𝐃𝐀𝐖𝐓𝐍𝐀𝐊 𝐓𝐀𝐊𝐓𝐀𝐊
𝟏𝐂𝐨𝐫. 𝟏𝟑:𝟏-𝟕
𝑹𝒆𝒗. 𝑽𝒂𝒏 𝑫𝒖𝒉 𝑻𝒍𝒊𝒏𝒈
Baibal cauk chung ah hin dawtnak kong hi hmun tampi ah kan hmuh i, 1Cor. 13:1-7 ah kan hmuhmi dawtnak hi zeibantuk dawtnak set dah Paul nih hin a chim duh mi a si hnga ti hi zoh ding ah ka duh mi a si.
Minung a simi poh nih hin nuhrinnak in kan i chuahpi mi dawtnak hi neih cio a si i, dawtnak a nei lo mi minung hi vawleicung ah kan um lem lai lo. Minung nih a sual tuk ah kan hmuh mi, lai a nawng cuahmah mi hna hmanh nih khin dawtnak cu an rak nei ve ko i, an nupile maw an fale maw an dawt ve ko hna lai. Minung chim lo vokte, arte hna hmanh nih dawtnak cu an nei ve ko.
Huat mi an neih lio ah khatlei ah dawt mi cu an rak nei cio ko. Chim duh mi cu mi vialte cung ah dawtnak cu neih khawh a si lai lo nain mah ṭangkachang sin cio ah cun dawtnak cu a hopoh nih kan nei viar cio ko lai. ICor. 13:1nak kan rel tik ah kan hmuh khawh mi cu minung holh a phunphun in ka hei holh kho ko hnga i, vanmi holh hmanh ka hei thiam ko hnga, sihmanhsehlaw dawtnak ka ngeih lo ahcun ka holh cu darkhuang hnachet thawng le sumsel tum thawng bantuk men a si ko, a ti. A si ahcun minung holh a phunphun a thiam mi hna le vanmi holh tiang hmanh a thiam mi pawl nih hin dawtnak cu a pelte tal cu an nei ve hnga lo maw? tiah biahalnak a um kho mi a si.
13:2nak ah cun phungchim thiamnak laksawng ka hei ngei ko hnga i, hngalhnak phuntling ka hei ngei ko hnga i, biathuk vialte ka hei hngalh dih ko hnga, cun tlang ṭhial khawhnak zumhnak zong ka hei ngei ko hnga, sihmanhsehlaw dawtnak ka ngeih lo ahcun zeihmanh ka si lo, a ti ṭhiamṭhiam. Phungchim thiam pawl, biathuk zong a hngal kho dih mi pawl le zumhnak mangtara a ngei mi pawl nih hin dawtnak cu an ngeih chih pah ve ko hnga lo maw tihi ruah a phu.
Hindu pawl lebang cu an zumhnak a ṭhawn tuk caah meiṭil sen cung ah ke lawng bak in kan kal kho lai an ti le an kal taktak le a kangh kho bak ve hna lo. Cu hna pawl zong nih cun dawtnak cu an neih ve ko lai. ICor 13:3nak ah cun ka ngeih mi thil vialte mi ka hei ṭhenh dih ko hna hnga a ti. Dawtnak le zaangfahnak tel loin mi hi thil ṭhenh khawh a si lo ti hi Paul nih hin ai fiang tuk ve ko lai. Ka pum hmanh khangh awk ah ka vaa pe ko hnga a ti. Kan dawt tuk mi hna can-ai ah hin kan pum hi khangh awk ah kan i pe siang taktak ko lai.
Sihmanhsehlaw dawtnak ka ngeih lo ahcun ka caah ṭhathnemnak zeihmanh a um lo, a ti ṭhiamṭhiam. A cunglei Baibal caang hna nih an chim duh mi dawtnak hi minung nih kan i chuahpi mi dawtnak menmen hi a chim duh mi a rak si lo. IJohan 4:8nak ah cun Pathian cu dawtnak a si, a ti. Minung sinak in i zuam ruang ah zeipoh va tuah khawh a rak si zia le cun nuhrinnak in i chuahpi mi dawtnak in zeimawzat cu mi cung ah dawtnak va ngeih khawh a si zia hi a lang.
Sihmanhsehlaw Khrih kan ngeih lo ahcun zeisan hmanh a rak tlai lo ti hi a chim duh mi a si. Cucaah cun kan nunnak ah a biapi bik mi cu Khrih ngeih hi a si i, cu Khrih a ngei cang mi hna nunnak ah cun theipar ṭha a lang zungzaal. Khrih chung ah cun dawtnak cu a tling. Khrih chung ah kan um taktak i, Khrih zong kan chung ah a um ve ahcun cu Khrih nih ai ngeih mi a ziaza hna cu kan i ngeih khawh ve lai, tinak a si.
Khrih nih ai ngeih mi a ziaza hna cu hihi an si: Thlachiat a ruat i, mi cung ah zaangfahnak a ngei. A nah a chuak lo, a lung a puam lo i, aa porhlaw lo. Tlabulbal in khua a sa lo i, amah zawn lawng aa ruat lo. A thin a tawi lo, palhnak kha aa cinken peng lo. Midang sualnak cung ah khan diriam in a um lo, biatak tu ah khan aa lawm. A lung a dong bal lo, zumhnak a ngei, ruahchan nak a ngei, a lung a sau i, a thin a fual. Cucaah cun dawtnak taktak ngeih kan ti mi cu Khrih ngeih kha a rak si i, Khrih a ngei taktak mi hna nunnak ah cun Khrih muisam kha a lang tawn.
(Johnson Memorial Baptist Church Facebook Page i an tarmi ka tar chinmi a si)
Advertisement
EmoticonEmoticon