Ka Nu Ka Bat Mi
Pu Din Lian
“Nu nih an fale an
zohkhen hna bantuk” (IThesalon 2:7)
Nu le cu a kan hringtu, hnuk thlum a kan dinh tu, a kan zohkhen
tu bik an si. Nule dawtnak cu kan cham kho hna lai lo i an kan dawtnak lei kan
ba zungzal ko lai. Kan nule cu an kan zohkhenh lawng a si lo, kanmah cawmnak ca
ah rian an ṭuan mi ah zeitik hmanh ah an rian ṭuan mi a nauta an ti bal lo i an fale ca cu an
tuan mi kan re a thei tuk an ti bal fawn lai lo. A thaw deuh mi rawl an kan pek
khawh ah kan pawng in an thu i kan ei kan din an kan zoh ah an i nuam tuk. Thil
ṭha te an kan fenh
aihter khawh tik zong ah an kan zohthla tuk. Mi hmai ah zoh dawh le thil ṭha te kan tuah khawh
zong ah an i lawm i an lung a hmui tuk.
Kei zong lai lei lothlo nulepa tang ah a thang mi ka si. Fur
caan ah lo ah a kal i zanlei ruahsur i cin bu he inn an tlun tik zong ah inn
hmai in “Ka nu, na tlung cang maw?” ti in kan don kan biakchawnh mi hna khi
zeidang nakin an i lawm deuh. An thil a cin mi an i phoih dih cangka mei pawng
ah an ṭhu i an rak phorh mi fangvoi no an kan rawh piak i, kan ei an
kan zoh ah hin an i nuam tuk. Cu lawng si lo, khua dang ah cacawn ka kal ah hin
an ka ngai tuk tawn i ka angki le a dangka thilpuan hlun kan chiahtak mi ka rim
kha an hnimh tawn hna.
James Thompson nih, a hawipa nih a nu lei a bat nak kong hitihin
a ṭial. Hi a hawipa hi
kum 30 asi tikah a nu dawtnak a theih ṭhan kong hitihin a ṭial. Amah cu cathiam a
si i nupi zong a ngei i ṭha le rem ngai in khua a sa kho. A nu zong a nung i a dam rih
ko. Asinain voikhat cu a nu dawtnak ruah lo in cikhat ah fiang tuk in a vun
hmuh ṭhan. A nu nih nganfak
ngai in a rak hrin i a hnuk a rak dinh, ti a kholh, fenh aih a hruk ter, lamkal
a thiam ah a pawng in a dirkamh i a rak bawh ning, bia a chim hmasa mi a aw cu
a nu caah music ṭha bik a rak si zia kha pakhat hnu pakhat a mitthlam ah a cuang.
Cu lawng siloin zan fate a caah Bawipa sin ah thla a cam tawn mi kha a vun ruah
ṭhan. Cu hlan a nu
dawtnak ruat setsai lo in a rak um tawn mi kha patling a si hnuah a nu cham
khawh lo mi leiba ka ngei ti kha a theih. Cu nih cun James a hawipa a nunnak le
thil a hmuh ning kha a thlen tiah a ṭial.
Cucaah nule a nung rih mi hawidawt hna, mivan ṭha tuk nan si. Na nu
maw a tar tiah awhrang in chawn lai cih. Na nu na dawtnak cu nangmah le nan
chung Pathian duh mi lam ding lam tha ah an hruai tu a si kha kan nule a kan
kaltak cia mi kan si zong ah ni khat cu sui innka a hram in kan Bawipa Jesuh he
a kan dong tu an si te lai.
Kan nule zong nih Hannah nih Pathian sin ah thla a cam bantuk in
profet Samuel a pek kha (ISamuel 1:10-11,17) kan fale caah thlacam peng u sih.
Thla nan cam tikah vawlei thluachuah ca lawng siloin, zumtu ṭha, amah Khrih nunnak
ngei mi fanu fapa si ding ah thlacampiak zungzal ko hna u sih.
Zion Baptist Churh,
Mother’s Day Darkhing Cazual ṭial mi Facebook ah a tar chinmi kan chiah chinmi a si.
Caṭialtu Pu Din Lian Kong tlamtling inrel na duh ahcun a tang LINK ahhin rel khawh a si.
https://lianhakha.blogspot.com/2019/08/pu-din-lian-tuanbia-tawi.html
EmoticonEmoticon