CHRISTMAS LEIBA

Voikhat cu England ram ah cawmtu ngei lo ngakchia zohkhenhnak inn ah an sayamahci ca a ttial cuahmah i i manh lo ngai in a um.

Cu lio ah zohkhenhtu ngei lomi ngakchia pakhat cu cuka um ding in an ratpi. Cu zoh khenhtu sayamahci cu a khuaruah a har. Zeicahtiah umnak inn cu an khat cang. Tangka lei zong in an chambau ngai i zeitin dah eidin le fenh aih kan tuah piak lai tiah a lungre a thei ngai. A thaw fakpi in a hun chuah i a lu a hun cawi tik ah vanpang i an thlaimi nithla relnak ah “:Pathian nih na herh ning in an pek ko lai” (Fil 4:19) tiah aa ttial mi kha a hun hmuh. Pathian cu kan caah a za ko, fakpi in thlacam lawng a herh a ti.

Cu lio ah innka kingh thawng a theih. Amah he a tuan ve mi sayamah a hung lut i, “Saya mahci, mi pa nih ton an herh.” a ti. Mipa cu mi khaan sang pachuakthiam ngai a si. Cu pa nih cun, keimah hi khual tlawngmi ka si, London kalpah in nan khua hi ka rak palpah i a si a ti. Sayamahci nih cun ngakchia ihnak, thutdirnak, lente celhnak le a hmuh duhmi vialte a hmuhsak.

Cun ngakchia 50 kha lentecelhnak pakhat cio a thenh hna. An i lawm tuk i heh tiah an laam. Khualpa zong cu aa nuam tuk ve i anmah he cun a laam ve. Cu hnu cun khualpa nih cun Bethlehem i ngakchia Jesuh hrin a sinak kong kha a chimh hna i lungtho tha nuam tein an ngai. Cu hnu ah sayamahci nih khualpa caah hla a sa khomi nan um lai maw tiah a hal hna i a hnu bik an umtermi pate nih “kei mah” a ti i “ Khrih ngakchiapa luchiahnak chantling hmanh a ngei lo mipa lawmhnak hla a sak. A hlasakmi cu ngaih a nuamtuk i khualpa cu a mitthli a tla.

Cu hnu cun khualpa nih a hal caah ngakchia ih nak an zoh. Cun khual pa nih cun sayamahci cu nu ngakchia ihnak lawng kan zoh. Pa ngakchia ihnak kan zoh rih lai a ti i pangakchia ihnak khaan cu an va zoh tthan. Cu khaan ihnak a hriang bik achun ihkhun hmete a um i cu ka ahcun a ho dah a it tiah a hal. Sayamahci nih, “Atu nai hla an sakpiaktu pate kha a ti. Aho hmanh nih an zoh duh lo caah a khaan a khat cang nain kan luhtermi a si,” tiah a chimh.

Khualpa nih a zaal chung in tangka (cheque) chuahnak lehmah aa chuah hnu ah a ttal i pek. Sayamahci nih a zoh tik ah a tam tuk hringhran i ngakchiapa kum saupi a cawmkhawh lai kha a hngalh. Khualpa nih “Hite hi Christmas laksawng ah in pe ning” a ti i pek. Khualpa cu a zaal a vun i lak, a kut a tlaih hna i kal a tim colh. Asinain ruah lo in a hun i mer i, “:Kei zong hlan kum 30 lio ah hawi ka rak ngei lo, Aho hmanh hraamtu le dawtu ka rak ngei lo, kha ih khun kha keimah ihkhun a rak si. Cucaah keimah bantuk hi ngakchia hi caan tha pek khawh ve ding ah caan na ka pekmi leiba kan cham a si” tiah a ti.

Pu Din Lian Thlarau thazaang chung in lakmi a si (Amah hnatlaknak in)

Pu Din Lian (Ca ttialtu) kong rel na duh ahcun hika Paragraph hi click