𝐑𝐚𝐢 𝐥𝐞 𝐑𝐚𝐥 𝐥𝐚𝐤𝐚𝐡 𝐑𝐮𝐚𝐡𝐜𝐡𝐚𝐧𝐧𝐚𝐤
𝑷𝒂𝒔𝒕𝒐𝒓 𝑪𝒂 𝑪𝒖𝒏𝒈 𝑩𝒊𝒌
𝐁𝐚𝐢𝐛𝐚𝐥 𝐜𝐚𝐚𝐧𝐠 𝐭𝐡𝐢𝐦: 𝐑𝐨𝐦 𝟏𝟐:𝟏𝟐
“𝑵𝒂𝒏 𝒊 𝒓𝒖𝒂𝒉𝒄𝒉𝒂𝒏𝒎𝒊 𝒓𝒖𝒂𝒏𝒈 𝒂𝒉 𝒏𝒂𝒏 𝒕𝒉𝒂 𝒏𝒖𝒂𝒎 𝒌𝒐 𝒖; 𝒉𝒂𝒓𝒏𝒂𝒌 𝒏𝒂𝒏 𝒊𝒏 𝒕𝒊𝒌𝒂𝒉 𝒍𝒖𝒏𝒈𝒔𝒂𝒖 𝒕𝒉𝒊𝒏𝒇𝒖𝒂𝒍 𝒊𝒏 𝒖𝒎 𝒖𝒍𝒂𝒘 𝒕𝒉𝒍𝒂𝒄𝒂𝒎 𝒛𝒖𝒏𝒈𝒛𝒂𝒍 𝒖.
Rai a zaw mi nih damnak kan i ruahchan,
Ral a zaam mi nih daihnak kan i ruahchan.
Covid 19 pulrai nih a kan den. Rai ruang ah
kan zatlang nun vialte an rak rawk dih. Kan dawt mi hna nih mual a kan liam
tak. An ruak te hmanh zuunmuai ngam lo in vui an rak si. A dam mi zong
ṭihphannak phunzakip in kan rak khat. Kan zaw sual lai ti kan phang. Kan zawt
ah kan thi sual lai ti kan phang. Zeitikdah raikhamsii an chuah khawh lai i
zalong tein kan tlonlen khawh lai tiah ruahchannak he kan rak hngak.
Cu bantuk pulrai nih a kan den lio ah
Pathian bia hi kan ruahchannak a si. “Himnak hmuh duh ah Cungnung Bik kha a
fuhmi le Lianngan Bik huhphenhnak chung ah aa dormi nih cun Bawipa nangmah cu a
kan chanhtu le a kan hupppengtu na si. Nangmah cu ka Pathian na si; Nangmah cu
kan bochan an ti lai. Hmuh lomi thil ṭihnung vialte le thih tlak zawtnak
vialte chungin him tein an huhphenh hrimhrim lai. Na pawng ah mi thongkhat an
thi ko lai, na velchum ah mi thonghra zong an thi ko lai.
Sihmanhsehlaw nang cu zeihmanh nih an tawng
lai lo.” (Salm 91:1-3;7,). Him tein a kan chia kho tu, a kan vengtu le damnak a
kan pe kho tu taktak cu kan Biakmi kan Pathian a si.
Rai chung in a kan chanhchuahtu kan Pathian
a si. Ruahchannak a kan pe i a kan khamh kho tu zong kan Pathian a si.
Rai nih a kan den lio ah ral a tho. Kan inn
kan lo an ciam dih. Mi khualkhua le mi ramdang ah himnak ruahchan ruang ah kan
zaam hna. Khua khirh kho ti lo in mi tampi nih a kan liam tak. Thantlang khua
chung lawng hmanh ah ral kan zam hnu ah minung 113 nih mual an kan liamtak
cang. Kan dawtmi hna nih mual an kan liamtak lio zong ah an ruak hmanh hum kho
ti lo in kan um cang. Rai in mual a kan liam tak mi hna ruak hum ngam lo in kan
rak um bantukin ral in a thi mi hna ruakhumh khawh ti lomi tampi an um ve. Ral
ruang ah harsatnak, sunghzatlaknak le temtuarnak phun zakip kan ing hna.
