Nero Siangpahrang Nih Rome Khua A Khangh (1)
==========================
Nero siangpahrang pa hi a sual ngaingaimi siangpahrang a si. Hlasak thiam awṭha, tingtang tum thiam, hlaphuah thiam si khawh kha a duh ngaingai ve i a miṭhi lalang pawl le a tlangchuak pawl kha an duh zong duh lo zong ah hla a sak piak hna, tingtang a tum piak hna. An lungchung in cun an simh tuk ko nain siangpahrang cu zapei bengh piak, fak le hlawrh kha a herh fawn i an hmurka le kut te cun an conglawmh cio. Asinain Nero cu an faknak kha a di a riam kho lo. Ka hlaphuahmi hmual a ngeih khawh naklai zeidah ka tuah, ka hmuh, ka khaan-sa (feel) khawhmi a um hnga ti kha a ruat. Lungthincheutu a mifim hna nih, thil pakhat khat kha a sining taktak in na hmuh, na theih ahcun na hlaphuah hmual a ngei kho deuh lai an ti. Cucu aa lun i hmunton ding in zei thil dah ka sersiam lai ti kha a ruat.
Rome khua, misifak pawl umnak sang le veng khi ka khangh lai, mizapi mei alh le mei khu lak i an tlik an leek, an au an khuan, an kio an raaknak aw kha ka theih ka hmuh lai i cu lio ahcun hmual a ngei kho dingmi hla ka phuah lai tiah a ruah i cucu a tlangchuak mifim bawi pawl cu a chimh hna i a timhpi hna. Rome khuapi chungtel sang pakhat, sifak pawl umnak cu mei in a duah, kutka ngan pipi cu a kharkanh dih hna. Cu sang le veng i a ummi minung vialte cu mei alh lakah an i erhkhumh. An raak an kio, an thinphan in an tlik-leek lio ah Nero nih cun a siangpahrang inn, cungdot in a cuanh hna i hla cu a phuah, a tingtang cu aa laak i hla cu lungzur ngai in a phuah, ti a si.
(Ralhrang nih Thantlang khua inn 164 an khangh a thaizing ah Rev. Dr. Lal Pek Lian nih thazaang peknak ah a ṭialmi a si. 20/10/2021)
Nero Meikhangh - 1 thazaang peknakrel khawh a si.
Nero Meikhangh - 2 thazaang peknakrel khawh a si.
Nero Meikhangh - 3 thazaang peknak rel khawh a si.
Nero Meikhangh - 4 thazaang peknakrel khawh a si.
Nero Meikhangh - 5 thazaang peknakrel khawh a si.
Nero Meikhangh - 6 thazaang peknakrel khawh a si.
EmoticonEmoticon