Nero Siangpahrang Nih Rome Khua A Khangh (5) by Rev. Dr. Lal Pek Lian

 

Nero Siangpahrang Nih Rome Khua A Khangh (5)

=======================

            Nero nih Rome khualipi sang khat mei in a duah i a khanghmi cu a karh chinchin. A mei alh cu a dai ko cang nain minung kangh uhnak, hremnak, le biaknak hrawhnak tiang a hun phanmi mei-alhpi cu a lawn cuahmah ko. Cucaah Rome khua um khrihfa zumtu hna nih Peter kha zaam an fial, zeicah tiah thawngṭhabia kha hmunkip i chim awk a herh ko rih tiah an ruah. Peter zong cu a hna a tla ve i John Mark he tiah Rome khuapi cu an chuah taak. Lampi ah Bawi Jesuh he an i tong; Peter nih Bawipa khuazei ah dah na kal lai (qua vadis) tiah a hal tikah Jesuh nih “A voi hnihnak Rome khua ah vailamtahnak ka va ing lai,” tiah a leh. Peter cu thukpi in a lung a hung pem i Rome khua i kir i martar in khrihfa zumtu hna he thih pei a herh cang hi ti kha a hun hngalh. 

Advertisement

Khrihfami an tlaihmi hna cu arena timi certual tia inn nganpi, puai zohnak ca i sakmi ah a zarh zarh in rawl an pek ti lomi chiandeih sehter an timh hna. Cozah cung le rammi cungah zei sualnak hmanh a tuah lomi khrihfa hna, minung a za leng, tar le ngakchia telh in, thonginn in arena innpi ah cun an hun chuahpi hna. Cun chiandeih thong innkapi cu an hun i a rawl a ṭam tuk cangmi chiandeih sahrang pipi nih minung cu seh ding in an hun timh hna. An ṭih tuk, an tli an le, arena innpi a vampang lei le a kideng lei ah an i beng dih hna. Ṭihnak in an khat, cu lio ah cun mibu lakin Peter cu a hung dir i aw thangpi in “Nihin ah Nero pennak a dih cang, Khrih pennak nih teinak a hmuh cang” tiah a hun au. Mizapi nih an zoh, Nero cu a lau tuk i Peter cu tlaih a fial hna i ralkap nih an tlaih colh. Asinain Peter aw kha khrihfa hna nih an hun theih i amah an hmuh tik ah thazaang an hun la, an ṭih ti lo, hla an sa. Nero cu mibu nih hla an sak tikah a lau tuk. Aziah hla an sak khawh? tiah khuaruahhar ngai in a pawng ṭhumi a tlangchuak pawl cu heh tiah bia a hal hna. Hla an i sak bu tein chiandeih nih cun a thleh-bauh dih hna i an sa cu an ei ko hna. Asinain, hla taktak an sa kho ko ee! Khrihfa tuanbia ah hlaremh aa dawh bik pakhat a si ṭheu ko lai.

 

(Ralhrang nih Thantlang khua inn 164 an khangh a thaizing ah Rev. Dr. Lal Pek Lian nih thazaang peknak ah a ṭialmi a si. 20/10/2021)

Nero Meikhangh - 1 thazaang peknakrel khawh a si.

 

Nero Meikhangh - 2 thazaang peknakrel khawh a si.

 

Nero Meikhangh - 3 thazaang peknak rel khawh a si.

 

Nero Meikhangh - 4 thazaang peknakrel khawh a si.

 

Nero Meikhangh - 5 thazaang peknakrel khawh a si.

 

Nero Meikhangh - 6 thazaang peknakrel khawh a si.

 

Nero Meikhangh - 7 thazaang peknakrel khawh a si.