu Pathian nih a zungzal in a hlawt hna lai lo ti tu hi a si (cf. Phungthlukbia 10:3).[23]
Caang kul le caang ruknak: Caang kul le caang khat le Deut. 28:11ff hna hi hun rel chih ah a fiang khun. Miding mi ṭhanchonak le hlawhtlinnak kha a si. Siang te in mi kha a coih hna tiah hika i a chimmi ahhin sipuazi (business) tuahnak lei i coih timi biafang kha a chim duhmi a si lo, a karh la lo te in miharsa a bawmhnak tu kha a si (cf. Ex. 22:25). Cuticun a fale kha thluachuahnak hrampi an si. Hika i ‘a fale’ ti mi zawn te hi a holh umtuning ah ‘a ban’ ti zong in fian khawh a si.[24]
Caang kul le caang sarih in sawmthum le pakhat tiang: Salm caṭialtu nih Pathian a ṭihzahmi hna kha thazaang a peknak le nunnak kha fimnak in a cuanh ding ah a hun forhfialnak kan rel khawh. Pathian duhnak a tuahnak ah khan cu miding mi hna nih cun lungsau thinfualnak an ngeih a herhnak kong a fianter. An fale cungah ṭuanvo nganpi an ngeih zia kha a langhter, an tefa hna nih ram an co khawh naklai Pathian huhphenhnak an herh, miṭhalo hna belte cu ram chungin ṭhawl an si lai ti kha a nolh ṭhan. Thluachuahnak hrampi taktak cu Pathian dawtnak a si. Pathian nih miding mi cu a dawtnak (Phut. 2:8) hna i a cung i zumh awktlak a simi hna cu zeitik hmanh ah a hlaw hna lo. Pathian nih mifim cu a dawt hna, dinnak a tanhmi kha a dawt hna. Bawipa ṭihzah le upatnak nih Amah duhnak tuah kha thazaang a pek. An thinlung cungah Pathian nih a nawlbia kha a ṭial piak hna.[25]
Caang sawmthum le caang hnih in sawmthum le caang ruk tiang: A tlangpi in a chimcia mi kha hi caang hna zong ahhin a nolh ṭhan ko hna. Caang 32-33 hoi hna hi caang 12-15 i a chim cangmi kha aw-kir bantukin a hun chim ṭhanmi a si: Miṭhalo hna kha miding mi hna cungah an ṭhalo tuk, an chiakha tuk ko nain Bawipa nih a dirkamh i a ven ko hna. Caang 34 nih hin caang 1-11 chungbia kha fak deuh in a hun nolh ṭhan: Bawipa nih zeidah a tuah lai ti kha a hngah ter ko hna i a cawisan hna i ram kha a co ter hna. Cu bantuk ṭhiamṭhiam in caang 35-36 zong hi caang hranak i a chimcang mi kha a hun tharchuah ṭhanmi a si.[26]
Caang sawmthum le caang sarih in sawmli tiang: Hi a donghnak caang li nih hin harnak a tonmi piahtana vialte kha a lonh khawhnak kong kha a hun chimmi a si. Lam pahnih i an donghnak kha fiangte in a chim i: daihnak a ngeimi mipa nih cun ruahchannak he hmailei caan kha a ngei kho rih i, asinain miṭhalo nih hlonh an si lai ti kha a si. Pathian cu himnak le dornak ah aa sermi paoh nih miṭhalo hna kutchung in an luat kho ti kha a hun langhtermi cu a si.[27]
[1] NIBC,580-581.
[2] CBC, 370. Hi salm hi hlan lio Israel mi hna nih nuncan ziaza an cawnnak ah biapi ngai in cawn awk ah an i chiahmi fimchimtu biazai a si i nihin kannih nih ngakchia Sunday School kan cawnpiak hna bantukin an cawnpiak hna tik ah hmanbikmi salm a si; Word Biblical Commentary, Psalms 1-50, 296.
[3] Anderson, 292-293.
[4] Ibid., 293. A him ṭung i lawmhnak in a khatmi ramhring lak ah umnak kha hmanthlak bia in a chim duhmi a si. Rawl zong khim te in an ei an ding khoh ti zong kha a hmanthlak bia cu a si ṭhiamṭhiam i duhdim nun timi nih Lai biafang cun a khen bik hnga; NIBC, 581 ah zoh.
[5] CBC, 370.
[6] Barker, 838.
[7] Anderson, 293.
[8] Ibid.
[9] G.R. Driver, Studies in Old Testament Prophecy, ed. By H. H. Rowley (1950), pp. 53ff. chung ta lak chinmi a si.
[10] Barker, 838. Miding mi hna sining cu bia ceih a si tik ah sunparnak in a lang lai ti kha Salm caṭialtu lungput cu a si; IB, 193.
[11] IB, 193. Dai te in um ti tik ah Pathian ṭihzah upatnak in, tha dam te in um kha a chim duhmi a si.
[12] Anderson, 294.
[13] Word Biblical Commentary, Psalms 1-50, 297.
[14] Oesterley, 224-225.
[15] Anderson, 295. Bawipa nih a nihsawh men ko hna tiah a hun chimmi hi Slm 2:4 chung bia he khan a sullam aa khat. Miṭhalo hna nih Pathian nihsawhnak an ton ding kha a langhtermi a si; CBC, 370 ah zoh.
[16] Ibid.
[17] Ibid., 296.
[18] CBC, 370.
[19] Oesterley, 225.
[20] Ibid. Miṭhalo nih cun thil an i cawi tikah cham khawhnak thazaang an ngei kho ti lo i herhbaunak lawng nih a den hna, cuticun Pathian hmaika in hlawnh an si lai; Barker, 839.
[21] Calvin, 197.
[22] Broyles,182. Hika zawn i a kalnak ding lam tiah a hun timi hi kan nunning ziaza kha a langhtertu a si i David nih hin Pathian duhning in nun kha aa thimmi a si i nawl a ngaihnak nih cucu a lung a hun pemtermi a si; Calvin, 198.
[23] Anderson, 298.
[24] Ibid. An fale kha timi zawn ahhin an hrinsor hna kha ti zong in fian khawh a si; Craig, 183 ah zoh.
[25] Barker, 839. Thil sual a tuahmi hna cu zungzal in a hrawh hna lai ti zong in caang kul le caang riatnak kha fian khawh a si; Craig, 183.
[26] Broyles, 182. Caang sawmthum le caang nga zawn hi ‘vawlei hriim i a kho i a ṭhanglian mi a hnah a hring zungzalmi thing kung’ ti in a holh umtuning ahcun a um ko nain, a hrilhfiah ah Lebanon sidar thingkung bantukin tiah a tahchunhmi kha kan Lai Baibal Thiang nih cun feltuk in hrilhfiah cia in a hmanmi kan rel khawh.
[27] Ibid. Caang sawmthum le caang sarihnak zawn i miṭha le miding tiah a timi ahhin soisel awk a ngei lomi ti zong in fian khawh a si i zumh awktlakmi tinak zong a si fawn i Bawipa aa bochan i ṭhatnak a tuahmi hna nun i an hmanthlak kha a si (caang 3); p. 184 ah zoh.
Credit: Rev. Dr. Lal Pek Lian Facebook
(Amah (Rev. Dr. Lal Pek Lian @ Church Pastor, IBC) nih Salm Hrilhfiah a kan ṭialpiak cuahmah lio ah zapi rel khawh ding in a post mi chung in tår chinmi a si.)
EmoticonEmoticon