Blue December: 3 (Rev. Dr. Lal Pek Lian Thazaang peknak)

Blue December: 3

Judah mi saltaang pawl kha Babilon tiva kam ah hla an sa kho lo (Salm 137). An mawh bak lo. Asinain Nehemiah le a hawile nih cun an kut hnih in rian an rak ṭuan: hriam i tlaih pah in payan rian an rak ṭuan. Jerusalem vampang an rak rual ṭhan. Hi bantuk caan ahhin hlasak cu a fawi bak lomi a si, asinain zumtu ṭha nih cun zei bantuk thil kan ton hmanh ah hla kan sak khawh awk a si ko. An kan chimh tawnmi cu “Na ning a ṭih ahcun Pathian thangṭhatnak hla sa,” an ti i hihi a hmaan tukmi a si; Martin Luther zong nih “hla a sami khrihfa cu Satan nih a ṭih hna,” tiah a chim an ti.

Kannih zong hi kan biakinn dai dup in a um ko hi chikkhat cu a ṭha ve ko, a ṭah lio cu pei a si fom cu, tiah kan ruah. Asinain kan ram, kan khua ciacia ahhin dai tein um ko hi a dik thlu lo men lai. Kan biakinn tal nih cun kan thinlung chung i aa tet tukmi pawl kha aupi ko seh ti hi lungthin ah a hung chuak ṭhan. Paul le Silas bang thlacamnak le hlasaknak in caan kan hman khawh a herhmi a si ko (Lam. 16:25ff). Christmas thla hi kan khua le kan fingtlang nih cun Pathian thangṭhat hlasaknak in tehte a khaan awk a si ko lai. Kan blue December cu Paul le Silas bang thonginn, chungchin (cells) tiang kha kan aw nih a tlirh vemi thlacamnak le hlasaknak in caan kan hman awk a si ve ko lo maw? Cu kan hlasaknak le payan rian kan ṭuan chihnak kha artlang tein an kal ṭi kho ve ko lai.

Hi Cabia cu Rev. Dr. Lal Pek Lian nih thazaang peknak ah a ṭialmi a si. Rev. Dr. Lal Pek Lian cu a tu lio ah Immanuel Baptist Church, Hakha ah Lutlai Pastor a ṭuan lio mi a si.

<<< Blue December : 2 <<<

>>> Blue December: 4 >>>