KA RUAT KHO HRIMHRIM LO!
==========================
Kan Chinram cu Khrih Thawngtha nih a sermi
ram a si ti cu el awk a um lo. Hakha khua ah kan siangbawi hmasabik Rev. Arthur
Carson le Mrs. Laura Carson hna an rak phanhnak March 15, 1899 ni hrawng kan
miphun sining le dirhmun cu a rak niam tuk ko. Khrih caah Chin siangbawi hna
nih an nunnak pek an sian caah kan Chinram ah Khrih Thawngtha mei an kaumi cu a
alh ciahmah i kum 1983 ahcun Chin Baptist Convention [CBC/former ZBC] nih
kanmah tein Thawngtha mei cu kau ve hnik usih an ti. Chin For Christ in One
Century [CCOC] program ah an thok.
Kan Chinram ah Thawngtha a phak kum 1899 in
1999, kum 100 chungah Chinmi vialte Khrih zultu kan si dih lai tiin Thlang
Chinram, Paletwa, Kanpalet, Mindat, le Gangaw peng ah Thawngtha tlang cu a au
ciamman i missionary 7 nih an nunnak an rak pek.
Nihin ahcun kum 124 kan kal cang. Hi
dirhmun ah kan phan hna. Kan Chinram cu Khrih Thawngtha lennak ram ah a cang.
Kan Burma ram ralhrang hna uknak tangah vailamtah tung le biakinn hna hrawhpiak
in kum tam pi kan kal ko nain, Khrih tuartemnak cu i hrawm in harnak cu kan pah
chih ko. Harnak kan tonmi hna hi Khrih caah thazaang ah kan i lak ko. Kan
Chinram cu thlarau le pumsa in a thang ciahmah kho ko.
Sihmanhsehlaw atu bantuk in Kawl ralhrang
hna nih kan Chinram hi rawk dih ding in an fuh cuahmah i kan miphun hawi hna
thah le nawn le kan biakinn tha tha le inn lo tha tha vialte an hrawh dihmi cu
tuar a har tuk hringhran ko. An duhning tein kan Chinram ah an cawlcangh i, kan
Chinram an rawk dih ding le kan miphun hawi hna nunnak an lak peh lengmang ding
hi cu ka ruat ngam lo!
Miphun fate si chin chap hlei ah mah le
cangai khawrh a hmangmi miphun kan si ahcun teinak hmuh ding cu ruahchannak hi
a tlawm! Nain, kan biakmi kan Pathian dawtnak he “Unau rual i rem tein khuasak
ti hi zeitluk in dah a nuamh!” Salm 133:1] tiah kan Cathiang nih a kan
chimhmihi kan nunpi ahcun kan Zion Tlang, Chinram cu thluachuahnak tampi a hmu
kho ko lai tiin ruahchannak cu ka ngei ko. Kawl ralhrang hna nih kan Chinram
duhtawk in an sawksam ding le kan miphun hawi hna duh paoh in an tuah an hrem
hna ding hi cu ka tuar kho lo. “Ka ruat kho hrimhrim lo.”
Maw kan Pathian, kan Chin miphun hi kan
dirkamh ko sawh!
(Rev. Dr. C. Duh Kam nih a Facebook cahmai ah a ttialmi ka tar chinmi a si.)
EmoticonEmoticon