Nero Siangpahrang Nih Rome Khua A Khangh (6) by Rev. Dr. Lal Pek Lian

Nero Siangpahrang Nih Rome Khua A Khangh (6)

============================

Zan ṭim ah Nero cu a ralkap he mei-inn hmete i van bu in arena ahcun a run i chawk, chiandeih nih a ei bangmi mithi ruak a zoh hna ah mirh bu tein an thih kha a hmuh. Aziah an thih zong ah an mirh khawh? A ziah hla an sak, aziah an mirh (They are singing; they are smiling) timi sinak nih Nero cu a khuaruah a harter tuk. Misifak hna umnak deuh i khua a sa vemi khrihfa zumtu hna, an inn lo dihlak an khangh piak hna pin ah anmah lila cu sual an puh hna i thihnak dantatnak tiang an tuarter hna. Asinain mei nih a kangh khawh lomi an zumhnak cu: hla an sa kho i mirh bu tein an thi kho. Steven a thih lio ah mithmai panh bu tein a thi i lung in a cheptu hna caah thla a rak cam piak khawh hna (cf. Lam. 6:15; 7:55-60).

Nero nih a rak tlaihter vemi hna Peter zong cu thih dan an pek ve. Asinain amah kha vailamtahnak in thah dingah nawl pek a simi ralkap hna cu Peter nih a nawl hna: “Kei hi ka Bawipa a rak hlaw balmi ka si, ka Bawipa vailam an tah bantukin i tah ve awkah kaa tlak lo, cucaah zaangfahnak tein ka bingtalet in vailam nan ka tah kho hnga maw?” tiah a ti hna i a chim bang in a bingtalet in Peter cu vailam ah an tah. Martar in a Bawipa Khrih thawngṭha caah a nunnak a pek. Nero nih mei a rak kaumi, a rak duahmi cu Peter tiang hmanh in martar thihnak a chuahpitu a hun si ko. Asinain Tertullian nih a chimmi hi a hmaan tukmi a si: “Martar hna thisen cu khrihfabu thlaici a si,” a rak ti.

(Ralhrang nih Thantlang khua inn 164 an khangh a thaizing ah Rev. Dr. Lal Pek Lian nih thazaang peknak ah a ṭialmi a si. 20/10/2021)

Nero Meikhangh - 1 thazaang peknakrel khawh a si.

Nero Meikhangh - 2 thazaang peknakrel khawh a si.

Nero Meikhangh - 3 thazaang peknak rel khawh a si.

Nero Meikhangh - 4 thazaang peknakrel khawh a si.

Nero Meikhangh - 5 thazaang peknakrel khawh a si.

Nero Meikhangh - 6 thazaang peknakrel khawh a si.

Nero Meikhangh - 7 thazaang peknakrel khawh a si.