Christmas
lawmhnak
Vawlei lungretheihnak he a
khah lio ah Khamhtu Jesuh Khrih a chuak timi hi hnangamtertu, ruahchannak a
petu, lawmhnak a petu thawngttha bik a si. Cu thawngttha cu vanmi nih an rak
phuanmi thawngttha kha a si. Vancungmi nih cun a thawh hna i “Nan thin phang
hlah uh, zeicahtiah nan sin ka ratnak cu nan ca i thawngttha hi a si. Cu thawngttha
nih cun mi vialte sin ah lawmhnak a tlunter lai. Tuzaan hrimhrim ah hin David
khua chung ah nan Khamhtu cu a chuak cang, Khrih Bawipa cu” ti kha a si. Jesuh
a chuah lio ah minung nunning a rawk ngaingai. A tu kan vawlei zong cathiang
nih ni hmanung bik ah thil a si laimi a chim bantuk rawhnak lei a panh chin
lengmang.
Asinain Bethlehem i a ringmi thawngttha cu thawngttha vialte
lak ah a ngan bik a si. Zeicah tiah chimchung bantuk in Messiah cu a chuak
cang! Ruahchannak a um. Khor chung in chuahnak lam a um cang. Khamhnak cu a tak
a si cang. Hell nih a ral a sung cang. Vanram cu phanh khawhnak ah um cang.
Cu thluahchuah cu lawmhnak
he a khat
Jesuh Khrih kha khamhtu ah
na cohlan cangka in tinvo tampi ngeimi na si cang. Sual ngaihthiamnak, himnak,
vanram, vancung chungtel sinak, zingfate lawmhnak thar he thawh tthan
lengmangnak.
Hi vawlei hi sualnak in khat hmanhsehlaw Jesuh kan ca i a
chuah lawmhnak nih kan nunnak ah mei bang a kangh zungzal. Cucaah jeush nih “Ka
lunglawmhnak kha nan chung ah a um i nan i lawmhnak a tlin nakhnga” a ti (Johan
12: 11).
Kan lunglawmhnak a phichuak
Khrih a chuahnak cu thawngttha bik a
si ko. Cathiang nih “Nanmah cu ka hmaihngalnak le kan i lawmhnak nan si taktak
ko” (I Thes. 2: 20) a ti bantuk in kan nunnak nih Khrih a cohlannak, kanmah ah
dihter ding a si lo. Midang hrawmh ding in Bawipa nih a kan fial. Andru nih a u
Simon Peter kha Jesuh sin ah a kalpi bantukin (Johan 1: 42) kan innchungkhar,
kan innpa, kan hawikom hna kha a tu Christmas caan te ah hin Khrih sin ah kalpe
ve hna u sih. Bawipa nih a reltu nan za te thluachuah in pe ko hna seh.
Pu Din Lian Thlarau thazaang chung in lakmi a si (Amah hnatlaknak in)
Advertisement
EmoticonEmoticon