Zeitikdah ral a daih lai i kan khua kan ram
te ah kan kir khawh lai i zalong tein kan tlonlen khawh lai tiah kan iruahchan
cio hna. Kan ram kong ah ruahchannak phunphun a chuak ko. Salm caṭialtu nih,
“Mi a cheu nih an raltuknak rangleng kha an i bochan; a cheu nih an rangtum kha
an i bochan hna, sihmansehlaw kannih cu Bawipa kan Pathian ṭhawnnak kha kan i
bochan,” tiah a ti (Salm 20:7). Pathian i bochan ko hna usih. Pathian hi
thangṭhat ko hna usih. Thla cam ko hna usih. Kan i ruahchannak ruang ah kan
tha nuamter peng ko hna usih.
Dawtmi nulepa ulenau hawikom dawt hna, a
luancia 2019 kum dongh lai in atu tiang, rai le ral nih muihnak chunmui bantuk
in a kan den. “Muihnak nih a khuh mi lakah ceunak a um ko tiah a kan hmuhtertu
cu ruahchannak a si,” tiah Desmond Tutu nih a ti bantukin ruahchannak kan ngeih
caah rai le ral zong ah kan lung a dong bal lo. Mithiang Paul nih Rom 8:24-25
chung ah ruahchannak thawng in khamh kan si tiah a ti. Cu lawng si lo Rom 12:12
chung ah nan i ruahchannak thawng khan nan tha nuam ko u, harnak nan in tikah
lungsau thinfual in um ulaw, thlacam zungzal u” tiah a ti.
Vawlei cung kan nunnak cio ah harsatnak,
sunghzatlaknak, thihlonak, khawndennak, kanghuhnak, phunphun kan tong cio ko
hna. Mithiang Paul zong Khrih caah thongtlaknak, hremnak, temtuarnak phun zakip
a ing ko nain ruahchannak a ngei peng. Ai ruahchan mi ruang ah a tha a nuam
peng. Lungṭhawng le lungsau thinfual in um khawh ai zuam peng. Phungthlukbia
24:10 ah harnak caan ah na der ahcun na der taktak a si. Harnak caan ah ṭhawn
izuam ko hna usih. Thlacam ko hna usih. Lungsau thinfual in nun khawh izuam cio
ko hna usih. Rai le ral lio ah lung ṭhawng in ruahchannak he karhlan khawh
izuam cio ko hna usih.
Kan i ruahchannak ruang ah hin kan tha nuam
ko hna usih. Rai nih a kan den. Rai zong sau rau lo in a reh cang. Ral a tho.
Vawlei ralpi pakhatnak, pahnihnak zong a chuak nain a dai ṭhan ko. Kan ram
zong ah ral a tho nain caan zeimawt tikah a dai ṭhan hrimhrim te ko lai.
Fanny Crosby nih, “Ruahchannak ṭha bik
Jesuh kei ca… khamhnak rocotu Pathian cawk mi, a thi sung bik in a ka ṭawl
cang,” tiah a ti ( KHB 340). Harsatnak caan, ngaihchiatnak caan, hnabeidonghnak
caan, rai le ral lio caan zong kan ruahchannak ṭha bik hi Jesuh si ko seh.
Atu lio caan hi kan ruahchannak ṭhawnter a
herh bik lio caan a si. Mithiang Paul nih ruahchannak ruang ah khamh kan si.
Cucaah kan ruahchannak ruang ah hin i kan tha nuam ko u sih. Lungsau thinfual
in nun khawh izuam cio ko hna usih. Thlacam ko hna usih. Rai le Ral lak ah kan
ruahchannak hi Jesuh Khrih ah hram a bunhmi zumtu si khawh izuam cio ko hna
usih. Rai a reh lai. Ral a dai lai. Kan i ruahchanmiruang ah tha nuam tein kan
um khawh mi nun, a tak in kan tep cang lai.
Pathian sinin a ra mi lungdaih hnangamnak
le ruahchannak thar nan cung ah tlung cio ko seh.
(Johnson Memorial Baptist Church Facebook Page i an tarmi ka tar chinmi a si)
EmoticonEmoticon